ମୁମ୍ବାଇ,୨୯।୪: ସଲମାନ ଖଁ।ଙ୍କ ଅପ୍ କମିଂ ଫିଲ୍ମ ଭାରତର ‘ସ୍ଲୋ ମୋଶନ’ ଗୀତକୁ ନେଇ ବିବାଦ ଦେଖାଦେଇଛି। ଏହି ଗୀତରେ ଦବଙ୍ଗ ସଲମାନଙ୍କ ସହ ଦିଶା ପଟାନୀ ନଜର ଆସିଥିବା ବେଳେ ତାଙ୍କର ଶାଢ଼ୀର ଲୁକ୍କୁ ନେଇ ବିବାଦ ଦେଖାଦେଇଛି। ଆଓ୍ବାର୍ଡ ବିଜେତା ଟେକ୍ସଟାଇଲ ଡିଜାଇନର ଗୌରାଙ୍ଗ ଶାହ ମଧ୍ୟ ଏହି ଲୁକ୍କୁ ନେଇ ପ୍ରଶ୍ନ ଉଠାଇଛନ୍ତି। କୌଣସି ଜିନିଷକୁ ନୂଆ ଢ଼ଙ୍ଗରେ ଉପସ୍ଥାପନ କରିବାର ଏକ ବିକଳ୍ପ ଥାଏ, ହେଲେ ଏହାକୁ ବିକୃତ କରିବା ଆଦୌ ଉଚିତ୍ ନୁହଁ। ଶାଢ଼ୀ ପରିଧାନ ବହୁ ପିଢ଼ୀରୁ ଚାଲିଆସିଥିବା ବେଳେ ଏହା ଆମର ସଂସ୍କୃତି ଓ ସଭ୍ୟତାକୁ ସୂଚାଇଥାଏ। ହେଲେ ଶାଢ଼ୀକୁ ଏଭଳି ଢ଼ଙ୍ଗରେ ଉପସ୍ଥାପନ କରିବା ଏହାର ବିଶେଷତ୍ୱକୁ ହ୍ରାସ କରୁଛି ବୋଲି ଡିଜାଇନର ଗୌରାଙ୍ଗ କହିଛନ୍ତି। ଅପରପକ୍ଷରେ ଡିଜାଇନର ବରିଜା ବଜାଜ କହିଛନ୍ତି, ଖରାପ ଶୈଳୀରେ କରାଯାଇଥିବା ଡିଜାଇନ କେବଳ ଏହାର ଲୁକ୍କୁ ଖରାପ କରେ ନାହିଁ ବରଂ ଶାଢ଼ୀରେ ଥିବା ନାରୀତ୍ୱର ତତ୍ତ୍ୱକୁ ମଧ୍ୟ ଶେଷ କରିଛି ବୋଲି ସେ କହିଛନ୍ତି। ଏଭଳି ଭାବରେ ବହୁ ଡିଜାଇନର ନିଜର ମତ ରଖିଥିବା ବେଳେ ସୋସିଆଲ ମିଡିଆରେ ଦିଶାଙ୍କୁ ଟ୍ରଲ ମଧ୍ୟ କରାଯାଇଛି। ଅପରପକ୍ଷରେ ୟୁଟ୍ୟୁବରେ ସଲମାନଙ୍କ ଏହି ଗୀତକୁ ୨୪ ଘଣ୍ଟା ଭିତରେ ୨କୋଟିରୁ ଊର୍ଦ୍ଧ୍ୱ ଲୋକ ଦେଖିସାରିଲେଣି। ଏହି ଗୀତରେ ସଲମାନ ଦିଶାଙ୍କ ସହ ଡାନ୍ସ କରୁଥିବା ବେଳେ ଦିଶାଙ୍କୁ ଏକ ହଳଦିଆ ରଙ୍ଗର ଶାଢ଼ୀରେ ଦେଖିବାକୁ ମିଳିଛି। ବିଶାଲ-ଶେଖର ଏହି ଗୀତର ସଂଯୋଜନା କରିଥିବା ବେଳେ ଶ୍ରେୟା ଘୋଷାଲ ଓ ନକାଶ ଅଜୀଜ କଣ୍ଠଦାନ କରିଛନ୍ତି।