ନୟାଗଡ଼ ଅଫିସ,୫।୧୦: ବଲାଙ୍ଗୀର-ଖୋର୍ଦ୍ଧା ୫୭ନଂ. ଜାତୀୟ ରାଜପଥ (ଏନ୍ଏଚ୍)ର ନୟାଗଡ ସତ୍ସଙ୍ଗବିହାର ନିକଟବର୍ତ୍ତି ମଜୁରିଆପଲ୍ଲୀ କ୍ଷୁଦ୍ର ପୋଲ ନିର୍ମାଣ କାର୍ଯ୍ୟ ଶେଷ ହୋଇଥିଲେ ମଧ୍ୟ ସଂଯୋଗ ରାସ୍ତା କରାଯାଇ ନ ଥିଲା। ଫଳରେ ଡାଇଭର୍ସନ ରୋଡ୍ରେ ଯାନାବାହନ ଯାତାୟାତ କରୁଥିଲା। ଅନ୍ୟପଟେ ଲଗାଣ ବର୍ଷାରେ ନିକଟସ୍ଥ ବୃନ୍ଦାବନପୁର ଗଁାକୁ ବନ୍ୟାଜଳ ଘେରିରହିଥିଲା। ଜଳ ନିଷ୍କାସନ ପଥ ସଂକୀର୍ଣ୍ଣ ଥିବାରୁ ରବିବାର ଡାଇଭର୍ସନ ରୋଡ୍ରେ ଘାଇ ସୃଷ୍ଟି ହୋଇଥିଲା। ଏଥିଯୋଗୁ ପ୍ରାୟ ୬ଘଣ୍ଟା ଧରି ନୟାଗଡ଼-ଖୋର୍ଦ୍ଧା ଯୋଗାଯୋଗ ବିଚ୍ଛିନ୍ନ ହୋଇପଡିଥିଲା।
ମିଳିଥିବା ସୂଚନା ଅନୁସାରେ ନୟାଗଡ଼ ବ୍ଲକ ଘଡୁଆଳ ପଞ୍ଚାୟତ ସୀମାନ୍ତରେ ନୟାଗଡ ସତ୍ସଙ୍ଗବିହାର ନିକଟ ଜାତୀୟ ରାଜପଥରେ ମଜୁରିଆପଲ୍ଲୀ ପୋଲ ରହିଛି। ଏହି ପୋଲଟି ବିପଦସଙ୍କୁଳ ହେବାରୁ ନୂଆ କ୍ଷୁଦ୍ର ପୋଲ ନିର୍ମାଣ କରାଯାଇ କାମ ଶେଷ ହୋଇଥିଲା। ପ୍ରାୟ ୨ମାସ ବିତିଯାଇଥିଲେ ମଧ୍ୟ ପୋଲର ସଂଯୋଗ ରାସ୍ତା କରାଯାଇ ନ ଥିଲା। ପୁରୁଣା ପୋଲ ବି ପୋତାଯାଇ ନ ଥିଲା। ଡାଇଭର୍ସନ ରୋଡ୍ରେ ଯାନବାହନ ଯାତାୟାତ ଚାଲିଥିଲା। ହେଲେ ଏହି ରାସ୍ତାରେ ଆବଶ୍ୟକ ହ୍ୟୁମ୍ ପାଇପ୍ ଦିଆଯାଇ ନ ଥିଲା। ଲଗାଣ ବର୍ଷା ଯୋଗୁ ପାଣି ନିଷ୍କାସନ ହୋଇପାରି ନ ଥିଲା। ଫଳରେ ଘଡୁଆଳ ପଞ୍ଚାୟତର ବୃନ୍ଦାବନପୁର ଗଁା ଜଳବନ୍ଦୀ ହୋଇ ରହିଥିଲା। ପୂର୍ବାହ୍ନରେ ଡାଇଭର୍ସନ ରୋଡ୍ ଉପରେ ପ୍ରଥମେ ପାଣି ଚାଲିଥିଲା। କିଛିସମୟ ପରେ ଏଠାରେ ଘାଇ ସୃଷ୍ଟି ହେଲା। ଜାତୀୟ ରାଜପଥ କର୍ତ୍ତୃପକ୍ଷ ତରବରିଆ ଭାବେ ଡାଇଭର୍ସନ ରୋଡ୍କୁ କାଟି ଜଳ ନିଷ୍କାସନ କଲେ। ହେଲେ ସକାଳ ୮ଟାରୁ ଜାତୀୟ ରାଜପଥରେ ଯିବାଆସିବା ବନ୍ଦ ହୋଇଗଲା। ଯୁଦ୍ଧକାଳୀନ ଭିତ୍ତିରେ କ୍ଷୁଦ୍ର ପୋଲର ସଞ୍ଜୋଗ ରାସ୍ତା ନିର୍ମାଣ କାର୍ଯ୍ୟ ଚାଲିଲା। ଅପରାହ୍ନ ୨ଟାରେ ପୋଲ ଦେଇ ଯାନବାହନ ଚଳାଚଳ ଆରମ୍ଭ କରିଥିଲା। ନୟାଗଡ ଖୋର୍ଦ୍ଧା ବିଚ୍ଛିନ୍ନ ଯୋଗୁ ରାସ୍ତାର ଉଭୟ କଡରେ ଶତାଧିକ ଯାନବାହାନ ଅଟକି ରହିଥିଲା। ଏଥିଯୋଗୁ ଗୁରୁତର ରୋଗୀମାନେ ଅଯଥା ଖର୍ଚ୍ଚାନ୍ତ ହୋଇ ବିକଳ୍ପ ରାସ୍ତାରେ ଭୁବନେଶ୍ୱର ଓ କଟକ ଯିବାକୁ ବାଧ୍ୟ ହୋଇଥିଲେ। ତେବେ ରାସ୍ତା କାମ କରୁଥିବା ସଂସ୍ଥା ପକ୍ଷରୁ କୁହାଯାଇଛି କରୋନା ଯୋଗୁ ପୋଲର ସଞ୍ଜୋଗ ରାସ୍ତା ନିର୍ମାଣରେ ଅସୁବିଧା ହେଲା। ତେବେ ଏହି ଉତ୍ତର ଲୋକଙ୍କୁ ସନ୍ତୁଷ୍ଟ କରିପାରି ନ ଥିଲା। ଏନ୍ଏଚ୍ର ସହକାରୀ ଯନ୍ତ୍ରୀ ଚନ୍ଦନ ସାହୁ କୁହନ୍ତି, ପାଣି ଜମିବା ଦ୍ୱାରା ଡାଇଭର୍ସନ ରୋଡ୍କୁ କାଟି ପ୍ରଥମେ ବନ୍ୟାଜଳ ନିଷ୍କାସନ କରାଗଲା। ପରେ ପୋଲର ଅସ୍ଥାୟୀ ସଂଯୋଗ ରାସ୍ତା ନିର୍ମାଣ କରାଯାଇ ଯାନବାହନ ଚଳାଚଳ ସ୍ବାଭାବିକ କରାଯାଇଛି। ପାଣି ଶୁଖିଲା ପରେ ପୁଣି ଡାଇଭର୍ସନ ରୋଡ୍ ସାଙ୍ଗକୁ ପୋଲର ସଂଯୋଗ ରାସ୍ତା ନିର୍ମାଣ କରାଯିବ।