ଛାଡ଼ି ଯାଅ ନାହିଁ ଜମ୍ମୁ-କଶ୍ମୀର, ଆମେ ସବୁ ଅଛୁ ସାଥିରେ, କଶ୍ମୀର ପଣ୍ଡିତଙ୍କୁ ମୁସଲମାନଙ୍କ ଅନୁରୋଧ…

ଶ୍ରୀନଗର, ୪।୬ : ଗତ କିଛି ଦିନ ହେବ ଜମ୍ମୁ-କଶ୍ମୀରରେ ଆତଙ୍କବାଦୀମାନେ କଶ୍ମୀରୀ ପଣ୍ଡିତଙ୍କ ସମେତ ଅଣ-ମୁସଲମାନ ଲୋକଙ୍କୁ ଟାର୍ଗେଟ କରୁଛନ୍ତି। ଉପତ୍ୟକାରେ ହିଂସା ବୃଦ୍ଧି ପାଉଥିବାରୁ ଲୋକଙ୍କ ତଥା ସରକାରଙ୍କ ଚିନ୍ତା ବ ଢ଼ିଚାଲିଛି। ଜମ୍ମୁ-କଶ୍ମୀରରେ ରହୁଥିବା ସଂଖ୍ୟାଲଘୁ ହିନ୍ଦୁମାନଙ୍କ ମଧ୍ୟରେ ଆତଙ୍କ ଖେଳିଯାଇଛି। ଆତଙ୍କବାଦୀଙ୍କ ନିଷ୍ଠୁର କାର୍ଯ୍ୟକୁ ସମସ୍ତେ ଦୃଢ଼ ନିନ୍ଦା କରୁଛନ୍ତି। ଜମ୍ମୁ-କଶ୍ମୀର ରହୁଥିବା ମୁସଲମାନମାନେ କଶ୍ମୀରୀ ପଣ୍ଡିତଙ୍କ ସମର୍ଥନରେ ଠିଆ ହୋଇଛନ୍ତି। ଫଳରେ ଏଠାରେ ଭାଇଚାରା ବଢ଼ିବାରେ ଲାଗିଛି।

୩୨ ବର୍ଷ ଇତିହାସରେ ପ୍ରଥମ ଥର ପାଇଁ ଶୁକ୍ରବାର ଜମ୍ମୁ-କଶ୍ମୀର ପ୍ରାୟ ସମସ୍ତ ପ୍ରମୁଖ ମସଜିଦରୁ ଜୁମା ନମଜା ପାଠ ପରେ ଆତଙ୍କବାଦୀଙ୍କ ନିକଟକୁ ଏକ ବାର୍ତ୍ତା ପଠାଯାଇଛି। ନିରୀହ ଲୋକଙ୍କୁ ହତ୍ୟା କରିବା ଇସଲାମରେ ଅପରାଧ ଅଟେ। ଏହି ବାର୍ତ୍ତା ମାଧ୍ୟମରେ କଶ୍ମୀରୀ ପଣ୍ଡିତ ଏବଂ ସାଧାରଣ ଲୋକଙ୍କ ହତ୍ୟାକୁ ଦୃଢ଼ ଭାବେ ନିନ୍ଦା କରାଯାଇଛି। ନବଭାରତ ଟାଇମ୍ସରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଶୁକ୍ରବାର ପ୍ରାର୍ଥନା ପରେ ମୌଲାନା ଏବଂ ମୁଫତିମାନେ କାଶ୍ମୀରୀ ପଣ୍ଡିତ ତଥା ଅନ୍ୟ ହିନ୍ଦୁ ସଂଖ୍ୟାଲଘୁମାନଙ୍କୁ ଆଶ୍ୱାସନା ଦେଇଛନ୍ତି ଯେ ସେମାନେ କଶ୍ମୀର ଛାଡିବା ଉଚିତ ନୁହେଁ। ନିରୀହ ଲୋକଙ୍କ ହତ୍ୟାରେ ସେମାନେ ଗଭୀର ଦୁଃଖିତ ଏବଂ ହିଂସାକୁ ଦୃଢ଼ ନିନ୍ଦା କରୁଛନ୍ତି। ମୁସଲମାନମାନେ କଶ୍ମୀର ପଣ୍ଡିତଙ୍କ ସାଥିରେ ଅଛନ୍ତି ବୋଲି ମୌଲାନାମାନେ କହିଛନ୍ତି।

