ଭୁବନେଶ୍ୱର,୮।୧(ବ୍ୟୁରୋ): ରାଜ୍ୟ ସରକାରଙ୍କ ପକ୍ଷରୁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଅନ୍ତର୍ଗତ ସ୍ମାର୍ଟକାର୍ଡ ସାରା ରାଜ୍ୟରେ ବଣ୍ଟନ କରାଯାଉଛି। ଏଥିପାଇଁ ମୁଖ୍ୟମନ୍ତ୍ରୀ ବିଭିନ୍ନ ଜିଲାକୁ ଗସ୍ତ କରି ଏହି ଯୋଜନାର ଶୁଭାରମ୍ଭ କରିଛନ୍ତି। ଏହି ଗସ୍ତ ତଥା ସ୍ବାସ୍ଥ୍ୟ କାର୍ଡ ବଣ୍ଟନ କେବଳ ପ୍ରହସନ। ପୌର ଓ ପଞ୍ଚାୟତ ନିର୍ବାଚନକୁ ଦୃଷ୍ଟିରେ ରଖି ବିଜେଡି ସରକାର ଏଭଳି ଲୋକଦେଖାଣିଆ ପଦକ୍ଷେପ ଗ୍ରହଣ କରିଥିବା ବରିଷ୍ଠ କଂଗ୍ରେସ ନେତା ତଥା ପୂର୍ବତନ ଅର୍ଥମନ୍ତ୍ରୀ ପଞ୍ଚାନନ କାନୁନ୍ଗୋ ଅଭିଯୋଗ କରିଛନ୍ତି। ଏ ନେଇ କାନୁନ୍ଗୋ ପ୍ରେସ ବିବୃତି ଜରିଆରେ କହିଛନ୍ତି, ଏହି ସହାୟତା ପାଇଁ ରାଜ୍ୟରେ ୯୬.୫ ଲକ୍ଷ ପରିବାରକୁ ଚୟନ କରାଯାଇଛି। ଏମାନଙ୍କୁ ସ୍ବାସ୍ଥ୍ୟ ସେବା ଯୋଗାଇବା ପାଇଁ ସମୁଦାୟ ୧୫୦କୋଟି ବ୍ୟୟବରାଦ ରଖାଯାଇଛି। ସବୁଠାରୁ ଉଦ୍ବେଗର କଥା ହେଉଛି, ସରକାର କେବଳ ବିଜ୍ଞାପନରେ ୧୦୦ କୋଟି ଟଙ୍କା ଖର୍ଚ୍ଚ କରିସାରିଲେଣି। ପ୍ରତି ପରିବାର ପିଛା ଧାର୍ଯ୍ୟ କରାଯାଇଥିବା ୭.୫୦ ଲକ୍ଷ ଟଙ୍କାରେ କେବଳ ୨ପ୍ରତିଶତ ହିତାଧିକାରୀ ଯଦି ଚିକିତ୍ସିତ ହେବେ, ତେବେ ବି ୧୪, ୫୦୦ କୋଟି ଟଙ୍କା ଆବଶ୍ୟକ। ତେଣୁ ଏହାକୁ ଠିକ୍ ଭାବେ କାର୍ଯ୍ୟକାରୀ କରିବାକୁ ହେଲେ ବର୍ତ୍ତମାନର ସ୍ବାସ୍ଥ୍ୟ ବଜେଟକୁ ୩ ଗୁଣ କରାଯିବା ଆବଶ୍ୟକ। ଏହିସବୁ ସରକାର କରିପାରିବେ କି? ଏହି କାର୍ଡଧାରୀ କୌଣସି ଅସୁବିଧାର ସମ୍ମୁଖୀନ ହେଲେ ଏହାର ସମାଧାନ ପାଇଁ ସରକାର କ’ଣ ଚିନ୍ତା କରିଛନ୍ତି ବୋଲି ପଞ୍ଚାନନ ପ୍ରଶ୍ନ କରିଛନ୍ତି। ଏଥିସହ ସେ ରାଜ୍ୟ ସରକାରଙ୍କ ଆଭିମୁଖ୍ୟ ଓ କାର୍ଯ୍ୟଧାରାକୁ ନେଇ ସେ ସମାଲୋଚନା କରିଛନ୍ତି।
