ଦୁବାଇ,୧୭।୧୦: ୟୁଏଇ ଏବଂ ଓମାନଠାରେ ରବିବାର ଆରମ୍ଭ ହୋଇଯାଇଛି ଟି୨୦ ବିଶ୍ୱକପ୍। ଏହି କ୍ରିକେଟ ମହାକୁମ୍ଭ ପୂର୍ବରୁ ଭାରତୀୟ ଦଳର ଖେଳାଳିଙ୍କୁ ଏକ ସ୍ବତନ୍ତ୍ର ମେସେଜ ଦେଇଛନ୍ତି ପୂର୍ବତନ ଭାରତୀୟ କ୍ରିକେଟର ସୁରେଶ ରାଇନା। ତାଙ୍କ ମତରେ ଟି୨୦ ଫର୍ମାଟର ଅଧିନାୟକ ପଦରୁ ବିଦାୟ ନେବାକୁ ଯାଉଥିବା ବିରାଟ କୋହଲି ସାଥି ଖେଳାଳିଙ୍କ ଠାରୁ ବିଦାୟୀ ଉପହାର ପାଇବାକୁ ଯୋଗ୍ୟ।
ଆଇସିସି ପୁରୁଷ ଟି୨୦ ବିଶ୍ୱକପ୍ ପୂର୍ବରୁ ଟିମ୍ ଇଣ୍ଡିଆ ପାଇଁ ଏକ ସରଳ ମେସେଜ, କୋହଲିଙ୍କ ପାଇଁ କର। ସମ୍ଭବତଃ ଅଧିନାୟକ ଭାବେ ଏହି ଟୁର୍ନାମେଣ୍ଟ ତାଙ୍କ ପାଇଁ ଅନ୍ତିମ ଇଭେଣ୍ଟ ହୋଇପାରେ। ଏଣୁ ପ୍ରତ୍ୟେକ ଖେଳାଳିଙ୍କୁ ନିଜ ଉପରେ ବିଶ୍ୱାସ ରଖିବାକୁ ପଡ଼ିବ ବୋଲି ଆଇସିସି ପାଇଁ ଏକ ସ୍ତମ୍ବରେ ରାଇନା ଉଲ୍ଲେଖ କରିଛନ୍ତି।
ଟି୨୦ ବିଶ୍ୱକପ୍ ପୂର୍ବରୁ ଆମର ସମସ୍ତ ଖେଳାଳିମାନେ ୟୁଏଇରେ ଖେଳାଯାଇଥିବା ଆଇପିଏଲର ଦ୍ୱିତୀୟ ଫେଜରେ ଖେଳିଥିଲେ। ଏହା ଦ୍ୱାରା ସେମାନେ ନିଶ୍ଚିତ ଲାଭବାନ ହେବେ। ଏହି କାରଣରୁ ଟିମ୍ ଇଣ୍ଡିଆ ଅନ୍ୟ ଦଳମାନଙ୍କ ଅପେକ୍ଷା ଆଗରେ ରହିବ। ମୋ ମତରେ ଭାରତ ସବୁଠୁ ବଡ଼ ଫେଭରାଇଟ୍ ବୋଲି ରାଇନା ଉଲ୍ଲେଖ କରିଛନ୍ତି।
