ହାଟଡିହୀ,୧୦।୯(ଡି.ଏନ.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ କଳିଙ୍ଗା ଗ୍ରାମରେ ବୁଧବାର ବିଳମ୍ବିତ ରାତିରେ ଏକ ଅଭାବନୀୟ ଘଟଣା ଘଟିଛି। ଭିନ୍ନକ୍ଷମ ମା’ ଓ ପୁଅଙ୍କ ପୋଡା ମୃତ ଦେହ ଉଦ୍ଧାର ହୋଇଛି। ସୂଚନାରୁ ଜଣାଯାଇଛି ଯେ ଭିନ୍ନକ୍ଷମ ମା’ ଜଞ୍ଜାଳି ଜେନା(୭୦)ଓ ପୁଅ ବନମାଳୀ ଜେନା(୪୫) ଏକ ପରିତ୍ୟକ୍ତ ଅଙ୍ଗନବାଡି ଘରେ ବସବାସ କରନ୍ତି। ବନମାଳୀଙ୍କ ଶଶୁର ଘର ଭଦ୍ରକ ଜିଲା ବନ୍ତ ଥାନା ପଦାକଣା ଗ୍ରାମରେ ତାଙ୍କ ସ୍ତ୍ରୀ ଓ ପୁଅ ରୁହନ୍ତି l ଗୁରୁବାର ସକାଳୁ ଉଭୟଙ୍କ ପୋଡା ମୃତଦେହ ଦେଖିବାକୁ ମିଳିଥିଲା। ଖବର ପାଇ ନନ୍ଦିପଦା ପୋଲିସ ଘଟଣା ସ୍ଥଳରେ ପହଂଚି ତଦନ୍ତ ଆରମ୍ଭ କରିଛି। ଘଟଣା ସ୍ଥଳରେ ଉତ୍ତେଜନା ଓ ଅସନ୍ତୋଷ ପ୍ରକାଶ ପାଇଛି l ସ୍ଥାନୀୟ ଲୋକ ପୋଡି ମାରି ଦିଆଯାଇଥିବା ଅଭିଯୋଗ କରି ଏବଂ ଦୋଷୀକୁ ଗିରଫ ଦାବିରେ ଶାଳନିଆ-ଓରାଳି ରାସ୍ତାରୋକୋ କରିଛନ୍ତି। ତେବେ କିଏ କେଉଁ ପରିସ୍ଥିତିରେ ଏପରି ଘଟଣା ଘଟେଇଲା ତାହା ମୁଖ୍ୟ ପ୍ରଶ୍ନ ସାଜିଛି। ଅପରପକ୍ଷେ ମା’ ପୁଅଙ୍କୁ ହତ୍ୟା ପରେ ପୋଡି ମାରି ଦିଆଯାଇଛି ନା ଆଉ କିପରି ଏଭଳି ଘଟଣା ଘଟିଛି ତାହା ସ୍ପଷ୍ଟ ହୋଇ ପାରିନି।
