ବରୀ,୩୦ା୬(ଡି.ଏନ.ଏ.): ସ୍ବାସ୍ଥ୍ୟ ସେବାକୁ ଗୁରୁତ୍ୱ ଦେଉଛନ୍ତି ସରକାର। ହେଲେ ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନାନା ଅବ୍ୟବସ୍ଥା ମଧ୍ୟରେ ଚାଲିଛି । ଏ ସଂକ୍ରାନ୍ତରେ ବିଭାଗୀୟ ଅଧିକାରୀମାନଙ୍କୁ ବାରମ୍ବାର ଅବଗତ କରାଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଅଭିଯୋଗ ହୋଇଛି ।
ସୂଚନା ଅନୁଯାୟୀ, ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ବାଲିଆ, ରତ୍ନଗିରି, କୃଷ୍ଣନଗର, କଳାମାଟିଆ, ଅଙ୍ଗାଳୋ ଆଦି ୫ ପ୍ରାଥମିକ ଚିକିତ୍ସା କେନ୍ଦ୍ର ରହିଛି। ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ନିଯୁକ୍ତି ପାଇଥିବା ୬ ଜଣ ଡାକ୍ତର ଜଣକ ପରେ ଜଣେ ଇସ୍ତଫା ଦେବା ପରେ ଏଠାରେ ରୋଗୀ ସେବା ବିପର୍ଯ୍ୟସ୍ତ ହୋଇପଡିଛି। ଡାକ୍ତରମାନଙ୍କ ଇସ୍ତଫା ସମ୍ପର୍କିତ ସୂଚନା ଜିଲା ସ୍ବାସ୍ଥ୍ୟ ବିଭାଗ ନିକଟରେ ଅଛି । ସ୍ଥାନୀୟ ଲୋକମାନେ ଜିଲା ସ୍ବାସ୍ଥ୍ୟ ବିଭାଗକୁ ଏ ସଂକ୍ରାନ୍ତରେ ଜଣାଇ ଆସୁଥିଲେ ମଧ୍ୟ ଜିଲା ସ୍ବାସ୍ଥ୍ୟ ବିଭାଗ ଚେଇଁ ଶୋଇଥିବା ଅଭିଯୋଗ ହେଉଛି।
ଗୋଟିଏ ସ୍ବାସ୍ଥ୍ୟ କେନ୍ଦ୍ରରେ ସର୍ବନିମ୍ନ ୫ ଜଣ ବିଶେଷଜ୍ଞ ଡାକ୍ତର ଯଥା ଶିଶୁ ରୋଗ, ସ୍ତ୍ରୀ ଓ ପ୍ରସୂତୀ, ମେଡିସିନ୍, ସର୍ଜରୀ, ନିଶ୍ଚେତକ ବିଶେଷଜ୍ଞ ସହିତ ୧୩ ଜଣ ଡାକ୍ତର ରହିବା କଥା। ମାତ୍ର ଏଠାରେ ବିଶେଷଜ୍ଞ ଡାକ୍ତର ଆଦୌ ନ ଥିବା ବେଳେ ମାତ୍ର ୩ ଜଣ ଡାକ୍ତର ନିୟୋଜିତ ହୋଇଛନ୍ତି। ସେମାନଙ୍କ ମଧ୍ୟରୁ ଜଣେ ଦୀର୍ଘ ଦିନ ଛୁଟିରେ ଅଛନ୍ତି। ବର୍ତ୍ତମାନ ଆଉ ୨ ଜଣ ଠିକା ଡାକ୍ତରଙ୍କୁ ସେଠାକୁ ପଠାଯାଇଛି। ସେହିପରି ୨ ଜଣ ଫାର୍ମାସିଷ୍ଟ ପଦବୀ ଖାଲି ପଡିଛି। ୨ ଲାବ୍ରୋଟୋରୀ ଟେକ୍ନିସିଆନଙ୍କ ବଦଳରେ ଜଣେ, ୬ ଷ୍ଟାଫ୍ ନର୍ସଙ୍କ ସ୍ଥାନରେ ଦୁଇ ଜଣ, ୪ ଏଏନ୍ଏମ୍ ଓ ୪ ରୋଗୀ ସହାୟକଙ୍କ ସ୍ଥାନରେ ଆଦୌ କେହି ନାହାନ୍ତି । ୩ଜଣ ଡ୍ରେସରଙ୍କ ସ୍ଥାନରେ ଜଣେ ମାତ୍ର ଅଛନ୍ତି । ସମ୍ପୃକ୍ତ ଡ୍ରେସର ଆସନ୍ତା ମାସରେ ଚାକିରୀରୁ ଅବସର ନେବାର ଅଛି । ଏପରି ସ୍ଥିତିରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର କେବଳ କାଗଜ କଲମରେ ଚାଲିଥିବା ଅଭିଯୋଗ ହୋଇଛି। ରୋଗୀ ସେବାରେ ଏଠାରେ ଦୀର୍ଘ ଦିନ ଧରି ବ୍ୟାହତ ଘଟୁଥିବାରୁ ଅଞ୍ଚଳବାସୀ ଉକ୍ତ ସ୍ବାସ୍ଥ୍ୟକେନ୍ଦ୍ର ଉପରୁ ବିଶ୍ୱାସ ହରାଇ ସାରିଛନ୍ତି । କେତେଜଣ ଔଷଧ ଦୋକାନୀ ଡାକ୍ତରମାନଙ୍କୁ ଢାଲ କରି ସେମାନଙ୍କ ବେପାର ବଢାଇବାକୁ ଅସାଧୁ ଉଦ୍ୟମ କରୁଥିବା ଅଭିଯୋଗ ହୋଇଛି।