ନୂଆଦିଲ୍ଲୀ, ୨୪।୮ : ଦେଶର ସର୍ବ ପୁରାତନ ଦଳ କଂଗ୍ରେସ ଏକ ବଡ ପରିବର୍ତ୍ତନ ଆଡ଼କୁ ଅଗ୍ରସର ହେଉଛି। ଦଶନ୍ଧି ପରେ ସେ ଜଣେ ଅଣ-ଗାନ୍ଧୀ ପରିବାର ସଦସ୍ୟଙ୍କୁ ଅଧ୍ୟକ୍ଷ ଭାବରେ ଚୟନ କରିବାର ସମ୍ଭାବନା ସୃଷ୍ଟି ହୋଇଛି। ଗଣମାଧ୍ୟମ ରିପୋର୍ଟ ଅନୁଯାୟୀ, କଂଗ୍ରେସର ବର୍ତ୍ତମାନର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷା ସୋନିଆ ଗାନ୍ଧୀ ରାଜସ୍ଥାନ ମୁଖ୍ୟମନ୍ତ୍ରୀ ତଥା ବରିଷ୍ଠ ନେତା ଅଶୋକ ଗେହଲଟଙ୍କୁ ଏହି ପଦ ପାଇଁ ପ୍ରସ୍ତାବ ଦେଇଛନ୍ତି।
ତେବେ ରାହୁଲ ଗାନ୍ଧୀଙ୍କୁ ଅଧ୍ୟକ୍ଷ କରାଯିବା ଉଚିତ ବୋଲି ଗେହଲଟ ପୂର୍ବରୁ ବହୁ ଥର କହିଛନ୍ତି। ନିକଟରେ ସେ ଏହା ମଧ୍ୟ କହିଛନ୍ତି ଯେ ଯଦି ରାହୁଲ ଅଧ୍ୟକ୍ଷ ନ ହୁଅନ୍ତି ତେବେ ଦଳରେ କର୍ମୀମାନେ ନିରାଶ ହେବେ। ଫଳରେ ସେମାନେ ଆଉ ଦଳ ପାଇଁ କାମ ନ କରି ଘରେ ବସିବେ। ଏହା ଦ୍ୱାରା ଦଳର କ୍ଷତି ହେବ।
ସେପ୍ଟେମ୍ବର ୨୧ ସୁଦ୍ଧା ନୂତନ କଂଗ୍ରେସ ଅଧ୍ୟକ୍ଷଙ୍କ ନିର୍ବାଚନ ଅନୁଷ୍ଠିତ ହେବ। ଦଳ ଖୁବ ଶୀଘ୍ର ଏହାର ବିସ୍ତୃତ କାର୍ଯ୍ୟକ୍ରମ ପ୍ରକାଶ କରିବାକୁ ଯାଉଛି। ଏହି ସମୟରେ ଏକ ଗଣମାଧ୍ୟମ ରିପୋର୍ଟରେ ଦର୍ଶାଯାଇଛି ଯେ ସୋନିଆ ଗାନ୍ଧୀ ମଙ୍ଗଳବାର ତାଙ୍କ ବାସଭବନରେ ରାଜସ୍ଥାନ ମୁଖ୍ୟମନ୍ତ୍ରୀ ଗେହଲୋଟଙ୍କୁ ଭେଟିଛନ୍ତି। ସେ ଗେହଲଟଙ୍କୁ ଦଳର ଦାୟିତ୍ୱ ଗ୍ରହଣ କରିବାକୁ ଅନୁରୋଧ କରିଥିଲେ। ସୋନିଆ ଗେହଲଟଙ୍କୁ କହିଛନ୍ତି ଯେ ଅସୁସ୍ଥତା କାରଣରୁ ସେ ଦଳର ଦାୟିତ୍ୱ ତୁଲାଇ ପାରିବେ ନାହିଁ। ଅଧ୍ୟକ୍ଷ ପଦ ପାଇଁ ରାହୁଲ ସର୍ବସମ୍ମତ ପସନ୍ଦ ବୋଲି ଗେହଲଟ ଦୋହରାଇଛନ୍ତି।
ସୋନିଆଙ୍କୁ ଭେଟିବା ପରେ ଅହମ୍ମଦାବାଦ ଅଭିମୁଖେ ଯାଉଥିବା ବେଳେ ଗେହଲଟ ଦିଲ୍ଲୀ ବିମାନବନ୍ଦରରେ କହିଛନ୍ତି ଯେ ରାହୁଲ ଅଧ୍ୟକ୍ଷ ହେବା ପରେ ହିଁ ଦଳ ପୁନଃନିର୍ମାଣ ହୋଇପାରିବ। ରାହୁଲଙ୍କ ଉପରେ ଦଳର ଅଧ୍ୟକ୍ଷ ଦାୟିତ୍ୱ ଗ୍ରହଣ କରିବାକୁ ଆମେ ନିରନ୍ତର ଚାପ ପକାଇବୁ। ଅପରପକ୍ଷରେ ବରିଷ୍ଠ କଂଗ୍ରେସ ନେତା ଦିଗବିଜୟ ସିଂ କହିଛନ୍ତି ଯେ ଯଦି ରାହୁଲ କଂଗ୍ରେସ ସଭାପତି ନହେବାକୁ ଜିଦ ଧରିଛନ୍ତି, ତେବେ ତାଙ୍କୁ କେହି ବାଧ୍ୟ କରିପାରିବେ ନାହିଁ। ଗେହଲଟକୁ ସୋନିଆ ଗାନ୍ଧୀଙ୍କ ଅଫରର ଦୁଇଟି ଅର୍ଥ ଥାଇପାରେ ବୋଲି ରାଜନୈତିକସ୍ତରରେ ଚର୍ଚ୍ଚା ହେଉଛି।
ପ୍ରଥମଟି ହେଉଛି ରାଜସ୍ଥାନରେ ଦଳର ଅସନ୍ତୋଷକୁ ଦମନ କରିବା ପାଇଁ ଗେହଲଟଙ୍କୁ ଦଳର ଅଧ୍ୟକ୍ଷ ପଦ ଦିଆଯାଇପାରେ। ଦ୍ୱିତୀୟଟି ହେଉଛି ସଚିନ ପାଇଲଟଙ୍କୁ ମୁଖ୍ୟମନ୍ତ୍ରୀ ପଦବୀ ପ୍ରଦାନ କରି ତାଙ୍କୁ ରାଜସ୍ଥାନର ନିର୍ବାଚନରେ ନୂଆ ଚେହେରା ଦିଆଯାଇ ପାରିବ। ଏହିପରି ଭାବରେ ଦଳ ରାଜସ୍ଥାନକୁ ମଧ୍ୟ ଟାର୍ଗେଟ କରିବ ଏବଂ ଜାତୀୟ ସ୍ତରରେ ଗାନ୍ଧୀ ପରିବାରର ସଦସ୍ୟ ନଥିବା ଅଧ୍ୟକ୍ଷ କରି କଂଗ୍ରେସରେ ଏକ ବଡ ପରିବର୍ତ୍ତନର ଆରମ୍ଭ କରିପାରିବ ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।