ଅହମଦାବାଦ,୫।୧୨ : ଗୁଜରାଟର ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ଭୋଟରମାନେ ଧାଡ଼ି ବାନ୍ଧି ମତଦାନ କେନ୍ଦ୍ରରେ ଭୋଟ ଦେଉଛନ୍ତି। ଏହି ଅବସରରେ ଦିଲ୍ଲୀ ମୁଖ୍ୟମନ୍ତ୍ରୀ ଏବଂ ଆମ ଆଦମୀ ପାର୍ଟି ନେତା ଅରବିନ୍ଦ କେଜରିୱାଲ ସକାଳ ୭ଟା ୪୫ରେ ଟୁଇଟ କରି ଭୋଟରଙ୍କୁ ଏଥର କିଛି ଅଲଗା କରି ଦେଖାଇବାକୁ ଅନୁରୋଧ କରିଛନ୍ତି।
ଆମ ଆଦମୀ ପାର୍ଟି ଏଥର ଗୁଜରାଟରେ ପ୍ରବେଶ କରିବା ପାଇଁ କଠିନ ପରିଶ୍ରମ କରୁଛି। ଦଳ ଭାଜପା ଶାସିତ ରାଜ୍ୟରେ ଏକ ବିଶାଳ ଅଭିଯାନ ଆରମ୍ଭ କରିଛି।
କେଜରିଓ୍ବାଲ ହିନ୍ଦୀରେ ଟୁଇଟ କରି କହିଛନ୍ତି, “ଦ୍ୱିତୀୟ ପର୍ଯ୍ୟାୟରେ ଆଜି ଗୁଜୁରାଟର ୯୩ ଟି ଆସନରେ ମତଦାନ ଅନୁଷ୍ଠିତ ହେଉଛି। ସମସ୍ତ ଭୋଟରଙ୍କୁ ମୋର ଅପିଲ ଏହି ନିର୍ବାଚନ ଗୁଜରାଟର ନୂତନ ଆଶା ଏବଂ ଆକାଂକ୍ଷା ପାଇଁ ହେଉଛି। ଭବିଷ୍ୟତକୁ ଦୃଷ୍ଟିରେ ରଖି ଗୁଜରାଟର ଅଗ୍ରଗତି ପାଇଁ ଭୋଟ ଦିଅନ୍ତୁ। ଏଥର କିଛି ଅଲଗା ଏବଂ ଚମତ୍କାର କରନ୍ତୁ। ”
ସୂଚନାଯୋଗ୍ୟ,ରାଜ୍ୟରେ ଦ୍ୱିତୀୟ ପର୍ଯ୍ୟାୟ ମତଦାନରେ ପ୍ରାୟ ୮୩୩ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏଥିରେ କେନ୍ଦ୍ରୀୟ ଏବଂ ଉତ୍ତର ଗୁଜରାଟର ପ୍ରମୁଖ ଆସନ ଅନ୍ତର୍ଭୁକ୍ତ। ଏଏପି ଏଥର ସମସ୍ତ ୯୩ ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି। ଗତଥର କଂଗ୍ରେସ ଏଠାରେ ଭଲ ପ୍ରଦର୍ଶନ କରିଥିଲା, କିନ୍ତୁ ଭାଜପାଠାରୁ କ୍ଷମତା ହାସଲ କରିବାରେ ବିଫଳ ହୋଇଥିଲା। ଏଥର କଂଗ୍ରେସ ୯୦ ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି। ଏହାର ସହଯୋଗୀ ନ୍ୟାଶନାଲିଷ୍ଟ କଂଗ୍ରେସ ପାର୍ଟି (ଏନସିପି) ଦୁଇଟି ଆସନରେ ପ୍ରାର୍ଥୀ ଦେଇଛି।
