ଆମ ମଧ୍ୟରୁ ଅଧିକାଂଶ ଲୋକ ଅସୁସ୍ଥ ହେବା ପରେ ଡାକ୍ତରଙ୍କ ପାଖକୁ ଯିବା ପରିବର୍ତ୍ତେ ସିଧା ମେଡିସିନ ଷ୍ଟୋରକୁ ଯାଇଥାନ୍ତି। କିଛି ଚିନ୍ତା ନ କରି ରୋଗ ପାଇଁ ଔଷଧ କିଣି ଆଣନ୍ତି। ବେଳେବେଳେ ଲୋକେ ଏହି ଔଷଧ ଦ୍ୱାରା ଆରୋଗ୍ୟ ହୁଅନ୍ତି ସତ ମାତ୍ର ଗମ୍ଭୀର ସମସ୍ୟାର ସମ୍ମୁଖୀନ ହୋଇଥାନ୍ତି। ଔଷଧ କିଣିବା ସମୟରେ କେବେ ଧ୍ୟାନ ଦେଇଛନ୍ତି କି ଖୋଳ ଉପରେ ଏକ ଲାଲ୍ ରଙ୍ଗର ଗାର ପଡ଼ିଥାଏ। ଜାଣନ୍ତି ଏପରି ଗାର କାହିଁକି ପଡ଼ିଥାଏ? ଯଦି ନା ତେବେ ଜାଣନ୍ତୁ ଏ ସମ୍ପର୍କରେ…
ଲାଲ ରଙ୍ଗର ଏହି ଗାର ସମ୍ପର୍କରେ ଡାକ୍ତରଙ୍କୁ ବେଶ୍ ଭଲ ଭାବେ ଜଣାଥାଏ। କାରଣ ସାଧାରଣ ଲୋକଙ୍କ ନିକଟରେ ଏ ସମ୍ପର୍କରେ କୌଣସି ଧାରଣା ନ ଥାଏ। ଏମିତିରେ ଲୋକେ ଡାକ୍ତରଙ୍କ ବିନା ପରାମର୍ଶରେ ମେଡିସିନ ଷ୍ଟୋରରୁ ଔଷଧ ଆଣିଥାନ୍ତି। ପରେ ନାନା ସମସ୍ୟାରେ ପଡ଼ିଥାନ୍ତି। ତେଣୁ ମେଡିସିନ କିଣିବା ସମୟରେ ଭଲ ଭାବରେ ଧ୍ୟାନ ଦେବା ଜରୁରୀ ଅଟେ। ଏହି ଲାଲ୍ ରଙ୍ଗ ଗାରର ଅର୍ଥ ଡାକ୍ତରଙ୍କ ବିନା ଏହି ଔଷଧ କିଣାଯାଇ ପାରିବ ନାହିଁ କିମ୍ବା ବିକା ଯାଇପାରିବ ନାହିଁ। କେବଳ ଆଣ୍ଟିବାୟୋଟିକ୍ର ଭୁଲ ବ୍ୟବହାରକୁ ରୋକିବା ପାଇଁ ଔଷଧଉପରେ ଏପରି ଲାଲ୍ ରଙ୍ଗର ଗାର ପଡ଼ିଥାଏ।
ଲାଲ୍ ରଙ୍ଗର ଗାର ବ୍ୟତୀତ ଔଷଧ ଖୋଳରେ ଆଉ ମଧ୍ୟ କିଛି ଲେଖାଥିବାର ଆପଣ ଦେଖିଥିବେ। ଏଥିରେ ଆର୍ଏକ୍ସ ଲେଖାଥିବା ନିଶ୍ଚିତ ଦେଖିଥିବେ। ଏହାର ଅର୍ଥ ଏହି ଔଷଧ କେବଳ ଡାକ୍ତରଙ୍କ ପରାମର୍ଶ ଅନୁଯାୟୀ ଗ୍ରହଣ କରାଯିବା ଉଚିତ୍। ଆଉ କିଛି ଔଷଧ ଖୋଳରେ ଏନ୍ଆର୍ଏକ୍ସ ମଧ୍ୟ ଲେଖାଥାଏ। ଏହାର ଅର୍ଥ ହେଉଛି କେବଳ ସେହି ଡାକ୍ତରମାନଙ୍କ ପରାମର୍ଶ ଦରକାର ଯେଉଁମାନେ କି ଔଷଧ ପାଇଁ ଲାଇସେନ୍ସପ୍ରାପ୍ତ ଅଟନ୍ତି। ଆଉ କିଛି ଔଷଧରେ ଏକ୍ସଆର୍ଏକ୍ସ ମଧ୍ୟ ଲେଖାଥାଏ। ଏହାର ଅର୍ଥ ଏହି ଔଷଧ କେବଳ ଡାକ୍ତରଙ୍କ ପାଖରୁ ନିଆଯାଇପାରିବ। ଡାକ୍ତର ଏହି ଔଷଧକୁ ରୋଗୀଙ୍କୁ ସିଧାସଳଖ ଦେଇପାରିବେ। ରୋଗୀ ଏହାକୁ କୌଣସି ମେଡିସିନ ଷ୍ଟୋରରୁ କିଣିପାରିବେ ନାହିଁ।