କେସିଙ୍ଗା,୨୬।୭(ତୁମେଶର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ କାଣ୍ଡେଲ ଗ୍ରାମର ପୂର୍ଣଚନ୍ଦ୍ର ହରିଜନ ଗତ ୪ବର୍ଷ ତଳେ କିଡ୍ନୀ ରୋଗରେ ଆକ୍ରାନ୍ତ ହୋଇ ତାଙ୍କର ମୃତ୍ୟୁ ଘଟିଥିଲା। ବର୍ତ୍ତମାନ ପରିବାରରେ ତାଙ୍କ ସ୍ତ୍ରୀ, ବୁଡି ମା’, ଦୁଇ ପୁଅ ଏବଂ ୧୭ ବର୍ଷୀୟ ଝିଅ କୁମ ହରିଜନ ଅଛନ୍ତି। ସେମାନେ ବହୁ ଦୁଃଖ କଷ୍ଟରେ ଚଳୁଛନ୍ତି।
୨୦୨୧ରେ ପୂର୍ଣଚନ୍ଦ୍ରଙ୍କ ଦେହାନ୍ତ ସମୟରେ ଝିଅ କୁମ ମାଟ୍ରିକ ପଢୁଥିଲେ। ମାଟ୍ରିକ ପରେ ସେ ପରିବାରର ଆର୍ଥିକ ବୋଝକୁ କିଛି ମାତ୍ରାରେ ହାଲୁକା କରିବା ପାଇଁ ବାହାର ରାଜ୍ୟକୁ ଦାଦନ ଖଟିବାକୁ ଚାଲିଯାଇଥିଲେ। ନିଜେ ଉଚ୍ଚ ଶିକ୍ଷାରୁ ବଞ୍ଚିତ ହୋଇ ଦୁଇ ଭାଇଙ୍କୁ ପାଠ ପଢ଼ାଇ ମଣିଷ କରିବା ପାଇଁ ସେ ବର୍ତ୍ତମାନ ତାମିଲନାଡୁରେ କାମ କରୁଛନ୍ତି। ଏପରିକି ସେ ସେଠାରେ ଚଳିବା ସହ ଘରକୁ ଟଙ୍କା ପଠାଉଥିବା କହିଛନ୍ତି କୁମଙ୍କ ମା’ ପ୍ରତି ହରିଜନ ।
ଏହି ଖବର ପାଇବା ପରେ କାଣ୍ଡେଲ ଗ୍ରାମସ୍ଥିତ ଆୟୁର୍ବେଦିକ ସେବା ସଦନର ଡାକ୍ତର ସଦାନନ୍ଦ ପୁଟେଲ ସହାୟତାର ହାତ ବଢାଇଛନ୍ତି । ସେ ପ୍ରତି ହରିଜନଙ୍କ ଘରକୁ ଯାଇ ପରିବାର ଲୋକଙ୍କୁ ୧୦ହଜାର ଟଙ୍କାର ଏକ ଚେକ୍ ପ୍ରଦାନ କରିଛନ୍ତି। ଏହି ଟଙ୍କାକୁ ଦୁଇ ପୁଅଙ୍କ ପାଠ ପଢା ଖର୍ଚ୍ଚରେ ବ୍ୟବହାର କରିବାକୁ ପରିବାର ଲୋକଙ୍କୁ କହିଥିବା ଡାକ୍ତର ସଦାନନ୍ଦ ପ୍ରକାଶ କରିଛନ୍ତି।
ଡାକ୍ତର ସଦାନନ୍ଦଙ୍କ ଏପରି କାର୍ଯ୍ୟକୁ ବିଭିନ୍ନ ମହଳରେ ପ୍ରଶଂସା କରାଯାଇଛି। ‘ମାନବ ସେବା ହିଁ ମାଧବ ସେବା’ କହି ଲୋକଙ୍କୁ ସେବା ଜାରି ରହିଥିବା କହିଛନ୍ତି ଡାକ୍ତର ସଦାନନ୍ଦ। ଆଗକୁ ମଧ୍ୟ ଏହି ସେବା ଜାରି ରହିବ ବୋଲି ସେ ମତପ୍ରକାଶ କରିଛନ୍ତି।
