ପୁରୀ ଅଫିସ,୨୧।୩: ଶ୍ରୀମନ୍ଦିରକୁ ଦର୍ଶନ ପାଇଁ ଆସୁଥିବା ଲୋକେ ଖରାରେ ସିଝିବା ସହ ପିଇବାପାଣି ପାଇଁ ଡହଳବିକଳ ହେଉଛନ୍ତି। ଏପରି କି ପ୍ରବଳ ଗହଳି ସାଙ୍ଗକୁ ଲମ୍ବାଧାଡ଼ିରେ ଦୀର୍ଘ ସମୟ ଛିଡ଼ା ହୋଇରହୁଥିବାରୁ ଅଧୈର୍ଯ୍ୟ ହୋଇ ଠେଲାପେଲା ଲାଗୁଛନ୍ତି। ଏଥିଯୋଗୁ ବେଳେବେଳେ ଦଳାଚକଟା ଭଳି ପରିସ୍ଥିତି ସୃଷ୍ଟି ହେଉଛି। ଶ୍ରୀମନ୍ଦିର ଦର୍ଶନ ବ୍ୟବସ୍ଥାରେ ଏଭଳି ଅବ୍ୟବସ୍ଥା ନେଇ ପୁରୀ ବିକାଶ ପରିଷଦର ସଭାପତି ଜଗନ୍ନାଥ ବସ୍ତିଆ ପ୍ରଶାସନ ବିରୋଧରେ ଜାତୀୟ ମାନବ ଅଧିକାର କମିଶନ (ଏନ୍ଏଚ୍ଆର୍ସି)ଙ୍କ ନିକଟରେ ଏକ ମାମଲା ରୁଜୁ କରିଛନ୍ତି। ମାମଲାକୁ ବିଚାର ପାଇଁ କମିଶନ ଗ୍ରହଣ କରିଛନ୍ତି। ଅଭିଯୋଗରେ ବସ୍ତିଆ ଦର୍ଶାଇଛନ୍ତି ଯେ, ଶ୍ରୀମନ୍ଦିର ସିଂହଦ୍ୱାରଠାରୁ ମାର୍କେଟ ଛକ ପର୍ଯ୍ୟନ୍ତ ଭକ୍ତଙ୍କ ଲମ୍ବାଧାଡ଼ି ଲାଗୁଛି। ସେମାନଙ୍କ ପାଇଁ ବିଶ୍ରାମସ୍ଥଳୀ ଓ ପାନୀୟଜଳ ବ୍ୟବସ୍ଥା ନାହିଁ। ବରିଷ୍ଠ ନାଗରିକ, ମହିଳା ଓ ଦିବ୍ୟାଙ୍ଗଙ୍କ ପାଇଁ ସ୍ବତନ୍ତ୍ର ଦର୍ଶନ ସୁବିଧା ନାହିଁ। ଶ୍ରୀମନ୍ଦିର ଭିତରେ ଶୃଙ୍ଖଳିତ ଦର୍ଶନ ବ୍ୟବସ୍ଥା ନ ଥିବାରୁ ଠାକୁରଙ୍କୁ ଭକ୍ତ ଠିକ ଭାବେ ଦର୍ଶନ କରିପାରୁନାହାନ୍ତି। ଦର୍ଶନ ସମୟରେ ଧସ୍ତାଧସ୍ତିରେ ସୁନା ଅଳଙ୍କାର ଚୋରି ହୋଇଯାଉଛି। ସେହିଭଳି ମହିଳା ଭକ୍ତଙ୍କ ପ୍ରତି ଦୁର୍ବ୍ୟବହାର ଭଳି ଘଟଣା ବଢ଼ିବାରେ ଲାଗିଛି। ଠାକୁରଙ୍କ ସମ୍ମୁଖରେ କେତେଜଣ ସେବାୟତ ଦୀର୍ଘ ସମୟ ଥାଳି ଧରି ଠିଆ ହୋଇ ରହୁଥିବାରୁ ଦର୍ଶନରେ ସମସ୍ୟା ହେଉଛି। ଭକ୍ତମାନେ ଶ୍ରୀମନ୍ଦିରରୁ ଫେରି ତିକ୍ତ ଅନୁଭୂତି ବଖାଣୁଛନ୍ତି। ଭକ୍ତଙ୍କୁ ମୌଳିକ ସୁବିଧା ଯୋଗାଇଦେବାରେ ଶ୍ରୀମନ୍ଦିର ପ୍ରଶାସନ ଓ ରାଜ୍ୟ ସରକାର ବିଫଳ ହେଉଛନ୍ତି। ଶୃଙ୍ଖଳିତ ଓ ଅବାଧ ଦର୍ଶନ ଭକ୍ତର ଅଧିକାର। ତେଣୁ ପ୍ରଶାସନ ଏହାକୁ ନିଶ୍ଚିତ କରୁ ବୋଲି ପୁରୀ ବିକାଶ ପରିଷଦ ଦାବି କରିଛି। ଏହାଛଡ଼ା ବଡ଼ଦାଣ୍ଡ ବ୍ୟାରିକେଡ୍ ଓ ଶ୍ରୀମନ୍ଦିର ଭିତରେ ଛାମୁଣ୍ଡିଆ ନିର୍ମାଣ, ପ୍ରାଥମିକ ଚିକିତ୍ସା ସୁବିଧାର ଆବଶ୍ୟକତା ରହିଛି। ବିଶେଷକରି ଶ୍ରଦ୍ଧାଳୁମାନେ ଘଣ୍ଟା ଘଣ୍ଟା ଧରି ଧାଡ଼ିରେ ଠିଆ ହୋଇ ଅସହ୍ୟ ଖରା ତାତିକୁ ସହୁଥିଲେ ମଧ୍ୟ ପ୍ରଶାସନ ଚୁପ୍ ବସୁଛି। ଅନ୍ୟପକ୍ଷରେ ଗତ ଛତିଶାନିଯୋଗ ବୈଠକରେ ପାନୀୟ ଜଳ ଓ ବ୍ୟବସ୍ଥିତ ଦର୍ଶନ ସମ୍ପର୍କରେ ଆଲୋଚନା ହୋଇଥିଲେ ମଧ୍ୟ ଏହା ଠିକ ଭାବେ କାର୍ଯ୍ୟକାରୀ ହୋଇପାରିନାହିଁ। ଫଳରେ ଶ୍ରଦ୍ଧାଳୁଙ୍କ ସମେତ ପୁରୀ ସହରବାସୀ ମଧ୍ୟ ନାନା ସମସ୍ୟାର ସମ୍ମୁଖୀନ ହେଉଛନ୍ତି ବୋଲି ବସ୍ତିଆ ତାଙ୍କ ଅଭିଯୋଗରେ ଉଲ୍ଲେଖ କରିଛନ୍ତି।