ଭୁବନେଶ୍ୱର,୨୯।୯: ରାଜ୍ୟରେ ଦୀର୍ଘ ଦିନ ଧରି ଚାଲିଥିବା କୁକୁଡ଼ା ଇନ୍ଟିଗ୍ରେସନ କମ୍ପାନୀ ଏବଂ ଓଡ଼ିଶା କୁକୁଡ଼ାଚାଷୀ ସଂଘର ବିବାଦ ଏବଂ ବିରୋଧ ଘଟଣାର ସମାଧାନ ନିକଟରେ ହୋଇଯାଇଛି। ଏହି ପରିପ୍ରେକ୍ଷୀରେ ବୁଧବାର କଟକର ଏକ ତାରକା ହୋଟେଲରେ ଉଭୟ ପକ୍ଷଙ୍କ ମଧ୍ୟରେ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଏଥିରେ ବିଭିନ୍ନ ଇନ୍ଟିଗ୍ରେସନ କମ୍ପାନୀ ଏବଂ କୁକୁଡ଼ା ଚାଷୀ ସଂଘର ବରିଷ୍ଠ କର୍ମକର୍ତ୍ତା ଓ ଅନ୍ୟ ସଦସ୍ୟମାନେ ମଧ୍ୟ ଯୋଗଦେଇଥିଲେ। ଏପରିକି ଉଭୟଙ୍କ ମଧ୍ୟରେ ଦୀର୍ଘ ସମୟ ଧରି କୁକୁଡ଼ାଚାଷ ବ୍ୟବସାୟ ସମ୍ପର୍କରେ ବିସ୍ତୃତ ଆଲୋଚନା କରାଯାଇ ମିଳିତ ଭାବେ ଉକ୍ତ ବିବାଦର ସମାଧାନ ହୋଇଛି ବୋଲି ସୂଚନା ଦିଆଯାଇଥିଲା।
ଓଡ଼ିଶାର କୁକୁଡ଼ା ଚାଷୀ ସଂଘର ବିଭିନ୍ନ ଦାବିକୁ ଇନ୍ଟିଗ୍ରେସନ କମ୍ପାନୀଗୁଡ଼ିକ ସମର୍ଥନ ଜଣାଇବା ସହ ଭବିଷ୍ୟତରେ ଏଭଳି ସମସ୍ୟା ଆଉ ନ ହେଉ ବୋଲି ସେ ସମ୍ପର୍କରେ ମଧ୍ୟ ଆଲୋଚନା ହୋଇଥିଲା। ବିଶେଷକରି ଓଡ଼ିଶାରେ କୁକୁଡ଼ାଚାଷର ଦ୍ରୁତ ଉନ୍ନତି ପାଇଁ ଆବଶ୍ୟକ ନିଷ୍ପତ୍ତି ମଧ୍ୟ ନିଆଯାଇଛି। ଓଡ଼ିଶା କୁକୁଡ଼ାଚାଷୀ ସଂଘର ସଂଯୋଜକ ନୀଳାଚଳ ପରିଡ଼ା, ସଭାପତି ଜ୍ୟୋତିକାନ୍ତ ମହାପାତ୍ର ପ୍ରମୁଖ ଉପସ୍ଥିତ ରହି ରାଜ୍ୟରେ ଚାଲିଥିବା ବିରୋଧ ଓ ବିବାଦକୁ ପ୍ରତ୍ୟାହାର କରିବା ସହ ଶାନ୍ତିପୂର୍ଣ୍ଣ ଭାବେ ପୁନର୍ବାର କୁକୁଡ଼ା ଚାଷକୁ ପ୍ରୋତ୍ସାହନ ଦେବା ସହ ଇନ୍ଟିଗ୍ରେସନ କମ୍ପାନୀଗୁଡ଼ିକୁ ସମର୍ଥନ କରିବା ପାଇଁ ସବୁବର୍ଗଙ୍କୁ ଅନୁରୋଧ କରାଯାଇଥିଲା ବୋଲି ଉଭୟେ ମତବ୍ୟକ୍ତ କରିଛନ୍ତି।
