ଅନୁଗୋଳ ଅଫିସ, ୨୮ା୧୦ – ପୂଜାକୁ ନେଇ ସରକାର କଟକଣା ଜାରି କରିଥିଲେ। ଆବଦ୍ଧ ମଣ୍ଡପରେ ମାତ୍ର ୭ଜଣଙ୍କ ଉପସ୍ଥିତିରେ ପୂଜାର୍ଚ୍ଚନା ପାଇଁ ଅନୁମତି ଦେଇଥିଲେ। ସେହିପରି ବିନା ଶୋଭାଯାତ୍ରାରେ ଭସାଣି ପାଇଁ ନିର୍ଦ୍ଦେଶ ମଧ୍ୟ ରହିଥିଲା। ହେଲେ ଅନୁଗୋଳରେ ପୂଜା ଶାନ୍ତିଶୃଙ୍ଖଳାରେ ହୋଇଥିଲେ ବି ମଙ୍ଗଳବାର ଭସାଣିରେ ବିଶୃଙ୍ଖଳା ଦେଖିବାକୁ ମିଳିଥିଲା। କେତୋଟି ପୂଜା କମିଟି ଅମାନିଆ ହୋଇ ଭସାଣି ଶୋଭାଯାତ୍ରା ବାହାର କରିଥିବା ବେଳେ ପୋଲିସ ଅଟକାଇଥିଲା। ସେହିପରି ପ୍ରଶାସନ କରିଥିବା ଅସ୍ଥାୟୀ ପୋଖରୀରେ ମୂର୍ତ୍ତିଗୁଡ଼ିକ ବିସର୍ଜନ କରାଯାଇ ନ ଥିଲା।
ପାର୍ବଣ ସମୟରେ କଟକଣା ପାଳନରେ ଢିଲା ହେଲେ ଆଗକୁ ପରିସ୍ଥିତି ଅଣାୟତ୍ତ ହୋଇପଡ଼ିବ। ଏ ନେଇ ସରକାର ବାରମ୍ବାର ଚେତାଇ ଦେଇଥିଲେ। ସମସ୍ତ ନିୟମାବଳୀ ଯେପରି କଡ଼ାକଡ଼ି ପାଳନ ହୁଏ ସେ ନେଇ ପ୍ରଶାସନକୁ ନିର୍ଦ୍ଦେଶ ଦେଇଥିଲେ। ତଦନୁଯାୟୀ ପ୍ରଶାସନ ପକ୍ଷରୁ ବିଭିନ୍ନ ପୂଜା କମିଟିକୁ ଡକାଯାଇ ଆଲୋଚନା କରାଯାଇଥିଲା। କମିଟି କର୍ମକର୍ତ୍ତାମାନେ ମଧ୍ୟ ଏଥିରେ ସହଯୋଗ କରିଥିଲେ। ମା’ଙ୍କ ମଣ୍ଡପ ସେପରି ସାଜସଜ୍ଜା ହୋଇ ନ ଥିଲା କି ଶ୍ରଦ୍ଧାଳୁମାନଙ୍କୁ ଦର୍ଶନର ସୁଯୋଗ ଦିଆଯାଇ ନ ଥିଲା। ୭ଜଣଙ୍କ ଉପସ୍ଥିତିରେ ପୂଜାର୍ଚ୍ଚନା କରାଯାଇଥିଲା। ସବୁ ମଣ୍ଡପର ସମ୍ମୁଖ ଭାଗକୁ ପାଲ ଦ୍ୱାରା ଆବଦ୍ଧ କରାଯାଇଥିଲା। କିନ୍ତୁ ମଙ୍ଗଳବାର ଭସାଣି ବେଳେ ଏକ କମିଟି ପକ୍ଷରୁ ସିଂଘ ବାଜାକୁ ସାମିଲ କରାଯାଇଥିଲା। ଏହା ଜାଣିବା ପରେ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ପହଞ୍ଚତ୍ ଏପରି ଶୋଭାଯାତ୍ରାକୁ ବନ୍ଦ କରାଇଥିଲେ। ସେହିପରି ଆଉ ଏକ କମିଟି ମେଢ଼ ଶୋଭାଯାତ୍ରା କରି ମାର୍କେଟ ମୁହଁା ହୋଇଥିବା ବେଳେ ପୋଲିସ ପହଞ୍ଚତ୍ ଅଟକାଇଥିଲା। ପରେ ଉକ୍ତ ମେଢ଼କୁ ଆଖଣ୍ଡଳମଣି ରାସ୍ତା ଦେଇ ନିଆଯାଇ ନାରଣସାଗର ନିକଟ ଅସ୍ଥାୟୀ ପୋଖରୀରେ ବିସର୍ଜନ କରାଯାଇଥିଲା। ଅନ୍ୟ ଏକ କମିଟି କର୍ମକର୍ତ୍ତା ଅସ୍ଥାୟୀ ପୋଖରୀରେ ମୂର୍ତ୍ତି ବିସର୍ଜନ ନ କରିବା ସହ ମାଜିଷ୍ଟ୍ରେଟଙ୍କ ସହ ମୁହଁାମୁହିଁ ହୋଇଥିବା ଦେଖାଯାଇଥିଲା। ଅପରପକ୍ଷରେ ପ୍ରଶାସନ ଅପରିଷ୍କାର ସ୍ଥାନରେ ଅସ୍ଥାୟୀ ପୋଖରୀ କରିଥିବାରୁ ଏପରି ଅସୁବିଧା ହୋଇଥିବା କେତୋଟି କମିଟି କର୍ମକର୍ତ୍ତା ପ୍ରକାଶ କରିଛନ୍ତି।
ଏଣିକି ବାଧ୍ୟତାମୂଳକ କରାଯିବ
ପ୍ରଶାସନ କରିଥିବା ଅସ୍ଥାୟୀ ପୋଖରୀରେ ମା’ଙ୍କ ମୂର୍ତ୍ତି ବିସର୍ଜନ କରା ନ ଯିବା ଦୁଃଖଦାୟକ। ଆଗକୁ ଏମିତି କରାଯିବାକୁ ଅନୁମତି ଦିଆଯିବ ନାହିଁ। ପୂଜା କମିଟିଗୁଡ଼ିକ ଅସ୍ଥାୟୀ ପୋଖରୀରେ ମୂର୍ତ୍ତି ବିସର୍ଜନ କରିବାକୁ ବାଧ୍ୟତାମୂଳକ କରାଯିବ।
-ସିଦ୍ଧାର୍ଥ ଶଙ୍କର ସ୍ବାଇଁ, ଜିଲାପାଳ
ଶାନ୍ତି ଶୃଙ୍ଖଳାରେ ଶେଷ ହୋଇଛି
ସରକାରୀ କଟକଣାକୁ ସହରବାସୀ ମାନିଛନ୍ତି। ଶାନ୍ତି ଶୃଙ୍ଖଳାର ସହ ପୂଜା ଓ ଭସାଣି ଶେଷ ହୋଇଛି। କେତେକ ସ୍ଥାନରେ କିଛି ଅମାନିଆ ବାଜା ଆଣି ଶୋଭାଯାତ୍ରାକୁ ଆସିଥିଲେ। ସେମାନଙ୍କୁ ବନ୍ଦ କରାଯାଇଥିଲା।
-ରମେଶ ଚନ୍ଦ୍ର ବିଶୋଇ, ଥାନା ଅଧିକାରୀ
ପ୍ରଶାସନ କଠୋର ହେବା ଆବଶ୍ୟକ
ପ୍ରଶାସନ କରିଥିବା ନିୟମକୁ କେତୋଟି ପୂଜା କମିଟି ଅଣଦେଖା କରିଛନ୍ତି। ଗତବର୍ଷ ମଧ୍ୟ ଅସ୍ଥାୟୀ ପୋଖରୀରେ ଗୋଟିଏ ହେଲେ ବି ମେଢ଼ ବିସର୍ଜନ ହୋଇ ନ ଥିଲା। ଏଥର ମଧ୍ୟ ସମାନ ଅବସ୍ଥା। ପ୍ରଶାସନ କଠୋର ହେଲେ ଏପରି ହୁଅନ୍ତା ନାହିଁ।
-ବିଶ୍ୱରଞ୍ଜନ ପଟ୍ଟନାୟକ, ସହରବାସୀ
ବିଶୃଙ୍ଖଳା ସମ୍ପର୍କରେ ଆଲୋଚନା କରାଯିବ
ଶୃଙ୍ଖଳାର ସହ ପୂଜା ଶେଷ ହୋଇଛି। କେତୋଟି ମଣ୍ଡପ କର୍ମକର୍ତ୍ତା ଶୋଭାଯାତ୍ରାରେ ଭସାଣି କରିବା ପାଇଁ ବାହାରିଥିଲେ। ପୋଲିସ ଏହାକୁ ବନ୍ଦ କରି ଭଲ କରିଛି। ଆଗକୁ ହେବାକୁ ଥିବା ସେଣ୍ଟ୍ରାଲ ପୂଜା କମିଟି ବୈଠକରେ ଏହି ପ୍ରସଙ୍ଗ ଉଠିବ।
-ଦିଲୀପ ପ୍ରଧାନ, ସାଧାରଣ ସମ୍ପାଦକ, ସେଣ୍ଟ୍ରାଲ ପୂଜା କମିଟି