ଲଖିମପୁର ଖେରି: ୧୫।୧୨: ଉତ୍ତର ପ୍ରଦେଶର ଲଖିମପୁର ଖେରିରେ ସ୍ତ୍ରୀଙ୍କୁ ହତ୍ୟା ଅଭିଯୋଗରେ ଅଭିଷେକ ଅବସ୍ତି ନାମକ ଡାକ୍ତରଙ୍କୁ ପୋଲିସ ଗିରଫ କରିଛି। ଅଭିଷେକଙ୍କ ସ୍ତ୍ରୀ ବନ୍ଦନା (୨୮) ପେସାରେ ଡାକ୍ତର। ନଭେମ୍ବର ୨୬ରେ ଅଭିଷେକ ସ୍ତ୍ରୀଙ୍କୁ ହତ୍ୟା କରିଥିଲେ। ନିଜ ଘରଠାରୁ ୪୦୦ କି.ମି. ଦୂର ଗଡ଼ମୁକ୍ତେଶ୍ୱରରେ ନେଇ ତାଙ୍କ ଅନ୍ତିମ ସଂସ୍କାର କରିଥିଲେ। କୌଣସି କଥାକୁ ନେଇ ସ୍ତ୍ରୀ-ସ୍ବାମୀଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଅଭିଷେକ ରାଗିଯାଇ ବନ୍ଦନାଙ୍କ ମୁଣ୍ଡକୁ ଏକ ଭାରି ଜିନିଷରେ ପ୍ରହାର କରିଥିଲେ, ଯାହାଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା। ତେବେ ଅଭିଷେକଙ୍କୁ ଏଥିରେ ତାଙ୍କ ବାପା ଗୌରୀ ଶଙ୍କର ଅବସ୍ତି ସହଯୋଗ କରିଥିବା ପୋଲିସ କହିଛି। ସ୍ତ୍ରୀଙ୍କୁ ହତ୍ୟା ପରେ ଅଭିଷେକ ଥାନାରେ ଏକ ନିଖୋଜ ଅଭିଯୋଗ କରିଥିଲେ।
ମୃତଦେହକୁ ଅଭିଷେକ ଏକ ସୁଟ୍କେସ୍ରେ ଭର୍ତ୍ତି କରି ଆମ୍ବୁଲାନ୍ସ ଯୋଗେ ଗଡ଼ମୁକ୍ତେଶ୍ୱର ନେଇ ସେଠାରେ ପୋଡ଼ି ଦେଇଥିଲେ। ବନ୍ଦନାଙ୍କ ନିଖୋଜ ମାମଲାର ଯାଞ୍ଚ କରୁଥିବା ପୋଲିସର ସନ୍ଦେହ ଅଭିଷେକଙ୍କ ଉପରେ ହୋଇଥିଲା। ଏ ସଂକ୍ରାନ୍ତରେ ପୋଲିସ ପଚରାଉଚରା ଜାରି ରଖିଥିବାବେଳେ ଅଭିଷେକ ସତ ମାନିଯାଇଥିବା ପୋଲିସ କହିଛି। ତେବେ ଘଟଣାରେ ସମ୍ପୃକ୍ତ ଗୌରୀ ଶଙ୍କରଙ୍କୁ ମଧ୍ୟ ପୋଲିସ ଗିରଫ କରିଛି। ପୋଲିସ ଘଟଣା ସମ୍ପର୍କରେ ଅଧିକ ଯାଞ୍ଚ ଚଳାଇଛି।