କେନ୍ଦୁଝର,୧୯ା୧(ସ୍ବ.ପ୍ର.): କେନ୍ଦୁଝର ଜିଲାରେ ଚିକିତ୍ସିତ ହେଉଥିବା ସମସ୍ତ ଯକ୍ଷ୍ମା (ଟିବି) ରୋଗୀଙ୍କୁ ଜିଲା ଖଣିଜ ପ୍ରତିଷ୍ଠାନ (ଡି.ଏମ୍.ଏଫ୍) ପୋଷ୍ୟ ଭାବେ ଗ୍ରହଣ କରିଛି। କାର୍ଯ୍ୟକ୍ରମର ଅଂଶସ୍ବରୂପ ସମସ୍ତ ଚିକିତ୍ସାଧୀନ ଯକ୍ଷ୍ମାରୋଗୀଙ୍କୁ ଡିଏମ୍ଏଫ୍ ତରଫରୁ ମଙ୍ଗଳବାର ପୁଷ୍ଟିସାର ଖାଦ୍ୟ ଯୋଗାଣର ଶୁଭାରମ୍ଭ କରାଯାଇଛି। ଜିଲାପାଳ ଆଶିଷ ଠାକ୍ରେଙ୍କ ନିର୍ଦ୍ଦେଶକ୍ରମେ କେନ୍ଦୁଝର ସହର ଉପକଣ୍ଠ ନରଣପୁର ସ୍ବାସ୍ଥ୍ୟ ଉପକେନ୍ଦ୍ରଠାରେ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡ. କିଶୋର ପୃଷ୍ଟି ଖାଦ୍ୟ ପୁଡ଼ିଆ ପ୍ରଦାନ କରିଥିଲେ। ଆଗାମୀ ଦିନରେ ଜିଲାର ସମସ୍ତ ସ୍ବାସ୍ଥ୍ୟ ଉପକେନ୍ଦ୍ରରେ ମାସକୁ ଥରେ ସୁଷମ ପୁଷ୍ଟିସାର ଖାଦ୍ୟ ଯକ୍ଷ୍ମାରୋଗୀଙ୍କୁ ଯୋଗାଇଦିଆଯିବ ବୋଲି କୁହାଯାଇଥିଲା।
ଏହି ଅବସରରେ ପୃଷ୍ଟି କହିଥିଲେ, କେନ୍ଦୁଝର ଜିଲା ୨୦୨୫ ସୁଦ୍ଧା ଯକ୍ଷ୍ମା (ଟିବି) ମୁକ୍ତ ଭାରତ ଅଭିଯାନରେ ସାମିଲ୍ ହୋଇଛି। ବର୍ତ୍ତମାନ ଜିଲାରେ ୧୩୫୪ ଜଣ ଯକ୍ଷ୍ମାରୋଗୀ ଚିକିତ୍ସିତ ହେଉଛନ୍ତି। ସମସ୍ତ ଯକ୍ଷ୍ମାରୋଗୀଙ୍କୁ ସର୍ବନିମ୍ନ ଛଅ ମାସ ପର୍ଯ୍ୟନ୍ତ ପୁଷ୍ଟିସାର ଖାଦ୍ୟ ଯୋଗାଇଦେବା ପାଇଁ ଡିଏମ୍ଏଫରୁ ବାର୍ଷକ ୪ ଶହ କୋଟି ଟଙ୍କାର ସହାୟତା ପ୍ରଦାନ କରାଯାଇଛି। ଖାଦ୍ୟ ବଣ୍ଟନ ପାଇଁ ମିଶନ ଶକ୍ତିର ଜିଲାସ୍ତରୀୟ ମହାସଂଘକୁ ଦାୟିତ୍ୱ ଦିଆଯାଇଛି। ଯକ୍ଷ୍ମା ଦୂରୀକରଣ ନିମନ୍ତେ ଏକ ସାମଗ୍ରୀକ ସହଯୋଗର ଆବଶ୍ୟକତା ରହିଛି। ଦେଶର ସମସ୍ତ କ୍ଷେତ୍ରରେ ଏହା ଏକ ଜନ ଆନ୍ଦୋଳନର ରୂପ ନେଲେ ହିଁ ୨୦୨୫ ସୁଦ୍ଧା ଦେଶକୁ ଟିବି ମୁକ୍ତ କରିବାର ଲକ୍ଷ୍ୟ ସାଧିତ ହୋଇପାରିବ ବୋଲି ସେ କହିଥିଲେ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲା ଜନସ୍ବାସ୍ଥ୍ୟ ଅଧିକାରୀ (ଟିବି) ଡ. ଦେବେନ ଦାସ, ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ସୁପରିଣ୍ଟେଣ୍ଡେଣ୍ଟ୍ ଡ. ଶିବ ଚରଣ ବାଗ୍, ଡିପିଏମ୍ ଏନ୍ଏଚ୍ଏମ୍ ନିତ୍ୟରଞ୍ଜନ ବରାଳ, ସୂଚନା ଓ ଲୋକ ସମ୍ପର୍କ ଉପନିର୍ଦ୍ଦେଶକ ସଞ୍ଜୀବ ବାରିକ, ଡିପିସି (ଟିବି) ଏନ୍ଏଚ୍ଏମ୍ ତାପସ ରଞ୍ଜନ ଜେନା, ପିପିସି (ଟିବି) ବିଶ୍ୱଜିତ୍ ନନ୍ଦ, ଡିଏମ୍ଏଫର ସିନିୟର ପ୍ରୋଜେକ୍ଟ୍ ଅଫିସର ଡ. ମୃଣାଳିନୀ ମନ୍ୟତ୍କର, ସିନିୟର ପ୍ରୋଜେକ୍ଟ୍ ଅଫିସର ଡ. ରୀନା ନାୟକ, ଡିପିସି ମିଶନ ଶକ୍ତି ଶିଶିର ଷଡ଼ଙ୍ଗି, ଜିଲା ଯକ୍ଷ୍ମା ନିୟନ୍ତ୍ରଣ କାର୍ଯ୍ୟାଳୟର କର୍ମକର୍ତ୍ତାଙ୍କ ସହିତ ସ୍ବାସ୍ଥ୍ୟ ଉପକେନ୍ଦ୍ରର ଏଏନ୍ଏମ୍, ସିଏଚ୍ଓ, ଆଶାକର୍ମୀ ପ୍ରମୁଖ ଉପସ୍ଥିତ ଥିଲେ।