ପୃଥିବୀରେ ପିମ୍ପୁଡ଼ିଙ୍କ ସଂଖ୍ୟା ଅଧିକ ରହିଛି ବୋଲି ଆମେ ଶୁଣିଛେ। ଯାହାକୁ ଆକଳନ କରିବା ଆମ ପକ୍ଷେ ସମ୍ଭବ ନୁହେଁ। ଏକ ଅଧ୍ୟୟନରୁ ଜଣାପଡିଛି ଯେ, ପୃଥିବୀରେ ୨୦,୦୦୦,୦୦୦,୦୦୦,୦୦୦,୦୦୦,୦୦୦ କିମ୍ବା ୨୦ କ୍ୱାଡ୍ରିଲିଅନ ପିମ୍ପୁଡ଼ି ଅଛନ୍ତି ବୋଲି ଅନୁମାନ କରାଯାଇଛି। ଏହା ଜନସଂଖ୍ୟା ତୁଳନାରେ ୨.୫ ମିଲିୟନ ଗୁଣ ଅଧିକ । ହେଲେ ଏମାନଙ୍କ ସଠିକ୍ ସଂଖ୍ୟା କହିବା କଷ୍ଟକର ଅଟେ। ଅଷ୍ଟ୍ରେଲିଆ, ଜର୍ମାନୀ ଏବଂ ହଂକଂର ଏକ ଅନୁସନ୍ଧାନକାରୀ ଦଳ ୪୮୯ ଅଧ୍ୟୟନର ବିଶ୍ଳେଷଣ କରିଥିଲେ। ଯାହା ସମସ୍ତ ଦେଶର ବିଭିନ୍ନ ବାସସ୍ଥାନରେ ମାଟି ଏବଂ ଗଛରେ ବାସ କରୁଥିବା ପିମ୍ପୁଡ଼ି ଉପରେ ତଥ୍ୟ ସଂଗ୍ରହ କରିଥିଲା। ଏହି ଅନୁସନ୍ଧାନ ବୈଜ୍ଞାନିକମାନଙ୍କୁ ଇକୋସିଷ୍ଟମରେ ପିମ୍ପୁଡ଼ିର ଭୂମିକା ବାବଦରେ ଜାଣିବାକୁ ସାହାଯ୍ୟ କରିପାରିବ ଏବଂ ଜଳବାୟୁ ପରିବର୍ତ୍ତନ ଭଳି ବିପଦ ସମୟରେ ଏହି କୀଟପତଙ୍ଗ ଏବଂ ଅନ୍ୟମାନେ କିପରି ପ୍ରଭାବିତ ହୋଇଥାନ୍ତି ତାହାର ଆକଳନ କରିବାର ଏକ ଉପାୟ ପ୍ରଦାନ କରିବ। ଅନୁସନ୍ଧାନକାରୀ କହିବା ଅନୁଯାୟୀ, ପୃଥିବୀର ସମୁଦାୟ ପିମ୍ପୁଡ଼ି ପ୍ରକୃତରେ ପୃଥିବୀର ସମସ୍ତ ବଣୁଆ ପକ୍ଷୀ ଏବଂ ସ୍ତନ୍ୟପାୟୀ ପ୍ରାଣୀଙ୍କଠାରୁ ଅଧିକ ହେବ।