ନୂଆଦିଲ୍ଲୀ,୩୦ା୧: ଭାରତୀୟ ଇଣ୍ଟରନ୍ୟାଶନାଲ ମାଷ୍ଟର(ଆଇଏମ୍) ଦିବ୍ୟା ଦେଶମୁଖ ଦର୍ଶକଙ୍କ ନାମରେ ଏକ ଗୁରୁତର ଅଭିଯୋଗ ଆଣିଛନ୍ତି। ନିକଟରେ ଦିବ୍ୟା ନେଦରଲାଣ୍ଡ୍ସର ଓ୍ବିକ୍ ଆନ୍ ଜିରେ ଟାଟା ଷ୍ଟିଲ୍ ମାଷ୍ଟର୍ସ ଟୁର୍ନାମେଣ୍ଟରେ ଅଂଶଗ୍ରହଣ କରିଥିଲେ। ଟୁର୍ନାମେଣ୍ଟରେ ତାଙ୍କ ଖେଳ ପରିବର୍ତ୍ତେ ତାଙ୍କର କେଶ, ପୋଷାକ, ପରିପାଟୀ ଓ ଭାଷା ଉପରେ ଦର୍ଶକ ଟିପ୍ପଣୀ କରିଥିଲେ ବୋଲି ଦିବ୍ୟା କହିଛନ୍ତି। ଏସିଆନ୍ ମହିଳା ଚେସ୍ ଚାମ୍ପିୟନଶିପ୍ ବିଜେତା ନାଗପୁରର ଦିବ୍ୟା ଦେଶମୁଖ ଏକ ଇନଷ୍ଟାଗ୍ରାମ ପୋଷ୍ଟ ଜରିଆରେ ଏହି ଅଭିଯୋଗ ଆଣିଛନ୍ତି। ମହିଳା ଖେଳାଳି ମାନେ ନିୟମିତ ଭାବରେ ଏଭଳି ସ୍ଥିତିର ସମ୍ମୁଖୀନ ହେଉଛନ୍ତି ବୋଲି ଦିବ୍ୟା କହିଛନ୍ତି।
ଏଭଳି ସବୁବେଳେ ହୋଇଥାଏ ତେବେ ବିଗତ ସପ୍ତାହରେ ମୁଁ ଏହି ସମସ୍ୟାର ସମ୍ମୁଖୀନ ହେବା ପରେ ଏହା ଉପେରେ ଲେଖିବାକୁ ବାଧ୍ୟ ହେଲି ବୋଲି ଦିବ୍ୟା କହିଛନ୍ତି। ଚଳିତ ଟୁର୍ନାମେଣ୍ଟରେ କିଛି ମ୍ୟାଚ୍ରେ ଭଲ ପ୍ରଦର୍ଶନ କରିଥିଲି। ଏହାକୁ ନେଇ ମୁଁ ଗର୍ବିତ। ତେବେ ଦର୍ଶକଙ୍କ ମଧ୍ୟରେ ଆଲୋଚନା ମୋତେ ନିରାଶ କରିଛି। ପୁରୁଷ ଖେଳାଳିମାନଙ୍କୁ ଉପଯୁକ୍ତ ସମ୍ମାନ ମିଳୁଥିବା ବେଳେ ମହିଳାଙ୍କୁ ସମ୍ମାନ ମିଳୁ ନ ଥିବା କହିଛନ୍ତି ଦିବ୍ୟା। ଟାଟା ଷ୍ଟିଲ୍ ମାଷ୍ଟର୍ସରେ ଦିବ୍ୟା ୪.୫ ପଏଣ୍ଟ ସହ ୧୨ ତମ ସ୍ଥାନରେ ରହିଥିଲେ।
