ଛତ୍ରପୁର,୧୮ା୨(ଡି.ଏନ୍.ଏ.): ଛତ୍ରପୁର ଉପକଣ୍ଠ କାଳିପଲ୍ଳୀ ନିକଟରେ ଟାଟା ଏସ୍ଇଜେଡ୍ରେ ସ୍ମାର୍ଟକେମ୍ ଟେକ୍ନୋଲଜିର ଆମୋନିୟମ ନାଇଟ୍ରେଟ୍ କମ୍ପାନୀକୁ ସ୍ଥାନୀୟ ଲୋକଙ୍କ ବିରୋଧ ଜାରି ରହିଛି। ଅନ୍ୟପକ୍ଷରେ ଗତ ବୁଧବାର ଟାଟା ପ୍ରକଳ୍ପର ପାଚେରି ନିର୍ମାଣକୁ ବିରୋଧ କରିଥିବାରୁ ପୋଲିସ ୧୫ଜଣଙ୍କୁ କୋର୍ଟ ଚାଲାଣ କରିଥିଲା। ଶୁକ୍ରବାର ଜିଲାପାଳଙ୍କ ସମ୍ମିଳନୀ କକ୍ଷରେ ଜିଲାପାଳ ଦିବ୍ୟଜ୍ୟୋତି ପରିଡା କାଳିପଲ୍ଲୀ ଗାଁ କମିଟିର ଏକ ପ୍ରତିନିଧି ଦଳ ସହ ଆଲୋଚନା ବୈଠକ କରିଛନ୍ତି। ଡିନୋଟିଫିକେସନ କାମ ଆରମ୍ଭ ହୋଇ ହିତାଧିକାରୀଙ୍କ ସର୍ଭେ କାମ ଆରମ୍ଭ ହେବ । ଏଥିରେ ସହଯୋଗ କରିବାକୁ ଜିଲାପାଳ ପରାମର୍ଶ ଦେଇଥିଲେ। ମହାରାଷ୍ଟ୍ରରେ କମ୍ପାନୀର ଥିବା ଆମୋନିୟନ ନାଇଟ୍ରେଟ୍ ପ୍ରକଳ୍ପ ସ୍ଥଳକୁ ସ୍ଥାନୀୟ ଲୋକଙ୍କୁ ନେବାକୁ ପ୍ରସ୍ତାବ ଦିଆଯାଇଥିଲା। ୫୦ଜଣଙ୍କୁ ନେବାକୁ ଗାଁ କମିଟି ପକ୍ଷରୁ କୁହାଯାଇଥିବା ବେଳେ ୨୦ ଜଣଙ୍କୁ ନେବାକୁ ପ୍ରଶାସନ ରାଜି ହୋଇଛିା ଟାଟାର ପାଚେରି ମଧ୍ୟରେ କେତେକଙ୍କ ଜମି ଅଛି, ସେମାନଙ୍କୁ କ୍ଷତିପୂରଣ ଦେବାକୁ ଜିଲାପାଳଙ୍କୁ ଅନୁରୋଧ କରାଯାଇଥିଲାା ଏଥିସହ ଗିରଫମାନଙ୍କୁ ଜେଲରୁ ମୁକୁଳିବା ବ୍ୟବସ୍ଥା କରିବାକୁ ମଧ୍ୟ ଅନୁରୋଧ କରାଯାଇଥିଲା। ସ୍ଥାନୀୟ ଲୋକଙ୍କ ଉପସ୍ଥିତିରେ ପାଚେରୀ ନିର୍ମାଣ ଏବଂ ଏଥିରେ କାମ ଯୋଗାଇବାକୁ ଗାଁ କମିଟି ପକ୍ଷରୁ ଜିଲାପାଳଙ୍କୁ ପ୍ରସ୍ତାବ ଦିଆଯାଇଥିଲା। ଏସବୁ ଉପରେ ବିଚାର ହେବ ବୋଲି ଜିଲାପାଳ କହିଥିବା ଗାଁ କମିଟି ସୂଚନା ଦେଇଛି। ତେବେ ମହାରାଷ୍ଟ୍ର ଯାଇ ଫେରିବା ପର୍ଯ୍ୟନ୍ତ ସ୍ମାର୍ଟକେମ୍ ଟେକ୍ନୋଲଜିର ଆମୋନିୟମ ନାଇଟ୍ରେଟ କମ୍ପାନୀ ପ୍ରତିଷ୍ଠାକୁ ବିରୋଧ ଜାରି ରହିବ ବୋଲି ଗାଁ କମିଟି କହିଛିା ସେପଟେ ଗିରଫମାନଙ୍କ ଲାଗି ହୋଇଥିବା ଜାମିନ ଆବେଦନକୁ ସ୍ଥାନୀୟ ଏସଡିଜେମ୍ କୋର୍ଟରେ ଖାରଜ ହୋଇଛି। ଏଡିଜେ କୋର୍ଟରେ ଜାମିନ ଆବେଦନ ହୋଇଥିବା ଗାଁ କମିଟି ସଭାପତି ବି.ମୋହନ
ପାତ୍ର ସୂଚନା ଦେଇଛନ୍ତି।