କୋକସରା, ୧୧।୧୦(ଡି.ଏନ.ଏ.)
କଳାହାଣ୍ଡି ଜିଲା କୋକସରା ବ୍ଲକର ୨୨ପଞ୍ଚାୟତ ମଧ୍ୟରେ ଅଧିକାଂଶ ପଞ୍ଚାୟତ ଅଣଜଳସେଚିତ। ଚାଷୀ କେବଳ ବର୍ଷା ପାଣି ଭରସାରେ ଚାଷ କରିଥାନ୍ତି। ଚଳିତବର୍ଷ ସ୍ବଭାବିକ ବର୍ଷା ଯୋଗୁଁ ବ୍ଲକ ଅଞ୍ଚଳରେ ଚାଷ ଭଲ ହୋଇଥିଲା। ଏବେ ଧାନ ଅମଳ ବେଳକୁ ରୋଗପୋକର ଉପଦ୍ରବ ଦେଖାଦେଇଛି । ମାଟିଆଗୁଣ୍ଡ ପୋକ ହେକ୍ଟର ହେକ୍ଟର ଚାଷ ଜମିରେ ଚରି ଯାଉଛନ୍ତି। କୀଟନାଶକ ପ୍ରୟୋଗ କଲେ ମଧ୍ୟ କାଟୁ କରୁନାହିଁ। କୃଷି ବିଭାଗ କୀଟନାଶକ ଯୋଗାଣ କରୁ ନଥିବା ଚାଷୀମାନେ ଅଭିଯୋଗ କରିଛନ୍ତ। ଏଭଳି ସ୍ଥିତିରେ ଧାରକରଜ କରି ଫସଲ ଉଠିଆ କରିଥିବା ଚାଷୀ କଣ କରିବ ଚିନ୍ତାରେ ପଡି ଯାଇଛନ୍ତି। ଅନ୍ୟପକ୍ଷେ ୧୦୦୧ ଧାନ ଅମଳକ୍ଷମ ଅବସ୍ଥାରେ ରହିଥିବା ବେଳେ ଧାନ କେଣ୍ଡାଗୁଡିକ ବାହାରିବା ପୂର୍ବରୁ ଅଗାଡି ହୋଇଯାଉଛି। କୃଷି ବିଭାଗର ମିଳିଥିବା ସୂଚନା ଅନୁସାରେ ବ୍ଲକର ମାଟିଆଗୁଣ୍ଡି ପୋକ ୨୩୬ ହେକ୍ଟର ଚାଷଜମିକୁ ପ୍ରଭାବିତ କରିଛି। ସେହିଭଳି ପତ୍ରା ପୋଡା ରୋଗ ୮୭୭ ହେକ୍ଟର, ଗଣ୍ଠିପୋକ ୫୫୨ ହେକ୍ଟର, ମହିଷା ୪୦ ହେକ୍ଟର ଓ ବେକ୍ଟୋରିଆ ଜନିତ ପତ୍ରପୋଡା ୪୮୪ ହେକ୍ଟର ଜମିର ଫସଲକୁ ପ୍ରାଭାବିତ କରିଥିବା ଜଣାପଡିଛି । ଏ ନେଇ କୋକସରା ଗୋଷ୍ଠୀ କୃଷି ଅଧିକାରୀ ସୁବ୍ରତ ପାଢୀଙ୍କୁ ପଚାରିବାରୁ ଫସଲରେ ଲାଗୁଥିବା ରୋଗପୋକର ପ୍ରତିକାର ଅଛି। ଚାଷୀ ଠିକ୍ ସମୟରେ କୀଟନାଶକ ପ୍ରୟୋଗ କରୁ ନ ଥିବା ଯୋଗୁଁ କିଛି ହେକ୍ଟରରେ ଜମିରେ ମାଟିଆଗୁଣ୍ଡ ପୋକ ଦେଖାଦେଇଛି। ୧୦୦୧ ଧାନରେ ପଟାସ ସାର ମାତ୍ରା କମ ରହିଲେ ଅଗାଡି ହୁଏ ବୋଲି ସେ କହିଛନ୍ତି ।