ରସୁଲପୁର,୧୮ା୧୧(ଡି.ଏନ.ଏ.): ରସୁଲପୁର ବ୍ଲକ୍ ଅନ୍ତର୍ଗତ ମଙ୍ଗରାଜପୁର ପଞ୍ଚାୟତର ୫-ଟି ରୂପାନ୍ତରଣ ବିଦ୍ୟାଳୟ ଓ ପଞ୍ଚାୟତସ୍ଥିତ ଶନି ମନ୍ଦିର ପରିସରରେ ନିର୍ମିତ ଗ୍ରାମାଞ୍ଚଳ ପାର୍କ ନିର୍ମାଣ କାର୍ଯ୍ୟ ସ୍ଥିତି ପରଖିଛନ୍ତି ବରୀ ବିଧାୟିକା ସୁନନ୍ଦା ଦାସ। ବିଧାୟିକା ଦାସଙ୍କ ସମେତ ସ୍ଥାନୀୟ ସରପଞ୍ଚ ଜୟନ୍ତୀ ସାହୁ, ବିଡିଓ ଅବନିକାନ୍ତ ସାହୁ, ସହକାରୀ ନିର୍ବାହୀ ଯନ୍ତ୍ରୀ ସୋନାଲି ଧଳ, କନିଷ୍ଠଯନ୍ତ୍ରୀ ସୁଚିସ୍ମିତା ବିଶ୍ୱାଳ, ଯୁବନେତା ଅଶୋକ କୁମାର ସାହୁ ପ୍ରମୁଖ ଘଟଣାସ୍ଥଳ ପରିଦର୍ଶନ କରିଥିଲେ। ବିଦ୍ୟାଳୟ ରୂପାନ୍ତରଣର ଦ୍ୱିତୀୟ ପର୍ଯ୍ୟାୟରେ ସାମିଲ ହୋଇଥିବା ଜବାହରଲାଲ ନେହେରୁ ଉଚ୍ଚ ବିଦ୍ୟାଳୟର ନିର୍ମାଣ କାର୍ଯ୍ୟ ଏବେ ବି ସରିନାହିଁ। ଏହି ପର୍ଯ୍ୟାୟରେ ରୂପାନ୍ତରଣ ହୋଇଥିବା ବିଦ୍ୟାଳୟଗୁଡିକ ଲୋକାର୍ପଣ ହୋଇସାରିଛି। ସମ୍ପୃକ୍ତ ବିଦ୍ୟାଳୟକୁ ବ୍ୟବହାର କରାଯାଇ ପିଲାଙ୍କୁ ଶିକ୍ଷାଦାନ କରାଯାଉଛି। ତେବେ ଏଠାରେ ବିଦ୍ୟାଳୟ ନିର୍ମାଣ ପୂର୍ଣ୍ଣାଙ୍ଗକରଣରେ ବିଳମ୍ବ ହେଉଥିବାରୁ ପିଲାଙ୍କର ପାଠପଢ଼ାରେ ବାଧା ଉପୁଜୁଛି। ଏହାକୁ ନେଇ ବିଧାୟିକା ଅସନ୍ତୋଷବ୍ୟକ୍ତ କରିଥିଲେ। ଏଥିସହିତ ନିର୍ମାଣ କାର୍ଯ୍ୟ ତୁରନ୍ତ ଶେଷ କରିବାକୁ ନିର୍ଦ୍ଦେଶ ଦେଇଥିଲେ। ଏହାଛଡ଼ା ବିଧାୟିକା ତୃତୀୟ ପର୍ଯ୍ୟାୟ ରୂପାନ୍ତରଣରେ ସାମିଲ ଶ୍ରୀଜଗନ୍ନାଥ ହାଇସ୍କୁଲ୍, ବିରଭାନପୁର ବିଦ୍ୟାଳୟସ୍ଥିତି ପରଖିବା ସହ ନିର୍ମାଣ କାର୍ଯ୍ୟ ତୁରନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ। ମାର୍ଚ୍ଚ,୨୦୨୩ ସୁଦ୍ଧା ନିର୍ମାଣ ଶେଷ କରାଯିବା ଉପରେ ଗୁରୁତ୍ୱ ଦିଆଯାଇଛି। ଉକ୍ତ ନିର୍ମାଣ ଶେଷ ହେବା ସହ ଉକ୍ତ ବିଦ୍ୟାଳୟକୁ ନିର୍ଦ୍ଧାରିତ ସମୟସୀମା ମଧ୍ୟରେ ଲୋକାର୍ପଣ କରାଯିବାକୁ ଲକ୍ଷ୍ୟ ରଖାଯାଇଛି। ପରେ ବିଧାୟିକା ମଙ୍ଗରାଜପୁର ଗାଁର ପ୍ରସିଦ୍ଧ ଶନି ମନ୍ଦିର ସ୍ଥିତି ବୁଲି ଦେଖିଥିଲେ। ବର୍ଷା ଦିନରେ ମନ୍ଦିରରେ ପାଣି ପଶି ଯାଉଥିବା ସମ୍ପର୍କରେ ସ୍ଥାନୀୟ ଲୋକେ ବିଧାୟିକାଙ୍କୁ ଜଣାଇଥିଲେ। ବିଧାୟିକା ଦାସ ମନ୍ଦିର ପରିସରରେ ଏକ ଗ୍ରାମାଞ୍ଚଳ ପାର୍କ ନିର୍ମାଣ କରିବା ସହ ମନ୍ଦିର ଉନ୍ନତୀକରଣ କାର୍ଯ୍ୟ ତୁରନ୍ତ ଶେଷ କରିବାକୁ ବିଡିଓ ସାହୁଙ୍କୁ ନିର୍ଦ୍ଦେଶ ଦେଇଥିଲେ। ଆବଶ୍ୟକ ଅର୍ଥ ବିଧାୟିକାଙ୍କ ପାଣ୍ଠିରୁ ଭରଣା କରାଯିବ ବୋଲି ସେ ସୂଚନା ଦେଇଥିଲେ। ବିଧାୟକା ପଞ୍ଚାୟତ ମିଶନ ଶକ୍ତି ଗୃହ ନିର୍ମାଣ ସ୍ଥଳ ବୁଲି ଦେଖିଥିଲେ।