ପାଟଣା,୩୦।୯(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ବ୍ଲକ ଏରେଣ୍ଡେଇ ପଞ୍ଚାୟତର ସରପଞ୍ଚ ପାର୍ବତୀ ଦେହୁରୀଙ୍କ ବିରୋଧରେ ସୋମବାର କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଅନାସ୍ଥା ପ୍ରସ୍ତାବ ପାଇଁ ଭୋଟ ଦାନ ପ୍ରକ୍ରିୟା ଆରମ୍ଭ ହୋଇଥିଲା। ତେବେ କରମ ଅଭାବରୁ ନିର୍ବାଚନ ଅଧିକାରୀ ଅନାସ୍ଥା ପ୍ରସ୍ତାବକୁ ବାତିଲ କରିଦେଇଛନ୍ତି। ନିର୍ବାଚନ ଅଧିକାରୀ ଭାବେ ସାହାରପଡ଼ା ବିଡ଼ିଓ ମାଧବ ଚନ୍ଦ୍ର ବୀରୁଆ, ମାଜିଷ୍ଟ୍ରେଟ ଭାବେ ପାଟଣା ତହସିଲ ଦାର ଲୀଳାବତୀ ନାୟକ, ପାଟଣା ଥାନାଧିକାରୀ ଉଦୟ ବୀର କୁଲୁ ,ଗ୍ରାମପଞ୍ଚାୟତ ଉନ୍ନୟନ ଅଧିକାରୀ ରଶ୍ମି ରେଖା ମହାନ୍ତି, ପ୍ରମୁଖ କଡ଼ା ସୁରକ୍ଷା ବ୍ୟବସ୍ଥାରେ ନିର୍ବାଚନ କାର୍ଯ୍ୟ ଆରମ୍ଭ କରିଥିଲେ। ନିର୍ଦ୍ଧାରିତ ସମୟ ମଧ୍ୟରେ ୧୨ଜଣ ୱାର୍ଡ ସଦସ୍ୟଙ୍କ ମଧ୍ୟରୁ ନାଏବ ସରପଞ୍ଚ ଉମାକାନ୍ତ ମହାନ୍ତଙ୍କ ୭ଜଣ ସମର୍ଥକ ସଦସ୍ୟ ପହଞ୍ଚିଥିଲେ ହେଁ ସରପଞ୍ଚ ପାର୍ବତୀ ଦେହୁରୀଙ୍କ ସହ ୪ ସମର୍ଥକ ସଭା କକ୍ଷକୁ ଆସି ନ ଥିଲେ। ଏ ନେଇ ନିର୍ବାଚନ ଅଧିକାରୀ ମାଧବ ଚନ୍ଦ୍ର ବିରୁଆଙ୍କୁ ପଚାରିବାରୁ ୧୨ଜଣ ସଦସ୍ୟଙ୍କ ମଧ୍ୟରୁ ୨ ତୃତୀୟାଂଶ ଉପସ୍ଥିତ ନ ଥିବାରୁ ସଭା ହୋଇପାରିଲା ନାହିଁ। ଏନେଇ ନାଏବ ସରପଞ୍ଚ ଉମାକାନ୍ତ ମହାନ୍ତଙ୍କ ପ୍ରତିକ୍ରିୟା ନେବାରୁ ଆମେ ୭ ଜଣ ସଦସ୍ୟ ଦିନ ୧୧ଟାରୁ ୧୨ଟା ପର୍ଯ୍ୟନ୍ତ ରହିଥିଲେ ହେଁ ସରପଞ୍ଚ ହାରିବା ଭୟରେ ତାଙ୍କ ୪ ସମର୍ଥକଙ୍କ ସହ ସଭାକୁ ଆସି ନ ଥିଲେ। ସୂଚନା ଯେ, ୯ ଜଣ ୱାର୍ଡ ସଦସ୍ୟ ଗତ ଅଗଷ୍ଟ ୨୭ ତାରିଖ ନିର୍ଦ୍ଧାରିତ ଫର୍ମରେ ଦସ୍ତଖତ କରି ଉପ ଜିଲାପାଳଙ୍କ ନିକଟରେ ଅନାସ୍ଥା ପ୍ରସ୍ତାବ ସପକ୍ଷରେ ଦରଖାସ୍ତ କରିଥିଲେ।
ସୂଚନାଯୋଗ୍ୟ, ଏରେଣ୍ଡେଇ ପଞ୍ଚାୟତର ସରପଞ୍ଚ ଭାବେ ଶ୍ରୀମତୀ ଦେହୁରୀ ଚଳିତ ଥରକୁ ମିଶାଇ ୪ର୍ଥ ଥର ସରପଞ୍ଚ ହୋଇଛନ୍ତି। ନିର୍ବାଚନକୁ ପି ଇ ଓ ରିମ୍ପା ନାଏକ ଏଡିଇ ଓ ଯଦୁମଣୀ ମହାନ୍ତ ପରିଚାଳନା କରିଥିଲେ। ସରପଞ୍ଚ ପାର୍ବତୀ ବିଜେଡି ସମର୍ଥିତ ହୋଇଥିବା ବେଳେ ଉମାକାନ୍ତ ଭାଜପା ସମର୍ଥିତ। ଏବେ ପାଟଣା ବିଧାନସଭା କ୍ଷେତ୍ରଟି ବିଜେଡି ହାତରୁ ଯିବା ପରେ ଆଉ ବିଧାୟକ ଭାବେ ଭାଜପା ବିଜୟୀ ପରେ ଭାଜପା ପଞ୍ଚାୟତ ରାଜ ସଂସ୍ଥାରେ ଅନାସ୍ଥା ଆଣି ସେସବୁକୁ ନିଜ ସପକ୍ଷରେ ନେବା ପାଇଁ ଉଦ୍ୟମ ଆରମ୍ଭ କରିଦେଇଥିବା ବେଳେ ବିଜେଡିି ନିଜ ଦୁର୍ଗ ବଞ୍ଚାଇବାକୁ ଉଦ୍ୟମ ଆରମ୍ଭ କରିଛି।