ଏଥି ସହିତ, ଶୁକ୍ରବାର ପ୍ରାର୍ଥନା ପରେ ମୁସଲମାନ ସମ୍ପ୍ରଦାୟର ଲୋକମାନେ ବାରମୁଳାରେ ଶାନ୍ତି ପଦଯାତ୍ରା କରିଥିଲେ। ବାରମୁଳା ବ୍ୟତୀତ କୁଲଗାମ, ଶୋପିଆନ, ଶ୍ରୀନଗର, ବନ୍ଦିପୋରା ଏବଂ କୁପୱାରାଠାରେ ଅବସ୍ଥିତ ମସଜିଦରୁ ସଂଖ୍ୟାଲଘୁ ହିନ୍ଦୁଙ୍କ ପ୍ରତି ହିଂସାକୁ ନିନ୍ଦା କରାଯାଇଥିଲା।

ମସଜିଦ ପକ୍ଷରୁ ଦିଆଯାଇଥିବା ବାର୍ତ୍ତାରେ ଏହା ମଧ୍ୟ କୁହାଯାଇଛି ଯେ ଆମ ସମସ୍ତେ ପାକିସ୍ତାନ ସମର୍ଥିତ ଆତଙ୍କବାଦ ବିରୋଧରେ ଏବଂ କଶ୍ମୀରୀ ପଣ୍ଡିତଙ୍କ ସହ ଛିଡା ହୋଇଛୁ। ନାଗରିକ ସମାଜର ଲୋକମାନେ ଶ୍ରୀନଗରର ଲାଲ ଚୌକରେ ଜମାନ ପାଠ କରିବା ପରେ ଆତଙ୍କବାଦୀଙ୍କ କାର୍ଯ୍ୟକୁ ବିରୋଧ କରିଥିଲେ। ଦିଲ୍ଲୀରେ କଶ୍ମୀରରେ ଆତଙ୍କବାଦୀଙ୍କ ଦ୍ୱାରା ନିରୀହ ସାଧାରଣ ନାଗରିକଙ୍କୁ ଟାର୍ଗେଟରେ ହତ୍ୟା କରିବା ପ୍ରସଙ୍ଗରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ନିଷ୍ପତ୍ତି ନିଆଯାଇଛି ଯେ କଶ୍ମୀରୀ ପଣ୍ଡିତମାନେ ଉପତ୍ୟକାରୁ ସମ୍ପୂର୍ଣ୍ଣ ରୂପେ ସ୍ଥାନାନ୍ତରିତ ହେବେ ନାହିଁ, କିନ୍ତୁ ସେମାନଙ୍କୁ ଏକ ସୁରକ୍ଷିତ ସ୍ଥାନକୁ ପଠାଯିବ। ଶୁକ୍ରବାର ଅନୁଷ୍ଠିତ ବୈଠକରେ କେନ୍ଦ୍ରୀୟ ଗୁପ୍ତଚର ଏଜେନ୍ସି କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ କହିଛନ୍ତି ଯେ କଶ୍ମୀର ଉପତ୍ୟକାରେ ବଢୁୁଥିବା ହିଂସା ପାଇଁ ପାକିସ୍ତାନ ଦାୟୀ।

ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଏହି ବୈଠକରେ ସର୍ବସମ୍ମତି କ୍ରମେ କଶ୍ମୀର ପଣ୍ଡିତମାନଙ୍କୁ ସୁରକ୍ଷିତ ସ୍ଥାନକୁ ନିଆଯିବାକୁ ସ୍ଥିର ହୋଇଛି।