ନୂଆପଡ଼ା ଅଫିସ,୧୭।୧୦: ଜିଲା ସୂଚନା ବିଜ୍ଞାନକେନ୍ଦ୍ରର ୱେବସାଇଟ ବର୍ଷ ବର୍ଷ ଧରି ଅପଡେଟ ନ ହେବା ସହିତ ଅନେକ ଭୂଲ ତଥ୍ୟ ଦିଆଯାଉଥିଲା। ଏ ସମ୍ପର୍କିତ ଖବର ଗତ ୧୨ ତାରିଖରେ ଧରିତ୍ରୀ ଖବର କାଗଜରେ ପ୍ରକାଶ ପାଇଥିଲା। ଖବର ପ୍ରକାଶ ପାଇଲା ପରେ ଜିଲା ସୂଚନା ବିଜ୍ଞାନ କେନ୍ଦ୍ର ତଥା ଜିଲା ପ୍ରଶାସନ ପକ୍ଷରୁ ତପତ୍ରତା ଦେଖାଇ ୱେବସାଇଟକୁ ଅପଡେଟ କରିଛନ୍ତି। ଏହି ୱବସାଇଟରେ ଜିଲାସ୍ତରର ସବୁ ବିଭାଗର ଅଧିକାରୀ, ବ୍ଲକସ୍ତରର ଅଧିକାରୀଙ୍କ ନାମ, ଫୋନ ନମ୍ବର, ଠିକଣା ଉଲ୍ଲେଖ ରହିଥିଲା। ବର୍ତ୍ତମାନ ସବୁକୁ କାଟି ଦିଆଯାଇ କେବଳ ଜିଲାପାଳ, ଆରକ୍ଷୀ ଅଧୀକ୍ଷକ, ପିଡି ଡିଆରଡିଏ, ଅତିରିକ୍ତ ଜିଲାପାଳ, ଉପଜିଲାପାଳ, ବନ୍ୟଜନ୍ତୁ ବିଭାଗ, ଜଙ୍ଗଲ ବିଭାଗ, କେନ୍ଦୁପତ୍ର ବିଭାଗ ଅଧିକାରୀ, ୫ଟି ତହସିଲଦାର ମୋଟ ୧୩ ଜଣଙ୍କ ନାମ ୱେବସାଇଟରେ ଉଲ୍ଲେଖ ରହିଛି। ବାକି ସବୁ କାଟି ଦିଆଯାଇଛି। ଜିଲାରୁ ବ୍ଲକସ୍ତରରେ ଅଧିକ କାର୍ଯ୍ୟ ପଡିଥାଏ। ତେଣୁ ବିଡିଓମାନଙ୍କ ନାମ ନ କାଟି ଏହି ୱେବସାଇଟରେ ରଖାଗଲେ ଲୋକେ ସହଜରେ ଜାଣି ପାରନ୍ତେ। ଗଣମାଧ୍ୟମ ଭୂମିକା ସମାଜରେ ଯାହା ହେବା କଥା ଧରିତ୍ରୀ ଖବର କାଗଜ ନିରପେକ୍ଷ ଭାବେ ତାହାକୁ ତୁଲାଇଛି। ଆଗାମୀ ଦିନରେ ଜିଲାର ଅନେକ ସମସ୍ୟା ବିଷୟରେ ଖବର ପ୍ରକାଶ କରିବ ବୋଲି ଆମେ ଆଶା କରିଛୁ ବୋଲି ବୁଦ୍ଧିଜୀବୀମାନେ କହିଛନ୍ତି।
