ପୁରୀ ଅଫିସ, ୧୪ା୧୦: ଶ୍ରୀମନ୍ଦିର ଭିତରକାଠ ଆଗକୁ ଯିବା ପାଇଁ ପ୍ର୍ରତ୍ୟେକ ବ୍ୟକ୍ତିଙ୍କୁ ପାରମ୍ପରିକ ବେଶପୋଷାକ ପରିଧାନ କରିବାକୁ ପଡ଼ିବ। ସେବାୟତ, ଶ୍ରୀମନ୍ଦିର କର୍ମଚାରୀ କିମ୍ବା ଶ୍ରଦ୍ଧାଳୁ ସମସ୍ତଙ୍କୁ ପାରମ୍ପରିକ ଡ୍ରେସ୍କୋର୍ଡ ଅର୍ଥାତ୍ ମଠା ଓ ପାଟ ପିନ୍ଧି ଭିତରକାଠ ଆଗକୁ ଯିବାକୁ ହେବ। ଗତ ୧୧ ତାରିଖରେ ଅନୁଷ୍ଠିତ ଛତିଶା ନିଯୋଗ ବୈଠକ ପରେ ଏ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷନ କୁମାର ସୂଚନା ଦେଇଥିଲେ। ଏବେ ଏହି ଡ୍ରେସ୍ କୋର୍ଡକୁ ନେଇ ଚର୍ଚ୍ଚା ଜୋର ଧରିଛି। କେତେଜଣ ଏହାକୁ ସ୍ବାଗତ କରୁଥିବାବେଳେ ଅନ୍ୟ କେତେଜଣ ଏଭଳି ନିୟମ ଶ୍ରଦ୍ଧାଳୁଙ୍କ ଉପରେ ଲଦି ଦେବା ଠିକ୍ ନୁହେଁ ବୋଲି ମତ ପ୍ରକାଶ କରିଛନ୍ତି। ଅନ୍ୟପକ୍ଷରେ ସେବାୟତଙ୍କ କ୍ଷେତ୍ରରେ ଡ୍ରେସ୍ କୋର୍ଡ ବା ପାରମ୍ପରିକ ବେଶ ପୋଷାକ ପରିଧାନ ବ୍ୟବସ୍ଥା ପୂର୍ବରୁ ଥିଲା ଏବଂ ଏବେ ବି ତାହା ବଳବତ୍ତର ରହିଛି ବୋଲି ଜଣାପଡ଼ିଛି। ବାସ୍ତବରେ ଦେଖିବାକୁ ଗଲେ, ଶ୍ରୀମନ୍ଦିର ଭିତରକାଠ ଆଗକୁ ସମସ୍ତ ବ୍ୟକ୍ତି ପାରମ୍ପରିକ ବେଶ ପୋଷାକରେ ଯାଉଥିଲେ। ସେବାୟତମାନେ ପାରମ୍ପରିକ ପୋଷାକ ପରିଧାନ କରୁଥିବାବେଳେ ଅନ୍ୟ ବ୍ୟକ୍ତିମାନେ ଏବେ ମଧ୍ୟ ପାରମ୍ପରିକ ପୋଷାକ ପିନ୍ଧୁଛନ୍ତି। ଏଣୁ ପ୍ରଶାସନ ଡ୍ରେସ୍ କୋର୍ଡ ଲାଗୁ ଆଳରେ ବ୍ୟବସ୍ଥାରେ ସେଭଳି କୌଣସି ଉଲ୍ଲେଖନୀୟ ପଦକ୍ଷେପ ନେଇ ନ ଥିବା ସାଧାରଣରେ ଆଲୋଚନା ହେଉଛି। ତେବେ ପ୍ରଶାସନ ଭକ୍ତଙ୍କ କ୍ଷେତ୍ରରେ ଡ୍ରେସ କୋର୍ଡ ନେଇ ଆଗାମୀ ଦିନରେ ପୁଣି କିଛି ନିଷ୍ପତ୍ତି ନେବ ବୋଲି ସୂଚନା ଦେଇସାରିଥିବା ବେଳେ ଏହା ବାଧ୍ୟତାମୂଳକ ହେବା ନେଇ କଳ୍ପନାଜଳ୍ପନା ଲାଗି ରହିଛି। ଅନ୍ୟପକ୍ଷରେ ଏ ନେଇ ଭକ୍ତଙ୍କ ମଧ୍ୟରେ ମିଶ୍ର ପ୍ରତିକ୍ରିୟା ପ୍ରକାଶ ପାଇଛି।