କୋରେଇ,୧୧ା୨(ଡି.ଏନ.ଏ.): ଗ୍ରାମାଞ୍ଚଳରେ ଯୋଗାଯୋଗ ବ୍ୟବସ୍ଥାରେ ସୁଧାର ପାଇଁ ରାଜ୍ୟ ସରକାର ୨୦୧୧ରେ ଆରମ୍ଭ କରିଥିବା ବିଜୁ ସେତୁ ଯୋଜନାର ସଫଳ ରୂପାୟନ ପରାହତ ହୋଇଛି। କେତେଜଣ ଠିକାଦାର ଓ ଅଧିକାରୀଙ୍କ ଲାଭଖୋର ମନୋଭାବ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି। ଜମି ଅଧିଗ୍ରହଣ ନ କରି ସେତୁ ନିର୍ମାଣ ନକ୍ସାରେ ପରିବର୍ତ୍ତନ, ମନ୍ଥର ଗତିରେ କାମ ତଥା ନିମ୍ନମାନର କାର୍ଯ୍ୟ ଯୋଗୁ ଜନସାଧାରଣଙ୍କ ଉପଯୋଗୀ ହୋଇପାରୁନାହିଁ । ଏହି ପରିପ୍ରେକ୍ଷୀରେ ଯାଜପୁର ଜିଲା କୋରେଇ ବ୍ଲକ ଅନ୍ତର୍ଗତ ବନ୍ଦାଳ ପଞ୍ଚାୟତ ବରୁଣ୍ଡେଇ-ବନ୍ଦାଳ ରାସ୍ତାର ଶାମୁକା ନାଳ ଉପରେ ଗ୍ରାମ ଉନ୍ନୟନ ବିଭାଗ ପକ୍ଷରୁ ନିର୍ମାଣ ଚାଲିଥିବା ବିଜୁ ସେତୁ ସ୍ଥଳକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଉଛି । ସୂଚନା ଅନୁଯାୟୀ ଏଠାରେ ଚାଲିଥିବା ବିଜୁ ସେତୁ କାମ ଶୈଳବାଳା ଇନ୍ଫ୍ରାଷ୍ଟକ୍ଚର ପ୍ରାଇଭେଟ ଲିମିଟେଡ଼ ନାମକ ଠିକାସଂସ୍ଥାକୁ ଦାୟିତ୍ୱ ଦିଆଯାଇଛି। ଏଥିପାଇଁ ୭ କୋଟି ୮୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ଅଟକଳ ହୋଇଛି। ଏହି ସେତୁର ଦୈଘ୍ୟ ୮୯.୪୪ ମିଟର ଓ ପ୍ରସ୍ଥ ୨.୫୫ ମିଟର ହୋଇଥିବାବେଳେ ଏହାର ନିର୍ମାଣ ଆସନ୍ତା ସେପ୍ଟେମ୍ବର ୨୮ ସୁଦ୍ଧା ସରିବ ବୋଲି ସୂଚନା ଫଳକରେ ଉଲ୍ଲେଖ ରହିଛି । ହେଲେ ବିଡମ୍ବନାର ବିଷୟ ଏହି ସେତୁର ନିର୍ମାଣ ହେଉଥିବା ଜମିକୁ ନେଇ ବିଭିନ୍ନ ଅଭିଯୋଗ ହେଉଛି। ସେତୁର କାମ ସଠିକ ଭାବେ ହେଉନାହିଁ ବୋଲି ସ୍ଥାନୀୟ ସରପଞ୍ଚ ବିଷ୍ଣୁ ରଥ ଅଭିଯୋଗ କରିଛନ୍ତି। ଏଥିରେ ବ୍ୟବହାର ହେଉଥିବା ରଡ଼, ସିମେଣ୍ଟ, ଚିପ୍ସ ଇତ୍ୟାଦି ନିମ୍ନ ମାନର ହୋଇଥିବା ସହ ଯେତିକି ଗଭୀରରେ ବୋରିଂ କରାଯିବା କଥା ତାହା ହୋଇ ନ ଥିବା ଅଭିଯୋଗ ହୋଇଛି । ନିର୍ମାଣ ହେଉଥିବା ସେତୁର ଜମି ଝାଟିଆସାହି ମୌଜାର ଖାତା ନଂ ୧୩୬, ଯାହାକି ବ୍ୟକ୍ତିଗତ ଜମି ବୋଲି ବନ୍ଦାଳ ଗ୍ରାମର ଗୋପୀନାଥ ସାହୁ, ପର୍ଶୁରାମ ସାହୁ, ଦାମୋଦର ସାହୁ ଓ ବିଷ୍ଣୁ ସାହୁ କଳିଙ୍ଗନଗର ଅତିରିକ୍ତ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ସ୍ଥାନୀୟ ଲୋକଙ୍କ ଅଭିଯୋଗକୁ କର୍ଣ୍ଣପାତ ନ କରି ଠିକାଦାର ବେଫିକର ଭାବେ ନିର୍ମାଣ କାମ ଆଗେଇ ନେଉଛନ୍ତି । ଏପରି କି ଏହାକୁ ପ୍ରତିବାଦ କଲେ ଠିକାଦାରଙ୍କ ଦ୍ୱାରା ନିଯୁକ୍ତି ପାଇଥିବା ଲୋକମାନେ ଧମକଚମକ ଦେଉଛନ୍ତି ବୋଲି ଅଭିଯୋଗ ହୋଇଛି। ଏ ସଂକ୍ରାନ୍ତରେ ଯାଜପୁର ରୋଡ ଗ୍ରାମ୍ୟ ନିର୍ମାଣ ବିଭାଗର ଜୁନିୟର ଇଞ୍ଜିନିୟର ରଞ୍ଜନ କୁମାର ବେହେରାଙ୍କ ମତାମତ ନେବାକୁ ତାଙ୍କୁ ଫୋନ୍ କରାଯାଇଥିଲାା ହେଲେ ସେ କଲ ଗ୍ରହଣ କରି ନ ଥିଲେ।