ଚେନ୍ନାଇ, ୬।୯: କରୋନା ମହାମାରୀ ସମୟରେ ଲୋକେ ସରକାରଙ୍କ ପକ୍ଷରୁ ଜାରି ହୋଇଥିବା ମାର୍ଗଦର୍ଶିକା ପାଳନ ନ କରି ଡିସ୍କାଉଣ୍ଟ୍ ସେଲ୍ରେ କମ୍ ଦାମରେ ଜିନିଷ କିଣିବା ଲାଗି ଲମ୍ବା ଲାଇନ ଲଗାଇଥିବାର ଦୃଶ୍ୟ ଏବେ ସୋସିଆଲ୍ ମିଡ଼ଆରେ ଭାଇରାଲ ହେବାରେ ଲାଗିଛି। ତାମିଲନାଡୁର ଗ୍ରେଟର ଚେନ୍ନାଇର ରୋୟାପେଟ୍ଟା ଅଞ୍ଚଳର ଡ.ବେସେଣ୍ଟ ରୋଡ୍ଠାରେ ଥିବା ଏକ ପୋଷାକ ଦୋକାନରେ ଡିସ୍କାଉଣ୍ଟ୍ ସେଲ୍ ଆରମ୍ଭ ହୋଇଥିଲା। ୯୯୯ ଟଙ୍କାରେ ୯ଟି ଶର୍ଟ, ୯ ଟଙ୍କାରେ ଟି-ଶର୍ଟ ଆଦ ବିକ୍ରି ହେଉଥିଲା। ଖବର ପାଇ ଲୋକେ ବିନା ମାସ୍କରେ ସାମାଜିକ ଦୂରତାକୁ ଭୁଲି ଦୋକାନ ସମ୍ମୁଖରେ ଭିଡ଼ ଜମାଇଥିଲେ। ଏହାର ଏକ ଭିଡ଼ିଓ ସୋସିଆଲ୍ ମିଡ଼ିଆରେ ଅପଲୋଡ୍ କରାଯାଇଥିଲା। ଭିଡ଼ିଓ ଘଣ୍ଟାକ ମଧ୍ୟରେ ଭାଇରାଲ ହେବାରେ ଲାଗିଥିଲା। ଘଟଣା ସମ୍ପର୍କରେ ପୋଲିସ ପାଖରେ ଖବର ପହଞ୍ଚିଥିଲା। ପୋଲିସ ଟିମ୍ ଦୋକାନକୁ ସିଲ୍ କରିବା ସହିତ ଭିଡ଼ ଜମାଇଥିବା ଲୋକଙ୍କୁ ସେଠାରୁ ଘଉଡ଼ାଇ ଦେଇଥିଲେ। ଦୋକାନ ମାଲିକଙ୍କୁ ନୋଟିସ୍ ଜାରି କରାଯାଇଥିବା ଗ୍ରେଟର ଚେନ୍ନାଇ କର୍ପୋରେଶନ ପକ୍ଷରୁ ସୂଚନା ଦିଆଯାଇଛି।