କଟକ ଅଫିସ,୧୩ା୧: ରାଜ୍ୟରେ ଚାଲିଥିବା ବେଆଇନ ଗୋହତ୍ୟା ଓ ଗୋ-ଚାଲାଣ ରୋକିବାକୁ ସରକାର କ’ଣସବୁ ପଦକ୍ଷେପ ନେଇଛନ୍ତି, ସେ ସମ୍ପର୍କରେ ବିସ୍ତୃତ ରିପୋର୍ଟ ଦାଖଲ କରିବାକୁ ହାଇକୋର୍ଟ ଗୁରୁବାର ନିର୍ଦ୍ଦେଶ ଦେଇଛନ୍ତି। ମୁଖ୍ୟ ବିଚାରପତି ଏସ୍. ମୁରଲୀଧର ଓ ବିଚାରପତି ମୁରାହରି ଶ୍ରୀରମଣଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରିଛନ୍ତି। ଅଗଷ୍ଟ ୨ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ।
ସାମାଜିକ କର୍ମୀ ଜୟନ୍ତୀ ଦାସଙ୍କ ପକ୍ଷରୁ ଏ ନେଇ ଜନସ୍ବାର୍ଥ ମାମଲା ଦାଏର କରାଯାଇଥିଲା। ମାମଲାର ପୂର୍ବ ଶୁଣାଣିବେଳେ ରାଜ୍ୟ ସରକାରଙ୍କ ପକ୍ଷରୁ ଜବାବ ଦାଖଲ କରାଯାଇଥିବାବେଳେ ଆବେଦନକାରୀଙ୍କ ପକ୍ଷରୁ ପ୍ରତିଜବାବ ଦାଖଲ କରାଯାଇଥିଲା। ଗୁରୁବାର ଶୁଣାଣିବେଳେ ଖଣ୍ଡପୀଠ ବେଆଇନ ଗୋହତ୍ୟା ଓ ଗୋଚାଲାଣ ରୋକିବା ଦିଗରେ କ’ଣସବୁ ପଦକ୍ଷେପ ନିଆଯାଇଛି ବୋଲି ରାଜ୍ୟ ସରକାରଙ୍କଠାରୁ ଜାଣିବାକୁ ଚାହିଁଥିଲେ। ପୂର୍ବ ଶୁଣାଣିରେ ସରକାର ଅନ୍ୟ ରାଜ୍ୟରେ ଏନେଇ ରହିଥିବା ଆଇନକୁ ପରଖି ପଦକ୍ଷେପ ନେବାକୁ କହିଥିବା ପରିପ୍ରେକ୍ଷୀରେ ବର୍ତ୍ତମାନର ସ୍ଥିତି ବିଷୟରେ ଅଦାଲତ ପଚାରିଥିଲେ। ତେବେ ଏଥିପାଇଁ ସ୍ବତନ୍ତ୍ର ଟାସ୍କ ଫୋର୍ସ ଗଠନ ନେଇ କ’ଣ ପଦକ୍ଷେପ ନିଆଯାଇଛି, ଏଯାବତ୍ କେତେ ବେଆଇନ ଗୋହତ୍ୟା ହୋଇଛି, କେତେ ଗୋଚାଲାଣ ହୋଇଛି ସେନେଇ ରାଜ୍ୟ ସରକାର ବିସ୍ତୃତ ଭାବେ ରିପୋର୍ଟ ପ୍ରସ୍ତୁତ କରି ଆଗାମୀ ଜୁଲାଇ ୧ ତାରିଖ ସୁଦ୍ଧା ହାଇକୋର୍ଟରେ ଦାଖଲ କରିବାକୁ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ବିଜୟ କୁମାର ରଗଡ଼ ମାମଲା ପରିଚାଳନା କରୁଛନ୍ତି।