କୁଚିଣ୍ଡା,୨୬ା୬(ବିରଞ୍ଚତ୍ ଦର୍କା): ଲଘୁଚାପ ଜନିତ ପ୍ରବଳ ବର୍ଷାରେ କୁଚିଣ୍ଡା-ଫାସିମାଲ ରାସ୍ତା ସର୍ଦ୍ଧାପାଲିଠାରେ ନିର୍ମାଣାଧୀନ ସେତୁ ଡାଇଭର୍ସନ ଧୋଇ ହୋଇଯାଇଛି। ଫଳରେ ଏହା ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି। ବକ୍ସମା ପଞ୍ଚାୟତ ସର୍ଦ୍ଧାପାଲି ନାଳା ଉପରେ ୫ କୋଟି ୩୦ ଲକ୍ଷ ଟଙ୍କା ବ୍ୟୟରେ ପୂର୍ତ୍ତବିଭାଗ ପକ୍ଷରୁ ଠିକାସଂସ୍ଥା ଦ୍ବାରା ନିର୍ମାଣାଧୀନ ଚାଲିଥିବା ସେତୁ ପାଇଁ କରାଯାଇଥିବା ଡାଇଭର୍ସନଟି ସମ୍ପୂର୍ଣ୍ଣ ଧୋଇଯିବା ଦ୍ୱାରା କୁଚିଣ୍ଡା-ସମ୍ବଲପୁର ଭାୟା ଫାଶିମାଲ ଅଞ୍ଚଳ ଏବେ ବାହ୍ୟ ଜଗତରୁ ବିଛିନ୍ନ ହୋଇଯାଇଛି। ଶନିବାରଠାରୁ ଲଗାଣ ବର୍ଷା ଯୋଗୁ ଡାଇଭର୍ସନ ଧୋଇଯିବା ଫଳରେ ସୁବର୍ଣ୍ଣପାଲି, ଗୁଣ୍ଡୁରୁଚୁଆଁ, ଫାଶିମାଲ, କେନାଢିପା, ଚକୁଲିଆବାହାଲ, ମହଦା, ଟିକିବା ଆଦି ପଞ୍ଚାୟତ ଜନସାଧାରଣଙ୍କ ପାଇଁ ଯାତାୟାତରେ ପ୍ରତିବନ୍ଧକ ସୃଷ୍ଟି ହୋଇଛି। ସେତୁ କାମ ଅଧପନ୍ତରିଆ ହୋଇଥିବାରୁ ଏବେ ବର୍ଷା ଦିନେ ଏହି ସବୁ ପଞ୍ଚାୟତର ଜନ ସାଧାରଣଙ୍କ ପାଇଁ କୁଚିଣ୍ଡା ସବଡିଭିଜନ ମୁଖ୍ୟାଳୟ ସହ ସମ୍ପର୍କ ଛିନ୍ନ ହୋଇଥିବାରୁ ବଡ ସମସ୍ୟା ସୃଷ୍ଟି ହେବା ସମ୍ଭାବନା ଦେଖାଦେଇଛି। ଏ ସମ୍ପର୍କରେ ପୂର୍ତ୍ତବିଭାଗ କନିଷ୍ଠ ଯନ୍ତ୍ରୀ ରାଉତରାୟଙ୍କୁ ପଚାରିବାରେ ବର୍ଷା କମିଲେ ଦୁଇଦିନ ମଧ୍ୟରେ ରାସ୍ତା ପୁନଃ ନିର୍ମାଣ କରାଯିବ ବୋଲି କହିଛନ୍ତି।
