ନୂଆପଡା ଅଫିସ, ୪ା୩: ନୂଆପଡା ସଦର ବ୍ଲକ ଟାନୱାଟଠାରୁ କେରମେଲି ଦେଇ ପେଠିଆପାଲି ପର୍ଯ୍ୟନ୍ତ ପାହାଡିଆ ରାସ୍ତା ବିପର୍ଯ୍ୟସ୍ତ ଅବସ୍ଥାରେ ରହିଛି। ଗେଟି ପଥର ବାହାରି ରାସ୍ତାସାରା ବିଛେଇ ହୋଇ ପଡିଥିବାରୁ ଯାତାୟାତରେ ସମସ୍ୟା ସୃଷ୍ଟି କରୁଛି। ଦୀର୍ଘବର୍ଷ ହେଲା ଦାବି ହୋଇ ଆସୁଥିଲେ ହେଁ ଏଥିପ୍ରତି ଧ୍ୟାନ ଦିଆଯାଉନାହିଁ। କିଛି ଦିନତଳେ ଏହି ରାସ୍ତା ନିର୍ମାଣ ପାଇଁ ଅଞ୍ଚଳବାସୀ ଓ ଜଲା ଆଦିବାସୀ କଲ୍ୟାଣ ସଂଘ ଗ୍ରାମ୍ୟ ଉନ୍ନୟନ ବିଭାଗ କାର୍ଯ୍ୟାଳୟ ଘେରାଉ କରିଥିଲେ। ବୁଧବାର ଜିଲାପାଳ ହେମକାନ୍ତ ସାଏ ଘଟଣାସ୍ଥଳକୁ ଯାଇ ରାସ୍ତାର ସ୍ଥିତି ଅନୁଧ୍ୟାନ କରିଥିଲେ। ପରେ ଜିଲା ଗ୍ରାମ୍ୟ ଉନ୍ନୟନ ବିଭାଗକୁ ଶୀଘ୍ର ରାସ୍ତା ନିର୍ମାଣ ପାଇଁ ନିର୍ଦ୍ଦେଶ ଦେଇଥିଲେ। ବିଭାଗ ପକ୍ଷରୁ ଶୀଘ୍ର ଟଙ୍କା ମଞ୍ଜୁର କରି ବର୍ଷାଋତୁ ପୂର୍ବରୁ ରାସ୍ତା କାମ ଆରମ୍ଭ କରାଯିବ ବୋଲି ବିଭାଗ ପକ୍ଷରୁ ସୂଚନା ମିଳିଛି ା ଜିଲାପାଳଙ୍କ କ୍ଷେତ୍ର ଅନୁଧ୍ୟାନ ସମୟରେ ଗ୍ରାମ୍ୟ ଉନ୍ନୟନ ବିଭାଗ ଏସ୍ଡିଓ, ଜେଇଙ୍କ ସହ ଜିଲା ପରିଷଦ ସଦସ୍ୟ ଭାନୁପ୍ରତାପ ସିଂ ମାଝି, ବିହାରି ବିଶ୍ୱାଳ, ବାଳକୃଷ୍ନ ଶବର, ଭକ୍ତବନ୍ଧୁ ଧରୁଆ, ଜୟାନନ୍ଦ ମାଝି ପ୍ରମୁଖ ଉପସ୍ଥିତ ଥିଲେ ା ସୂଚନାଯୋଗ୍ୟ ଯେ, ୩୫୩ ନମ୍ବର ଜାତୀୟ ରାଜପଥ ଟାନୱାଟ ଛକଠାରୁ କେରମେଲି ଦେଇ ପେଠିଆପାଲି ପର୍ଯ୍ୟନ୍ତ ପ୍ରାୟ ୧୪ କିଲୋମିଟର ଜଙ୍ଗଲ ଓ ପାହାଡିଆ ରାସ୍ତା ଖାଲଖମାରେ ଭରି ଯାଇଛି। ଏହି ରାସ୍ତା ସୁନାବେଡାକୁ ମଧ୍ୟ ସଂଯୋଗ କରୁଛି ା ଲୋକେ ନୂଆପଡା ଦେଇ ସୁନାବେଡା ଗଲେ ଏହି ରାସ୍ତା ଦେଇ ଯାଇଥାନ୍ତି ା ରାସ୍ତା ନିର୍ମାଣ ପାଇଁ ଜିଲା ପ୍ରଶାସନ ପକ୍ଷରୁ ପଦକ୍ଷେପ ନିଆ ଯାଉଥିବା ଜାଣିଲଶ ପରେ ଅଞ୍ଚଳବାସୀ ଖୁସିବ୍ୟକ୍ତ କରିଛନ୍ତି ା