କେନ୍ଦୁଝର,୯ା୧୧(ସ୍ବ.ପ୍ର.): ଜଙ୍ଗଲ ଜମି ଅଧିକାର ଆଇନ ୨୦୦୬ରେ ପ୍ରାବଧାନ ଥିବା ସତ୍ତ୍ୱେ ବଣଜଙ୍ଗଲ ଘେରା ଅଞ୍ଚଳରେ ରହୁଥିବା ପୁରାତନ ବସ୍ତି ଓ ଗ୍ରାମଗୁଡ଼ିକୁ ରାଜସ୍ବ ଗ୍ରାମର ମାନ୍ୟତା ମିଳୁ ନ ଥିବାରୁ ଅସନ୍ତୋଷ ଦେଖାଦେଇଛି। ବାରମ୍ବାର ଗ୍ରାମସଭାରେ ନିଷ୍ପତ୍ତି ହୋଇ ପ୍ରଶାସନ ନିକଟକୁ ଗ୍ରାମବାସୀ ପଠାଉଥିଲେ ହେଁ ମାନ୍ୟତା ମିଳୁ ନ ଥିବାରୁ ଜିଲାପାଳ, ରାଜ୍ୟପାଳ, ମୁଖ୍ୟମନ୍ତ୍ରୀ, ଚିଫ୍ ସେକ୍ରେଟାରୀ, ମାନବାଧିକାର କମିଶନ, ଏସ୍ସିଏସ୍ଟି କମିଶନ, ପ୍ରଧାନମନ୍ତ୍ରୀ, ରାଷ୍ଟ୍ରପତିଙ୍କୁ ଜଣାଇବା ପରେ ସୁଫଳ ମିଳୁ ନ ଥିବାରୁ ହାଟଡିହି ବ୍ଲକର କଅଁଳେଇବାଲିପାଳ ପଞ୍ଚାୟତର ମଲ୍ଲୀପଶି, ସରମୁଣ୍ଡି, ମୟୂରନଚା, ଭଅଁରା ଆଦି ଗ୍ରାମର ଗ୍ରାମବାସୀ ଚିନ୍ତାରେ ରହିଛନ୍ତି। ସେମାନେ ପୁଣି ଥରେ ଏସ୍ସିଏସ୍ଟି କମିଶନର ସଦସ୍ୟ ଅନନ୍ତ ନାୟକ ତଥା ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଲିଖିତ ଜଣାଇ ସେମାନଙ୍କ ସମସ୍ୟା ସମାଧାନ ପାଇଁ ନିବେଦନ କରିଛନ୍ତି ା
ପ୍ରକାଶ ଯେ, ହଦଗଡ଼ ଜଳଭଣ୍ଡାର ଦ୍ୱାରା କ୍ଷତିଗ୍ରସ୍ତ ଓ ବିସ୍ଥାପିତ ହୋଇ ଏହି ଆଦିବାସୀମାନେ ହଦଗଡ଼ ସଂରକ୍ଷିତ ଜଙ୍ଗଲର ଉପରୋକ୍ତ ଗ୍ରାମରେ ପୂର୍ବ ଗ୍ରାମ ନାମରେ ବସବାସ କରିଆସୁଥିବା କହିଛନ୍ତି। ଏହି ୫ଟି ଗ୍ରାମରେ ୭୬୦ଟି ପରିବାର ରହିଥିବା ବେଳେ ପଟ୍ଟା ପାଇ ପାରୁ ନ ଥିବାରୁ ଭୂମିହୀନ ହୋଇ ଜୀବନଯାପନ କରୁଛନ୍ତି। ଏନେଇ ବୁଧବାର ଅନୁଷ୍ଠିତ ଏକ ଗ୍ରାମସଭାରେ ଶ୍ରୀରାମ ନାଏକ, ରଘୁନାଥ ନାଏକ, ଲୋକନାଥ କୁଣ୍ଡେଇ, କୁନାମନ୍ତ ପ୍ରଧାନ, ବୁଧିରାମ ପୂର୍ତ୍ତି, ରାଉତ ହୋ, ତ୍ରିଲୋଚନ ବିନିସିଆ, ନାରାୟଣ ଖଣ୍ଡେଇ, ସୁଶାନ୍ତ ନାଏକ, ହୃଷୀକେଶ କଳପାଳିଅଙ୍କେ ସମେତ ୫ଟି ଗ୍ରାମର ବହୁ ଲୋକ ଯୋଗ ଦେଇଥିଲେ।