କଟକ ଅଫିସ,୨୬।୪: କଟକ ମହାନଗର ନିଗମ(ସିଏମ୍ସି)ର ବିଭିନ୍ନ ଓ୍ବାର୍ଡରେ ଦୁଇଟି ପର୍ଯ୍ୟାୟରେ ପଙ୍କୋଦ୍ଧାର କରାଯିବା କଥା। ଏଥିପାଇଁ ୩ଟି ଘରୋଇ ସଂସ୍ଥା(ମଞ୍ଜୁ, ପ୍ରତ୍ୟୁଷ ଓ ଜାଗୃତି)କୁ ଦାୟିତ୍ୱ ଦିଆଯାଇଛି। ହେଲେ ଏପ୍ରିଲ ମାସ ଶେଷ ହେବାକୁ ବସିଥିବାବେଳେ ପ୍ରଥମ ପର୍ଯ୍ୟାୟ ପଙ୍କୋଦ୍ଧାର ଶେଷ ହୋଇନାହିଁ। ଖାଲି ସେତିକି ନୁହେଁ ଟେଣ୍ଡର ନେଇଥିବା ସଂସ୍ଥା ପ୍ରକୃତରେ କେତେ ପଙ୍କୋଦ୍ଧାର କରିଛି ତା’ର ତଥ୍ୟ ଓ ଯନ୍ତ୍ରୀ ବିଭାଗ ତଥ୍ୟ ସହିତ ତାଳମେଳ ରହୁ ନାହିଁ। ଫଳରେ ପଙ୍କୋଦ୍ଧାର କିଭଳି ଭାବେ ଚାଲିଛି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ୩ ସଂସ୍ଥାର ମନମୁଖି କାର୍ଯ୍ୟକୁ ନେଇ ଚେତାବନୀ ଦିଆଯିବା ସହିତ ଆସନ୍ତା ୩୦ ସୁଦ୍ଧା ପଙ୍କୋଦ୍ଧାର କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦିଆଯାଇଛି। କାର୍ଯ୍ୟରେ ଅବହେଳା କଲେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସୁପାରିସ କରାଯିବ। ଏନେଇ ମଙ୍ଗଳବାର ସିଏମ୍ସି ବିଜୁ ଭବନରେ ଅନୁଷ୍ଠିତ ସିଏମ୍ସି ସ୍ବାସ୍ଥ୍ୟ ବିଭାଗ ଷ୍ଟାଣ୍ଡିଂ କମିଟି ବୈଠକରେ ନିଷ୍ପତ୍ତି ନିଆଯାଇଛି। ସ୍ବାସ୍ଥ୍ୟ ବିଭାଗ ସ୍ଥାୟୀ କମିଟି ଅଧ୍ୟକ୍ଷା ଦୀପ୍ତିମୟୀ ମୂଳିଆଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବିଭିନ୍ନ ବିଷୟରେ ଆଲୋଚନା ହୋଇଥିଲା।
ଏହି ୩ ସଂସ୍ଥାର କାର୍ଯ୍ୟକୁ ଯନ୍ତ୍ରୀ ବିଭାଗ ପକ୍ଷରୁ ଅନୁଧ୍ୟାନ କରାଯାଉ ନ ଥିବାରୁ ସହରରେ ପଙ୍କୋଦ୍ଧାର କାର୍ଯ୍ୟ ବିଳମ୍ବ ହୋଇଛି। ଏହାକୁ ନେଇ ଅସନ୍ତୋଷ ପ୍ରକାଶ ପାଇଛି। କମିଟି ଅଧ୍ୟକ୍ଷା ମୂଳିଆଙ୍କ ନେତୃତ୍ୱରେ ସଂସ୍ଥାର ପଙ୍କୋଦ୍ଧାର କାର୍ଯ୍ୟକୁ ତଦାରଖ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି। ସେହିପରି ପ୍ରତି ୱାର୍ଡରେ କେତେ ନାଳ ଓ ତାହାର ମାପ ସଂକ୍ରାନ୍ତରେ ଯନ୍ତ୍ରୀ ବିଭାଗ ରିପୋର୍ଟ ପ୍ରସ୍ତୁତ କରିବାକୁ କୁହାଯାଇଛି। ଅପରପକ୍ଷରେ ରାସ୍ତାପାର୍ଶ୍ୱ ଅଚଳ ଲାଇଟ୍ ମରାମତି କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ସହରର ବିଭିନ୍ନ ସ୍ଥାନରେ ଥଣ୍ଡା ପାନୀୟ ମେଶିନ ଅଚଳ ହୋଇପଡିଛି। ତେବେ କେତେ ସଂଖ୍ୟକ ମେଶିନ ଅଚଳ ହୋଇପଡିଛି, ତାହାର ଏକ ସ୍ବତନ୍ତ୍ର ରିପୋର୍ଟ ପ୍ରଦାନ କରିବାକୁ ଯନ୍ତ୍ରୀ ବିଭାଗକୁ କୁହାଯାଇଛି। ସେହିଭଳି ସ୍ବାସ୍ଥ୍ୟ ବିଭାଗର ବିଭିନ୍ନ କାର୍ଯ୍ୟ ସମ୍ପର୍କରେ ଅଧିକାରୀମାନେ କମିଟିକୁ ଜଣାଉ ନ ଥିବାରୁ ଅସନ୍ତୋଷ ପ୍ରକାଶ ପାଇଥିଲା। ଅଧ୍ୟକ୍ଷା ମୂଳିଆ ଗତ କାଉନ୍ସିଲ ବୈଠକରେ ଏ ନେଇ ଅଭିଯୋଗ କରିଥିଲେ। ଫଳରେ ଏହି ବୈଠକରେ ସିଏମ୍ସି ମେୟର ସୁବାସ ସିଂ ଯୋଗଦେଇ ପ୍ରତି କାର୍ଯ୍ୟ ସମ୍ପର୍କରେ ବିଭାଗୀୟ କମିଟିକୁ ଅବଗତ କରାଯିବାକୁ ନିର୍ଦ୍ଦେଶ ଦେଇଥିଲେ। ବୈଠକରେ ୱାଟ୍କୋ ଅଧିକାରୀଙ୍କ ଅନୁପସ୍ତିତିକୁ ନେଇ ଅସନ୍ତୋଷ ପ୍ରକାଶ ପାଇଛି। ଏହି ବୈଠକରେ କମିଟିର ସମସ୍ତ ସଦସ୍ୟ, ଯନ୍ତ୍ରୀ ବିଭାଗ ଓ ଜାଇକା ଅଧିକାରୀମାନେ ଯୋଗଦେଇଥିଲେ।