ଭାଜପାର କୁହୁଳୁଛି ଅସନ୍ତୋଷ, ୬ ମାସରେ ୩ ରାଜ୍ୟରେ ୪ ମୁଖ୍ୟମନ୍ତ୍ରୀଙ୍କ ଇସ୍ତଫା…

ନୂଆଦିଲ୍ଲୀ,୧୨।୯: ଭାଜପା ଶାସିତ ରାଜ୍ୟରେ ନେତାଙ୍କ ମଧ୍ୟରେ ଧୀରେଧୀରେ ଅସନ୍ତୋଷ କୁହୁଳିବାରେ ଲାଗିଛି। ଏହାର ଫଳସ୍ବରୂପ ଗତ ୬ ମାସ ମଧ୍ୟରେ ଦେଶର ୩ ରାଜ୍ୟ ୪ ଜଣ ମୁଖ୍ୟମନ୍ତ୍ରୀ ଇସ୍ତଫା ଦେଇଛନ୍ତି। ଗୁଜରାଟର ବିଧାନସଭା ନିର୍ବାଚନର ପ୍ରାୟ ୧୫ ମାସ ପରେ ମୁଖ୍ୟମନ୍ତ୍ରୀ ବିଜୟ ରୂପାନୀ ଶନିବାର ତାଙ୍କ ପଦରୁ ଇସ୍ତଫା ଦେଇଛନ୍ତି। ଗୁଜରାଟ ପୂର୍ବରୁ ଉତ୍ତରାଖଣ୍ଡ ଏବଂ କର୍ନାଟକରେ ଭାଜପା ହାଇକମାଣ୍ଡ ପୂର୍ବରୁ ୩ ମୁଖ୍ୟମନ୍ତ୍ରୀଙ୍କୁ ବଦଳାଇଛନ୍ତି। ଏବେ ବିଜୟ ରୂପାନି ଚତୁର୍ଥ ମୁଖ୍ୟମନ୍ତ୍ରୀ ଭାବେ ପଦ ହରାଇଛନ୍ତି।

ଗୁଜରାଟରେ ମୁଖ୍ୟମନ୍ତ୍ରୀଙ୍କ ଇସ୍ତଫା ପୂର୍ବରୁ କୌଣସି ବିଶେଷ କାର୍ଯ୍ୟକଳାପ ଦେଖାଯାଇ ନ ଥିଲା। ହଠାତ୍‌ ମୁଖ୍ୟମନ୍ତ୍ରୀ ଇସ୍ତଫା ଦେଇଥିଲେ।

ମାର୍ଚ୍ଚରେ ଭାଜପାର ତତ୍କାଳୀନ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ତ୍ରିବେନ୍ଦ୍ର ସିଂ ରାୱତଙ୍କ ସ୍ଥାନରେ ଲୋକସଭା ସଦସ୍ୟ ତିରଥ ସିଂ ରାୱତଙ୍କୁ ମୁଖ୍ୟମନ୍ତ୍ରୀ ଭାବରେ ବଦଳାଯାଇଥିଲା। ଜୁଲାଇରେ ମୁଖ୍ୟମନ୍ତ୍ରୀ ଦାୟିତ୍ୱ ଦିଆଯିବା ପରେ ଚାରି ମାସ ପରେ ତିରଥଙ୍କୁ ମଧ୍ୟ ହଟାଇ ଦିଆଯାଇଥିଲା। ତାଙ୍କ ସ୍ଥାନରେ ବିଧାୟକ ପୁଷ୍କର ସିଂ ଧାମିଙ୍କୁ ମୁଖ୍ୟମନ୍ତ୍ରୀ ଦାୟିତ୍ୱ ଦିଆଯାଇଥିଲା। ସେହିପରି କର୍ନାଟକରେ ବି.ଏସ.ୟେଦୁରପ୍ପାଙ୍କୁ ବଦଳାଇ ମୁଖ୍ୟମନ୍ତ୍ରୀ ଦାୟିତ୍ୱ ନିର୍ଦ୍ଦେଶକୁ ବି.ଏସ. ବୋମ୍ମାଇଙ୍କୁ ପ୍ରଦାନ କରାଯାଇଥିଲା।

କେତେକ ଭାଜପା ନେତା କହିଛନ୍ତି ଯେ ରାଜ୍ୟରେ ଏକ ନୂତନ ନେତୃତ୍ୱ ଆଣିବା ପାଇଁ ଗୁଜରାଟ ଏବଂ କର୍ନାଟକର ମୁଖ୍ୟମନ୍ତ୍ରୀଙ୍କୁ ପରିବର୍ତ୍ତନ କରାଯାଇଛି। କର୍ନାଟକରେ ମୁଖ୍ୟମନ୍ତ୍ରୀ ଏବଂ ତାଙ୍କ ପୁଅଙ୍କ ବିରୋଧରେ ଅସନ୍ତୋଷ ପ୍ରକାଶ ପାଇଥିବା ଚର୍ଚ୍ଚା ହେଉଛି। ସେହିଭଳି ଗୁଜରାଟ ୟୁନିଟରେ ରୂପାନୀଙ୍କୁ ଦଳର ଏକ ଅସନ୍ତୁଷ୍ଟ ଗୋଷ୍ଠୀଙ୍କ ଦ୍ୱାରା ହଟାଇବାକୁ ଦାବି କରାଯାଇଥିଲା। କାରଣ ରୂପାନୀଙ୍କ ନେତୃତ୍ୱରେ ଆସନ୍ତା ବର୍ଷ ହେବାକୁ ଥିବା ରାଜ୍ୟ ନିର୍ବାଚନରେ ଜିତିବା କଷ୍ଟକର ହେବ।

ଉତ୍ତରାଖଣ୍ଡରେ ମୁଖ୍ୟମନ୍ତ୍ରୀ ତ୍ରିବେନ୍ଦ୍ର ସିଂ ରାୱତଙ୍କୁ ନୂତନ ଚେହେରା ଆଣିବା ପାଇଁ ବଦଳି ହୋଇଥିବାବେଳେ ତିରଥ ସିଂ ରାୱତ ରାଜ୍ୟ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବାର ୬ ମାସ ମଧ୍ୟରେ ବିଧାନସଭାକୁ ନିର୍ବାଚିତ ହୋଇପାରି ନ ଥିବାରୁ ତାଙ୍କୁ ହଟାଇ ଦିଆଯାଇଥିଲା।

ଭାଜପା ଶାସିତ ରାଜ୍ୟରେ ଏଭଳି ଗୋଷ୍ଠୀ କନ୍ଦଳ ଯୋଗୁ ଦଳୀୟ ନେତାଙ୍କ ମଧ୍ୟରେ ଫାଟ ବଢିଚାଲିଛି। ଏହାକୁ ନେଇ ହାଇକମାଣ୍ଡଙ୍କୁ ଚିନ୍ତା ଘାରିଛି।