କୋରାପୁଟ,୧୭ା୭(ଅମିତାଭ ବେହେରା): ନବରଙ୍ଗପୁର ଏମ୍ପି ବଳଭଦ୍ର ମାଝୀ କୋରାପୁଟ ଜିଲାରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଚାଲିଥିବା ବିଭିନ୍ନ ଯୋଜନାର ମଙ୍ଗଳବାର ସମୀକ୍ଷା କରିଛନ୍ତି।
ସଦ୍ଭାବନା ସଭାଗୃହରେ ଆୟୋଜିତ ସମୀକ୍ଷା ବୈଠକରେ ଅଧ୍ୟକ୍ଷତାକରି ଏମ୍ପି ମାଝୀ ବିଭିନ୍ନ ଉନ୍ନୟନମୂଳକ କାର୍ଯ୍ୟ ସମ୍ପୂର୍ଣ୍ଣ ନେଇ ଗୁରୁତ୍ୱାରୋପ କରିଥିଲେ। କାର୍ଯ୍ୟରେ ଅବହେଳା କଲେ ସିଧା ଚାକିରିରୁ ବିଦା କରାଯିବ ବୋଲି ଅଧିକାରୀମାନଙ୍କ ଉଦ୍ଦେଶ୍ୟରେ କହିଥିଲେ। ସେ କହିଲେ, ଏବେ କାମ ନ କଲେ କିମ୍ବା କାର୍ଯ୍ୟରେ ଅବହେଳାକଲେ ଆଉ ବରାଦାସ୍ତ କରାଯିବ ନାହିଁ। କୋଲାବ ଜଳ ଭଣ୍ଡାର ମରାମତି ଓ କେନାଲ ଖନନ, ଜଳଭଣ୍ଡାର ପାର୍ଶ୍ୱରେ ଅଧିକରୁ ଅଧିକ ଗଛ ଲଗାଇବା, ଚାଷୀଙ୍କ ପାଇଁ ଜଳସେଚନ ସୁବିଧା ପାଇଁ ଆସିଥିବା ୫ ଶହ କୋଟି ଟଙ୍କା ଏଯାବତ୍ ପଡ଼ିରହିବା ଏବଂ ବୈଠକରେ ଜଳସେଚନ ବିଭାଗର କୌଣସି ଅଧିକାରୀ ଉପସ୍ଥିତ ନ ଥିବାରୁ ଏମ୍ପି ମାଝୀ ଅସନ୍ତୋଷ ପ୍ରକାଶ କରିଥିଲେ। ଆମେ ବିଧାୟକ ଏବଂ ଏମ୍ପିମାନେ ୨୪ ଘଣ୍ଟା ସର୍ବସାଧାରଣଙ୍କ ବିକାଶ କାର୍ଯ୍ୟ କରିବାକୁ ଅଛୁ। ପୂର୍ବ ସରକାର ସମୟରେ ଅଧିକାରୀମାନେ ଅବହେଳା ଯୋଗୁ ଏବେ ମଧ୍ୟ କୋରାପୁଟ ଜିଲାର ବିକାଶ ହୋଇପାରିନାହିଁ ବୋଲି ସେ ପ୍ରକାଶ କରିଥିଲେ। ଏହି ବୈଠକରେ ଜିଲାପାଳ ଭି. କୀର୍ତ୍ତିଭାସନ, କୋରାପୁଟ ବିଧାୟକ ରଘୁରାମ ମାଛ, କୋଟପାଡ଼ ବିଧାୟକ ରୁପୁ ଭତ୍ରା ଏବଂ ଲକ୍ଷ୍ମୀପୁର ବିଧାୟକ ପବିତ୍ର ସାଉଁନ୍ତା ଉପସ୍ଥିତ ଥିଲେ।