ତୁରିନ୍, ୧୪ା୧୧ (ଏପି): ସର୍ବୀୟ ଟେନିସ ଷ୍ଟାର ନୋଭାକ୍ ଜୋକୋଭିଚ୍ ଏଟିପି ଫାଇନାଲ୍ସରେ ହେଲ୍ଗର ରୁନ୍ଙ୍କୁ ୭-୬ (୪), ୬-୭ (୧), ୬–୩ ସେଟ୍ରେ ପରାସ୍ତ କରିଛନ୍ତି। ରବିବାର ବିଳମ୍ବିତ ରାତିରେ ଖେଳାଯାଇଥିବା ଏହି ମ୍ୟାଚ ୩ ଘଣ୍ଟାରୁ ଅଧିକ ସମୟ ଖେଳାଯାଇଥିଲା। ଏହି ବିଜୟ ଦ୍ୱାରା ବର୍ଷ ଶେଷ ର଼୍ୟାଙ୍କିଙ୍ଗ ତାଲିକାରେ ସର୍ବାଧିକ ନମ୍ବର ଓ୍ବାନ ଖେଳାଳି ହେବାରେ ତାଙ୍କ ନାମରେ ରହିଥିବା ରେକର୍ଡ ସଂଖ୍ୟା ୮କୁ ବୃଦ୍ଧି ପାଇଛି। ସୋମବାର ଅପରାହ୍ନରେ ଏଟିପି ସଭାପତି ଆଣ୍ଡ୍ରିଆ ଗଡେଞ୍ଜି ତାଙ୍କର ଏହି ସଫଳତା ପାଇଁ ଜୋକୋଭିଚ୍ଙ୍କୁ ଟ୍ରଫି ପ୍ରଦାନ କରିଥିଲେ। ସର୍ବୀୟ ଖେଳାଳି ପରେ ତାଙ୍କର ଦଳର କୋଚ, ଫିଜିକାଲଟ୍ରେନର ଏବଂ ପରିବାର ସଦସ୍ୟମାନଙ୍କ ସହିତ ମିଳିତ ଫଟୋ ଉଠାଇଥିଲେ। ୩୬ ବର୍ଷୀୟ ଜୋକୋଭିଚ୍ ଦୁଇ ବର୍ଷ ପୂର୍ବେ ପିଟ୍ ସାମ୍ପ୍ରାସ (୬ବର୍ଷ ନମ୍ବର ଓ୍ବାନ)ଙ୍କ ନାମରେ ରହିଥିବ ରେକର୍ଡକୁ ଭଙ୍ଗ କରିଦେଇଥିଲେ। କାର୍ଲୋସ ଅଲକାରାଜ ଏହି ସମ୍ମାନ ଗତବର୍ଷ ଲାଭ କରିଥିଲେ। କିନ୍ତୁ ଜୋକୋଭିଚ ଚଳିତବର୍ଷ ୪ଟି ପ୍ରମୁଖ ଟାଇଟଲ ମଧ୍ୟରୁ ୩ଟିରେ ବିଜୟ ଲାଭ ସହ ଓ୍ବିମ୍ବେଲଡନରେ ଅଲକାରାଜଙ୍କଠାରୁ ହାରି ରନର୍ସ ଅପ୍ ହୋଇ ଦୃଢ଼ ପ୍ରତ୍ୟାବର୍ତ୍ତନ କରିଥିଲେ। ଜୋକୋଭିଚ୍ କହିଛନ୍ତି, ତାଙ୍କ ଜୀବନ ଓ କ୍ୟାରିୟରର ଏହି ପର୍ଯ୍ୟାୟରେ ନମ୍ବର ଓ୍ବାନ ବାସ୍ତବିକ୍ ଖୁବ୍ ଆନନ୍ଦର ବିଷୟ। ଏହି ଟୁର୍ନାମେଣ୍ଟ ପରେ ୪୦୦ ସପ୍ତାହ ପାଇଁ ନମ୍ବର ଓ୍ବାନ ର଼୍ୟାଙ୍କିଙ୍ଗରେ ରହିବାରେ ଜୋକୋଭିଚ୍ ପ୍ରଥମ ଖେଳାଳି ହେବେ। ତାଙ୍କ ପଛକୁ ଫେଡେରର (୩୧୦) ରହିଛନ୍ତି। ଏହି ଦୁଇଜଣକୁ ଛାଡ଼ି ଦେଲେ ଅନ୍ୟ କୌଣସି ଖେଳାଳି ୩୦୦ ଡେଇଁ ପାରି ନାହାନ୍ତି।