ଭୁବନେଶ୍ୱର,୧୫।୮(ବ୍ୟୁରୋ): ସମ୍ପ୍ରତି ମହାନଦୀର ଉପର ମୁଣ୍ଡରେ ପ୍ରବଳ ବର୍ଷା ଯୋଗୁ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଛତିଶଗଡ଼ରେ ୪/୫ ଟି ଜିଲା ଜଳାର୍ଣ୍ଣବ ହେବା ସହ ଜନଜୀବନ ଗଭୀର ଭାବରେ ପ୍ରଭାବିତ ହୋଇଛି। ସେହିଭଳି ଓଡ଼ିଶାରେ ମଧ୍ୟ ବନ୍ୟା ଆସିଛି। ତେଣୁ ମହାନଦୀର ଜଳ ପରିଚାଳନା ପାଇଁ ଓଡ଼ିଶା ଓ ଛତିଶଗଡ଼ ମଧ୍ୟରେ ମୁଖ୍ୟମନ୍ତ୍ରୀ ସ୍ତରୀୟ ଆଲୋଚନା ହେବା ଜରୁରୀ ବୋଲି ମହାନଦୀ ବଞ୍ଚାଅ ଆନ୍ଦୋଳନ ମତ ପ୍ରକାଶ କରିଛି।
ଆନ୍ଦୋଳନର ଆବାହକ ସୁଦର୍ଶନ ଦାସ କହିଛନ୍ତି, ନିଜର ବନ୍ୟା ପରିସ୍ଥିତିକୁ ମୁକାବିଲା କରିବା ପାଇଁ ଛତିଶଗଡ଼ ମହାନଦୀରେ ନିର୍ମାଣ କରିଥିବା ୬ଟି ବ୍ୟାରେଜର ଗଚ୍ଛିତ ଜଳ ନିଷ୍କାସନ ପାଇଁ ସବୁ ବ୍ୟାରେଜର ସମସ୍ତ ଗେଟ ଖୋଲି ଦେଇପାରେ। ସେହି କାରଣରୁ ଅବା ହୀରାକୁଦର ଠେଶା ପାଣିରୁ ତ୍ରାହି ପାଇବା ପାଇଁ ଛତିଶଗଡ଼ ଜଳ ସମ୍ପଦ ବିଭାଗର ମୁଖ୍ୟ ଯନ୍ତ୍ରୀ ଓଡ଼ିଶାର ମୁଖ୍ୟ ଯନ୍ତ୍ରୀଙ୍କୁ ହୀରାକୁଦର ଅଧିକ ଗେଟ ଖୋଲିବା ପାଇଁ ଅନୁରୋଧ କରିଛନ୍ତି। ଯଦି ବର୍ତ୍ତମାନ ପରି ଆଉ କିଛିଦିନ ଧରି ଲଗାଣ ବର୍ଷା ଉପର ମୁଣ୍ଡରେ ଲାଗିରହେ ଏବଂ ଛତିଶଗଡ଼ ମହାନଦୀ ଉପରେ ଥିବା ସବୁ ବ୍ୟାରେଜ ଗେଟ ଖୋଲି ଦିଅନ୍ତି, ତେବେ ହୀରାକୁଦ ସହିତ ଓଡ଼ିଶାରେ ଗମ୍ଭୀର ପରିସ୍ଥିତି ସୃଷ୍ଟି କରିବ। ଗତ ମେ’ରେ କଲମା ବ୍ୟାରେଜଠାରେ ମହାନଦୀର ଓଡ଼ିଶା ପଟରେ ମରୁଭୂମି ପରି ଦୃଶ୍ୟ ଦେଖିଲା ପରେ ବ୍ୟାରେଜର ସର୍ବନିମ୍ନ ୫ଟି ଗେଟ୍ ଖୋଲିବା ପାଇଁ ଛତିଶଗଡ଼ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରାଯାଇଥିଲା। ସେତେବେଳେ ଛତିଶଗଡ଼ ସେ କଥା ଶୁଣିଲା ନାହିଁ। ଆଜି କିନ୍ତୁ ଛତିଶଗଡ଼ ହୀରାକୁଦର ଗେଟ ଖୋଲିବାକୁ ନିବେଦନ କରୁଛି। ଖରାଦିନେ କଲମା ବ୍ୟାରେଜର ଗେଟ ଖୋଲିବା ପାଇଁ ଓଡ଼ିଶାର ବ୍ୟାକୁଳତା ଓ ବର୍ଷା ଦିନେ ହୀରାକୁଦର ଗେଟ ଖୋଲିବା ପାଇଁ ଛତିଶଗଡ଼ର ବ୍ୟାକୁଳତା, ମହାନଦୀକୁ ଉଭୟ ରାଜ୍ୟ ବ୍ୟାପକ ଓ ସାମଗ୍ରିକ ଭାବେ ନ ଦେଖିବାର ଫଳ ବୋଲି ସୁଦର୍ଶନ କହିଛନ୍ତି। ତେଣୁ ମହାନଦୀରେ ସମ୍ଭାବ୍ୟ ବନ୍ୟା ପରିସ୍ଥିତିର ସୁଧାର ପାଇଁ ତୁରନ୍ତ ଦୁଇ ରାଜ୍ୟର ମୁଖ୍ୟମନ୍ତ୍ରୀ କଥା ହୁଅନ୍ତୁ ବୋଲି ସୁଦର୍ଶନ କହିଛନ୍ତି।
ସେପଟେ ବନ୍ୟା ପରିଚାଳନା ପାଇଁ ଓଡ଼ିଶା ସରକାରଙ୍କ ଅନୁରୋଧ ସତ୍ତ୍ୱେ ବି ଛତିଶଗଡ଼ ସରକାର ଅଲୋଚନାକୁ ଆସୁନାହାନ୍ତି ବୋଲି ଓଡ଼ିଶା ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ବିଜୟ କୁମାର ମିଶ୍ର କହିଛନ୍ତି। ସେ କହିଛନ୍ତି, ଗତ ୨/୩ ବର୍ଷ ହେଲା କୋଭିଡ୍ ପାଇଁ ଉଭୟ ଓଡ଼ିଶା ଓ ଛତିଶଗଡ଼ ମଧ୍ୟରେ ସମନ୍ବୟ ବୈଠକ ହୋଇପାରି ନ ଥିଲା। ଚଳିତ ବର୍ଷ ଆମେ ଆଲୋଚନା ପାଇଁ ଛତିଶଗଡ଼ ସରକାରଙ୍କୁ ଡାକିଥିଲୁ। କିନ୍ତୁ ସେମାନେ ଆଲୋଚନା କରିବାକୁ ପ୍ରତିଶ୍ରୁତି ଦେଇଥିଲେ ମଧ୍ୟ ଶେଷ ମୁହୂର୍ତ୍ତରେ ଆସି ନ ଥିଲେ। ବର୍ଷା ଜଳ ସମ୍ବନ୍ଧୀୟ କୌଣସି ତଥ୍ୟ ସେମାନେ ଅବଗତ କରୁନାହାନ୍ତି। ଉପରମୁଣ୍ଡରେ ରହୁଥିବା ଆମ ଲୋକଙ୍କ ତଥ୍ୟ ଅନୁସାରେ କେତେ ଜଳ ନିଷ୍କାସନ ହେବ ଆମେ ତାହା ନିର୍ଦ୍ଧାରଣ କରୁଛୁ ବୋଲି ମିଶ୍ର କହିଛନ୍ତି।