ଦେବଗଡ,୬ା୧୨(ଡ଼ି.ଏନ୍.ଏ.)- ପଶ୍ଚିମ ଓଡିଶା କୃଷକ ସଙ୍ଗଠନର ଆହ୍ବାନ କ୍ରମେ କେନ୍ଦ୍ର ସରକାରଙ୍କ ନୂତନ କୃଷିନୀତିର ଦୃଢ ପ୍ରତିବାଦ କରାଯିବା ସହ ଚାଷୀଙ୍କର ବିଭିନ୍ନ ସମସ୍ୟାର ସମାଧାନ ଦାବିରେ ଶନିବାର ଦେବଗଡ ଜିଲା କୃଷକ ସଂଘ ପକ୍ଷରୁ ରାସ୍ତାରୋକୋ ଆନ୍ଦୋଳନ କରାଯାଇଥିଲା ା ଶନିବାର ପୂର୍ବାହ୍ନ ୧୧ଟାରେ ଜିଲା କୃଷକ ସଂଘର ସଭାପତି ପ୍ରମୋଦ କୁମାର ଝାଙ୍କର, ସମ୍ପାଦକ ଯଯାତି କିଶୋର ବିଶ୍ୱାଳ, ବିଜୟ କୁମାର ପ୍ରଧାନ, ସଂଗ୍ରାମଜିତ କୁଅଁର, ପବିତ୍ର ପ୍ରଧାନ ଓ ମକରଧ୍ୱଜ ପ୍ରଧାନଙ୍କ ନେତୃତ୍ୱରେ ଜିଲାର ବହୁ ଚାଷୀ ଦେବଗଡ ପୌରାଞ୍ଚଳର ପୁରୁଣାଗଡ ପେଟ୍ରୋଲ ପମ୍ପ ଛକଠାରେ ଏକତ୍ରିତ ହୋଇ ରାସ୍ତା ଉପରେ ଧାନବସ୍ତା ରଖି ବିଭିନ୍ନ ସ୍ଲୋଗାନ ସହ ରାସ୍ତାରୋକୋ ଆନ୍ଦୋଳନ କରିଥିଲେ ା ଏହି ଅବସରରେ ଆନ୍ଦୋଳନକାରୀମାନେ ଧାନ ବିକ୍ରି ନିମନ୍ତେ ରାଜ୍ୟସ୍ତରରେ ଟୋକନ ପ୍ରସ୍ତୁତ କରା ନ ଯାଇ ଜିଲାସ୍ତରରେ ଟୋକନ ପ୍ରସ୍ତୁତ କରାଯିବା, ଦେବଗଡ ଜିଲାର ଅଣଜଳସେଚିତ ଅଞ୍ଚଳର ଚାଷୀଙ୍କ ଠାରୁ ୧୩ କୁଇଣ୍ଟାଲ ପରିବର୍ତ୍ତେ ୨୦ କୁଇଣ୍ଟାଲ ଲେଖାଏଁ ଓ ଜଳସେଚିତ ଅଞ୍ଚଳର ଚାଷୀମାନଙ୍କ ନିକଟରୁ ୧୯ ପରିବର୍ତ୍ତେ ୨୫ କୁଇଣ୍ଟାଲ ଲେଖାଏଁ ଧାନ କ୍ରୟ କରାଯିବାକୁ ଦାବି କରିଥିଲେ ା ଫଳରେ ୪୯ ନମ୍ବର ଓ ୫୩ ନମ୍ବର ଜାତୀୟ ରାଜପଥରେ ଯାନବାହାନ ଚଳାଚଳ ସମ୍ପୂର୍ଣ୍ଣ ଭାବେ ବନ୍ଦ ରହିଥିଲା ା ପ୍ରାୟ ୧୨ଟା ୩୦ ମିନିଟ ସମୟରେ ପୋଲିସ ଜିଲା କୃଷକ ସଂଘର ସଭାପତି ଶ୍ରୀ ଝାଙ୍କରଙ୍କ ସମେତ ଆନ୍ଦୋଳନରତ ୧୫ ଜଣ ଚାଷୀଙ୍କୁ ଗିରଫ କରିଥିଲା। ଫଳରେ ରାସ୍ତାରୋକୋ ଆନ୍ଦୋଳନ ପ୍ରତ୍ୟାହୃତ ହେବା ସହ ଯାନବାହାନ ଚଳାଚଳ ସ୍ବାଭାବିକ ହୋଇଥିଲା ା ପରେ ଗିରଫ ଚାଷୀମାନଙ୍କୁ ପୋଲିସ ଥାନାରୁ ଛାଡିଦେଇଥିବା ଜଣାପଡିଛି ା