କେନ୍ଦୁଝର,୨୩ା୭(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ଚମ୍ପୁଆ ବ୍ଲକ ଜାଲି ପଞ୍ଚାୟତ ନିଶ୍ଚିନ୍ତପୁର ଗ୍ରାମରେ ଥିବା ବେସରକାରୀ ଛାତ୍ରାବାସରେ ଶୋଇଥିବା ବେଳେ ଶନିବାର ରାତିରେ ବିଷାକ୍ତ ସାପ କାମୁଡ଼ାରେ ୩ ଜଣ ଅନ୍ତେବାସୀଙ୍କ ମୃତ୍ୟୁ ହୋଇଛି। ଜଣେ ଛାତ୍ର ଗୁରୁତର ଅବସ୍ଥାରେ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର ହୋଇଛନ୍ତିି। ମୃତକଙ୍କ ମଧ୍ୟରେ ୨ ଜଣ ଛାତ୍ରୀ ଏବଂ ଜଣେ ଛାତ୍ର ଅଛନ୍ତି। ଜଣେ ଅବସରପ୍ରାପ୍ତ ଶିକ୍ଷକ ଖଗେଶ୍ୱର ମହାନ୍ତ ନିଶ୍ଚିନ୍ତପୁର ଗ୍ରାମରେ ଏକ ବେସରକାରୀ ଛାତ୍ରାବାସ କରି ପିଲାଙ୍କୁ ରଖିଥିଲେ। ଉକ୍ତ ଛାତ୍ରାବାସରେ ୯୦ ଜଣ ଅନ୍ତେବାସୀ ରହୁଥିଲେ। ମୃତକମାନେ ହେଲେ ଘଟଗାଁ ବ୍ଲକ ବଡ଼ବେରବେଡ଼ା ଗ୍ରାମର ଗୋବର୍ଦ୍ଧନ ନାଏକଙ୍କ ତୃତୀୟ ଶ୍ରେଣୀରେ ପଢୁଥିବା ଝିଅ ଏଲିନା (୮), ଯୋଡ଼ା ବ୍ଲକ ଉଚ୍ଚବାଲି ଗ୍ରାମର ଛତିଶ କୁମାର ନାଏକଙ୍କ ତୃତୀୟ ଣ୍ରେଣୀରେ ପଢୁଥିବା ଝିଅ ସ୍ନେହାଶ୍ରୀ (୯), ବାମେବାରୀ ଥାନା ନୟାଗଡ଼ ଅଞ୍ଚଳର ମନୋଜ କୁମାର ନାଏକଙ୍କ ପଞ୍ଚମ ଶ୍ରେଣୀରେ ପଢୁଥିବା ପୁଅ ରାଜା (୧୦) ବୋଲି ଜଣାପଡିଛି। ଗୁରୁତର ଜଣକ ହେଲେ ବଡ଼ବିଲ ଥାନା ଠାକୁରାଣୀ ଗ୍ରାମର ରଞ୍ଜନ ନାଏକଙ୍କ ପଞ୍ଚମ ଶ୍ରେଣୀରେ ପଢୁଥିବା ପୁଅ ଆକାଶ (୧୨)। ସମସ୍ତ ଅନ୍ତେବାସୀଙ୍କ ଶୋଇବା ପାଇଁ ଖଟ ଦିଆଯାଇ ନ ଥିବାରୁ ସପ ପକାଇ ତଳେ ଶୋଇଥିଲେ। ବର୍ଷକୁ ଛାତ୍ରୀଛାତ୍ରଙ୍କ ପିଛା ୨୦ ହଜାର ଟଙ୍କା ନେଉଥିବା ବେଳେ ଅସ୍ବାସ୍ଥ୍ୟକର ପରିବେଶରେ ଆଜବେଷ୍ଟସ ଘରେ ଅନ୍ତେବାସୀ ବିପଦପୂର୍ଣ୍ଣ ଭାବେ ରହୁଥିଲେ ବୋଲି ଅଭିଯୋଗ ହୋଇଛି । ଏନେଇ ଜିଲାପାଳ ଆଶିଷ ଠାକରେ ଏହାର ତଦନ୍ତ ଆଦେଶ କରିଥିବା କହିଛନ୍ତି। ତଦନ୍ତ ପାଇଁ ଘଟଣାସ୍ଥଳକୁ ଅତିରିକ୍ତ ତହସିଲଦାର ରମେଶ ଚନ୍ଦ୍ର ନଏକଙ୍କ ସମେତ ୨ ଜଣ ଏବିଇଓ ଗୋବିନ୍ଦ ଚନ୍ଦ୍ର ସାହୁ ନରେନ୍ଦ୍ର କୁମାର ନାଏକ ଘଟଣାସ୍ଥଳକୁ ଯାଇ ତଦନ୍ତ କରି ତହସିଲଦାରଙ୍କୁ ରିପୋର୍ଟ ପ୍ରଦାନ କରିଛନ୍ତି। କୋଚିଂ ସେଣ୍ଟରର ମାଲିକ ଖଗେଶ୍ୱର ମହାନ୍ତ କହିଛନ୍ତି, ସେ ପିଲାମାନଙ୍କ ସହିତ ତଳେ ସବୁଦିନ ଭଳି ଶୋଇଥିଲେ। ତେବେ ଦୁର୍ଭାଗ୍ୟର ବିଷୟ ଏଭଳି ଅଘଟଣ ଘଟିଗଲା।