ବାଲିଆପାଳ,୪।୧: ଡାହାଣୀ ସନ୍ଦେହରେ ଗାଁରୁ ତଡା ଖାଇଥିବା ଏକ ଦମ୍ପତିଙ୍କୁ ଅସହାୟ ଅବସ୍ଥାରେ ସୋମବାର ଉଦ୍ଧାର କରାଯାଇଛି। ଉକ୍ତ ଦମ୍ପତି ହେଲେ ବାଲେଶ୍ୱର ଜିଲା ବାଲିଆପାଳ ବ୍ଲକର ଶ୍ରୀରାମପୁର ପଞ୍ଚାୟତ ମହିଷାମୁଣ୍ଡା ଗ୍ରାମର ଲୁସ୍କୁ ଟୁଡୁ ଓ ତାଙ୍କ ସ୍ତ୍ରୀ ରୁକ୍ମିଣୀ। ବାଲିଆପାଳ ତହସିଲଦାରଙ୍କ ନିର୍ଦ୍ଦେଶରେ ଅତିରିକ୍ତ ରାଜସ୍ବ ନୀରିକ୍ଷକ ନିରଞ୍ଜନ ସିଂ ସେମାନଙ୍କୁ ଉଦ୍ଧାର କରି ନିଖିରା ପଞ୍ଚାୟତ ପାଳପଡ଼ା ୱାର୍ଡ଼ମେମ୍ବର ତଥା ତାଙ୍କ ସମ୍ପର୍କୀୟ ସରସ୍ବତୀ ହେମ୍ବ୍ରମଙ୍କ ଘରେ ଆଶ୍ରୟ ଦେଇଛନ୍ତି।
କିଛିମାସ ପୂର୍ବରୁ ଲୁସ୍କୁଙ୍କ ବଡ଼ଭାଇଙ୍କ ଦୁଇ ପୁଅ ରୋଗରେ ପଡ଼ି ମୃତ୍ୟୁବରଣ କରିଥିଲେ। ମୃତ୍ୟୁ ପାଇଁ ଲୁସ୍କୁଙ୍କ ସ୍ତ୍ରୀ ରୁକ୍ମିଣୀଙ୍କୁ ସନ୍ଦେହ କରି ତାଙ୍କ ବଡଭାଇ ଗ୍ରାମବାସୀଙ୍କୁ ଜଣାଇଥିଲେ। ପରେ ଗ୍ରାମବାସୀ ଲୁସ୍କୁଙ୍କ ଘରକୁ ଯାଇ ଉଭୟ ସ୍ତ୍ରୀସ୍ବାମୀଙ୍କୁ ମୟୂରଭଞ୍ଜର ଏକ ତାନ୍ତ୍ରିକ ପାଖକୁ ନେଇଯାଇଥିଲେ। ଉକ୍ତ ତାନ୍ତ୍ରିକ ଜଣକ ଉଭୟ ଦମ୍ପତି ଡାହାଣୀ ବୋଲି ଗ୍ରାମବାସୀଙ୍କୁ ଜଣାଇଥିଲେ। ପରେ ଗ୍ରାମବାସୀ ସେମାନଙ୍କୁ ମାର୍ପିଟ କରିବା ସହିତ ଜବରଦସ୍ତ ସାଧା କାଗଜରେ ଲେଖି ଟିପ ଚିହ୍ନ ନେଇ ଗ୍ରାମରୁ ତଡ଼ି ଦେଇଥିଲେ। ସେମାନେ ଭୟରେ ଗାଁରୁ ପଳାଇ ଆସି ଅନ୍ୟ ଏକ ଗ୍ରାମ ରାସ୍ତାର ପାଣି ନିଷ୍କାସନ ପାଇଁ ପଡ଼ିଥିବା ହ୍ୟୁମ୍ପାଇପ୍ ତଳେ ହାଡ଼ଭଙ୍ଗା ଶୀତ କାକରରେ ଦୟନୀୟ ଅବସ୍ଥାରେ ଜୀବନ ବିତାଉ ଥିଲେ। ଏହି ସମ୍ପର୍କରେ ବାଲିଆପାଳ ତହସିଲଦାର ଦୀପକ ଦାସ ଖବର ପାଇଥିଲେ। ତହସିଲଦାରଙ୍କ ନିର୍ଦ୍ଦେଶକ୍ରମେ ଦମ୍ପତିଙ୍କୁ ଉଦ୍ଧାର କରାଯାଇଥିଲା। ଦମ୍ପତିଙ୍କ ଲିଖିତ ଅଭିଯୋଗକୁ ଭିତ୍ତି କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ବାଲିଆପାଳ ତହସିଲଦାର କହିଛନ୍ତି।