ପୁରୁଷୋତ୍ତମପୁର, ୩୧।୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ସହରବାସୀଙ୍କ ଉପରେ ଟିପିଏସ୍ଓଡିଏଲ୍ ଦାଉ ସାଧିଛି। ସାଉଥକୋଠାରୁ ଟାଟା ପାୱାର(ଟିପିଏସ୍ଓଡିଏଲ୍) ଗତ ଜାନୁୟାରୀ ୨୦୨୧ରୁ ବିଦ୍ୟୁତ୍ ବଣ୍ଟନ ଦାୟିତ୍ୱ ନେଇଛି। ଏହା ପରଠାରୁ ଅଞ୍ଚଳରେ ବାରମ୍ବାର ବିଦ୍ୟୁତ୍ ବିଭ୍ରାଟ ଲାଗି ରହିଥିବା ଅଭିଯୋଗ ହୋଇଛି। ଅଘୋଷିତ ଭାବେ ଘଣ୍ଟା ଘଣ୍ଟା ଧରି ବିଦ୍ୟୁତ୍ କଟାଯାଉଛି। ଏପରି କି ମରାମତି ଆଳରେ ବିଭିନ୍ନ ସମୟରେ ଦିନ ତମାମ୍ ବିଦ୍ୟୁତ୍ କାଟ ହେଉଛି। ଫଳରେ ସରକାରୀ, ବେସରକାରୀ କାର୍ଯ୍ୟାଳୟରେ କାର୍ଯ୍ୟ ସମ୍ପୂର୍ଣ୍ଣ ଠପ୍ ହୋଇପଡୁଛି।
ଏହା ସହ ମୋବାଇଲ, ଟେଲିଫୋନ ଓ ଇଣ୍ଟରନେଟ ସେବା ଅଚଳ ହୋଇପଡୁଥିବା ଯୋଗୁ ବ୍ୟବସାୟିକ କାର୍ଯ୍ୟରେ ମଧ୍ୟ ବାଧା ଉପୁଜୁଛି। ଗ୍ରାହକଙ୍କଠାରୁ ଠିକ୍ ସମୟରେ ବିଲ୍ ନେଉଥିବା ବେଳେ ବିଦ୍ୟୁତ୍ ଯୋଗାଣ ନ କରି ଟାଟା ପାୱାର ଲୋକଙ୍କୁ ଶୋଷଣ କରୁଥିବା ନେଇ କେତେକ ଉପଭୋକ୍ତା ଅଭିଯୋଗ କରିଛନ୍ତି। ଲୋକେ ବିଦ୍ୟୁତ୍ ବିଲ ପ୍ରଦାନ ସମୟରେ ଏନେଇ ପ୍ରତିବାଦ କରୁଥିଲେ ମଧ୍ୟ ବିଭାଗୀୟ କର୍ମଚାରୀ ନାଲି ଆଖି ଦେଖାଇ ପୋଲିସରେ କେସ୍ କରି ଜେଲ୍ ପଠାଇ ଦେବାକୁ ଧମକ ଦେଉଥିବା ଅଭିଯୋଗ ହେଉଛି। ପୋଲିସ ଭୟରେ ଲୋକେ ମୁହଁ ଖୋଲୁ ନ ଥିବା ବେଳେ ବିଦ୍ୟୁତ୍ ବିଭ୍ରାଟକୁ ନେଇ ଅସନ୍ତୋଷ କୁହୁଳିବାରେ ଲାଗିଛି। ଲୋକଙ୍କ ଏପରି ଅସନ୍ତୋଷ କେଉଁ ସମୟରେ ଉଗ୍ରରୂପ ଧାରଣ କରିବ ତାହାର ଆଶଙ୍କା କରାଯାଇଛି। ଏଣୁ ସରକାର, ପ୍ରଶାସନ ଓ ଟାଟା ପାୱାର ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
