ନୂଆଦିଲ୍ଲୀ,୨୬।୭: ଗୋଟିଏ ପଟେ କରୋନା ଭାଇରସ ସଂକ୍ରମଣକୁ ନେଇ ସାଧାରଣ ଜନତା ଭୟଭିତ ଅଛନ୍ତି। ଅନ୍ୟପଟେ ଏହି ରୋଗୀଙ୍କ ଜୀବନ ବଞ୍ଚାଇବାକୁ ଯାଇ ଗ୍ରେଟର ନଏଡାର ଜଣେ ସର୍ଜନ ନିଜ ଜୀବନକୁ ବାଜି ଲାଗାଇ ଦେଇଛନ୍ତି। ଶାରଦା ଦେବୀ ସ୍କୁଲ ଅଫ୍ ମେଡିକାଲ ସାଇନସେସ୍ ଆଣ୍ଡ ରିସର୍ଚ୍ଚ ସେଣ୍ଟରରେ ସର୍ଜରୀ ବିଭାଗର ମୁଖ୍ୟ ଡାକ୍ତର ବିକ୍ରମ ସିଂ ଚୌହାନ ଏମରଜେନ୍ସିରେ ରୋଗୀଙ୍କର ସର୍ଜରୀ କରୁଥିଲେ। ଆଉ ଏହାରି ଭିତରେ ସେ କରୋନାରେ ସଂକ୍ରମିତ ହୋଇଥିବା ସୂଚନା ମିଳିଛି। ଏହାପରେ ତାଙ୍କର ୯ ମାସର ଗର୍ଭବତୀ ପତ୍ନୀ ଓ ୭ ବର୍ଷର ପୁଅ ମଧ୍ୟ କରୋନାରେ ସଂକ୍ରମିତ ହୋଇଥିବା ଜଣାପଡିଛି। ତେବେ ଗତ ସପ୍ତାହରେ ତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିବା ବେଳେ ସେ ମଧ୍ୟ କରୋନାରେ ସଂକ୍ରମିତ ହୋଇ ଏନ୍ଆଇସିୟୁରେ ଭର୍ତ୍ତି ହୋଇଛି। ସୂଚନାଯୋଗ୍ୟ, ୧୦ ଦିନ ପୂର୍ବରୁ ସେଠାକୁ ଆସିଥିବା ଜଣେ ଦୁର୍ଘଟଣାଗ୍ରସ୍ତ ରୋଗୀଙ୍କ ଅବସ୍ଥା ସଙ୍କଟାପନ୍ନ ଦେଖି ପିପିଇ କିଟ୍ ନ ପିନ୍ଧି ଡାକ୍ତର ଚୌହାନ ତାଙ୍କର ସର୍ଜରୀ କରି ଦେଇଥିଲେ। ଏହାପରେ ଉକ୍ତ ରୋଗୀ ଜଣକ କରୋନା ପଜିଟିଭ ଥିବା ଜଣାପଡିଥିଲା। ହେଲେ ସେତେବେଳକୁ ଡାକ୍ତର ଓ ତାଙ୍କ ପରିବାର ସଦସ୍ୟ କରୋନାରେ ସଂକ୍ରମିତ ହୋଇ ସାରିଥିଲେ।
