ଯୋଡ଼ା, ୧୮।୭ (ଡି.ଏନ.ଏ.)-କେନ୍ଦୁଝର ଜିଲା ଯୋଡ଼ା ବ୍ଲକ ଅନ୍ତର୍ଗତ ଭୂୟାଁରୋଇଡା ପଞ୍ଚାୟତର କେଥହଟିଂର ଛତାବରୀ ଠାରେ ଆଦିବାସୀଙ୍କ ଦ୍ୱାରା ସ୍ଥାପନ ହୋଇଥିବା ପଞ୍ଚମୁଖୀ ବାବା ହନୁମାନ ପୀଠ ଭଙ୍ଗାକୁ ନେଇ ଉକ୍ତ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ସୂଚନା ଅନୁଯାୟୀ କେଉଁ କାଳରୁ ସୁନାନଦୀ ଅବବାହିକାରେ ଏଠାରେ ହନୁମାନଙ୍କ ପୂଜାର୍ଚ୍ଚନା କରାଯାଉଥିଲା। ଗ୍ରାମବାସୀଙ୍କ ଉଦ୍ୟମକ୍ରମେ ୨୦୧୭ ମସିହା ଠାରୁ ଉକ୍ତ ପୀଠ ପ୍ରତିଷ୍ଠା କରାଯାଇ ବିଦ୍ଧିବଦ୍ଧ ଭାବେ ରୀତିନୀତି ଅନୁଯାୟୀ ପୂଜାର୍ଚ୍ଚନା କରାଯାଉଥିଲା। ଏନେଇ ପୀଠର ଦେହୁରୀ ଜାଉରା ଓରାମ କହିଛନ୍ତି, ହନୁମାନଙ୍କୁ ପୂଜାର୍ଚ୍ଚନା କଲେ ଲୋକଙ୍କ ମଙ୍ଗଳ ହୋଇଥାଏ ଓ ବିଭିନ୍ନ ସମସ୍ୟା ସମାଧାନ ହୋଇଥାଏ ବୋଲି ଗାଁ ଲୋକଙ୍କ ବିଶ୍ୱାସ ରହିଛି ା ଉକ୍ତ ପବିତ୍ର ପୀଠରେ ସ୍ଥାନୀୟ ଏକ ଖଣି କମ୍ପାନୀର ସୁରକ୍ଷା କର୍ମୀ ମାନେ ସଂଘବଦ୍ଧ ହୋଇ ଏଠାକୁ ଆସି ବଳପୂର୍ବକ ଗ୍ରାମବାସୀଙ୍କୁ ଧମକ ଦେଇ ପୀଠକୁ ଅପରିଷ୍କାର କରିବା ସହିତ ଚପଲ ମାଡି ପୀଠ ଭିତରେ ପ୍ରବେଶ କରି ଭଙ୍ଗାରୁଜା କରିଛନ୍ତି। ସୁରକ୍ଷାକର୍ମୀମାନେ ପୀଠରେ ଥିବା ହନୁମାନ ଝଣ୍ଡା, ପୂଜାର୍ଚ୍ଚନା ସାମଗ୍ରୀ, ଘଟ ଉପାଡି ଫୋପାଡି ଦେଇଥିଲେ। ଗ୍ରାମବାସୀଙ୍କ ମଧ୍ୟରେ ରଗଡଦାସ ଓରାମ, ବନବାସୀ ଓରାମ, ବଉଳ ପାତ୍ର, ଧୀରେନ ଓରାମ ପ୍ରମୁଖ କହିଛନ୍ତି, ଗତ ବୁଧବାର ଖଣି କମ୍ପାନୀର ଘରୋଇ ସୁରକ୍ଷା କର୍ମୀ ମାନେ ପୀଠକୁ ଭାଙ୍ଗି ଦେଇଛନ୍ତି। ଯାହାଫଳରେ ତାଙ୍କର ଧର୍ମୀୟ ଭାବନା ଉପରେ ଆଘାତ ଲାଗିଛି। ଆସ୍ଥା ଓ ବିଶ୍ୱାସ ଥିବା ଗ୍ରାମବାସୀଙ୍କ ଏହି ଧର୍ମପୀଠରେ ସମ୍ପୃକ୍ତ ଖଣି କମ୍ପାନୀର କେତେକ ସୁରକ୍ଷା କର୍ମୀ ଶୌଚ କରିଥିବା ମଧ୍ୟ ଅଭିଯୋଗ କରିଛନ୍ତି। ଏନେଇ ପ୍ରଶାସନ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାପାଇଁ ଗ୍ରାମବାସୀ ଦାବି କରିଛନ୍ତି।