କଟକ ଅଫିସ, ୧୬ା୧୧: ଚଳିତବର୍ଷ ବାଲିଯାତ୍ରା ଅବସରରେ ଗିନିଜ୍ ଓ୍ବାଲ୍ଡ ରେକଡର୍ସରେ ସ୍ଥାନ ପାଇବା ପାଇଁ କଟକ ମହାନଗର ନିଗମ(ସିଏମ୍ସି) ପକ୍ଷରୁ ବାରବାଟି ଷ୍ଟାଡିୟମରେ ଡଙ୍ଗା ପ୍ରସ୍ତୁତି କାର୍ଯ୍ୟକ୍ରମ ମଙ୍ଗଳବାର ଅନୁଷ୍ଠିତ ହୋଇଥିଲା। ଏଥିରେ ସହରର ୨୨ଟି ସ୍କୁଲର ଛାତ୍ରୀଛାତ୍ରମାନେ ସାମିଲ ହୋଇ ଡଙ୍ଗା ପ୍ରସ୍ତୁତିରେ ଲାଗି ପଡିଥିଲେ। ହେଲେ ଏଠାରେ ଏତେ ସଂଖ୍ୟକ ଛାତ୍ରୀଛାତ୍ରଙ୍କୁ ନିୟନ୍ତ୍ରଣ କରିବାକୁ ସିଏମ୍ସି ପାଇଁ ଅସମ୍ଭବ ହୋଇଥିଲା। ସକାଳ ୬ରୁ ବିଭିନ୍ନ ସ୍କୁଲରୁ ପିଲାଙ୍କୁ ଷ୍ଟାଡିୟମ ଅଣାଯାଇଥିଲା। ସେଠାରେ ଟେଣ୍ଟ ବ୍ୟବସ୍ଥା କରାଯାଇ ନ ଥିଲା। ଫଳରେ ଦୀର୍ଘ ସମୟ ଧରି ପିଲାମାନେ ଖରାରେ ବସିବା କାରଣରୁ କେତେଜଣ ବେହୋସ ହୋଇପଡିଥିଲେ। ଏପରି କି ଜଣେ ଛାତ୍ର ଆଉ ଜଣଙ୍କୁ ବୋଡ଼ ଫୋପାଡିବାରୁ ତାଙ୍କ ମୁଣ୍ଡ ଫାଟି ଯାଇଥିଲା। ଏ ସମ୍ପର୍କରେ ଜଣେ ଶିକ୍ଷୟିତ୍ରୀ ପରିଚୟ ଗୋପନ ରଖି କହିଛନ୍ତି, ଏଭଳି କାର୍ଯ୍ୟକ୍ରମ ଆୟୋଜନ କରାଯାଇଥିଲେ ସୁଦ୍ଧା ସୁବ୍ୟବସ୍ଥା କରାଯାଇ ନ ଥିଲା। ସକାଳ ୬ରୁ ପିଲା ଆସିଥିଲେ। ଟିଫିନ ଓ ଜୁସ୍ ଦେଇ ଦୁଇ ପ୍ରହର ପର୍ଯ୍ୟନ୍ତ ପିଲାଙ୍କୁ ଖରାରେ ବସାଇବା ଜମା ଠିକ୍ ନୁହେଁ। ଅପରପକ୍ଷେ ଛାତ୍ର ଲବ ଗୋଇଙ୍କା କହିଛନ୍ତି, ପ୍ରଥମଥର ପାଇଁ ଏଭଳି କାର୍ଯ୍ୟକ୍ରମରେ ସାମିଲ ହୋଇଥିବାରୁ ବହୁତ ଖୁସି ଲାଗୁଚି। ମୁଁ ୧୩ଟା ଡଙ୍ଗା ତିଆରି କରିଛି। ସେହିପରି ଅନ୍ୟଜଣେ ଛାତ୍ର ରୋନକ ଶର୍ମା କହିଛନ୍ତି, ମୁଁ ୧୫ଟା ଡଙ୍ଗା ତିଆରି କରିଛି। ସକାଳୁ ଆସି ଏଠାରେ ଥିଲୁ। ଖରାରେ ବସି ଡଙ୍ଗା ତିଆରି କରିଲୁ। ହେଲେ ଏହା ଗିନିଜ୍ ଓ୍ବାଲ୍ଡ ରେକଡର୍ସରେ ସ୍ଥାନ ପାଇବା ପରେ ସବୁ କ୍ଲାନ୍ତି ଦୂର ହୋଇଗଲା।
କର୍ପୋରେଟର ଅସନ୍ତୁଷ୍ଟ
କଟକ ମହାନଗର ନିଗମ(ସିଏମ୍ସି) ପକ୍ଷରୁ କାଗଜ ଡଙ୍ଗା ତିଆରି କାର୍ଯ୍ୟକ୍ରମ ଆୟୋଜିତ ହୋଇଥିଲା। ହେଲେ ଏଥିରେ କର୍ପୋରେଟରମାନଙ୍କୁ ସାମିଲ କରାଯାଇ ନ ଥିବାରୁ ସେମାନେ ଅସନ୍ତୋଷ ବ୍ୟକ୍ତ କରିଛନ୍ତି। ଗିନିଜ୍ ଓ୍ବାଲ୍ଡ ରେକଡର୍ସ ପାଇଁ ସିଏମ୍ସି ପକ୍ଷରୁ ଟଙ୍କା ଖର୍ଚ୍ଚ କରାଯାଉଛି। ଡଙ୍ଗା ପ୍ରସ୍ତୁତି କର୍ପୋରେଟରମାନଙ୍କୁ ପୂର୍ବରୁ ତାଲିମ ଦିଆଯାଇଥିଲା। ହେଲେ ବିଡମ୍ବନାର ବିଷୟ ଉକ୍ତ କାର୍ଯ୍ୟକ୍ରମରେ ସେମାନଙ୍କୁ ସାମିଲ କରାଗଲା ନାହିଁ।