ଆଲିଗଡ଼, ୨୨।୭: ଭାରତରେ କରୋନା ମହାମାରୀ ଗମ୍ଭୀର ରୂପ ଧାରଣ କରିଛି। ଗତ କିଛିଦିନ ଦେଶରେ ଦୈନିକ ନୂତନ ଆକ୍ରାନ୍ତଙ୍କ ସଂଖ୍ୟା ୩୫ରୁ ୪୦ ହଜାର ମଧ୍ୟରେ ରହୁଛି। ଏହାକୁ ନେଇ ସରକାର ଚିନ୍ତାରେ ରହିଥିବାବେଳେ ଏଭଳି ଏକ ସମୟରେ ଏକ ସଙ୍ଗୀନ ଘଟଣା ସାମ୍ନାକୁ ଆସିଛି। କରୋନା ଆକ୍ରାନ୍ତ ହୋଇ ହସ୍ପିଟାଲରେ ଚିକିତ୍ସିତ ହେଉଥିବା ଜଣେ ଯୁବତୀଙ୍କୁ ବଳାତ୍କାର ଉଦ୍ୟମ ହୋଇଛି। ଏହି ବଳାତ୍କାର ଉଦ୍ୟମ କରିଥିବା ବ୍ୟକ୍ତି ଜଣକ ଆଉ କେହି ନୁହେଁ ବରଂ କରୋନା ଯୋଦ୍ଧାର ଆଖ୍ୟା ପାଇଥିବା ଡାକ୍ତର। ଘଟଣାଟି ଉତ୍ତର ପ୍ରଦେଶର ଆଲିଗଡ଼ ଡିଡିୟୁ ହସ୍ପିଟାଲରେ ଘଟିଯାଇଛି। ଗାଜିଆବାଦର ୨୮ ବର୍ଷୀୟା ଏହି ଯୁବତୀ ଜଣଙ୍କ ଏକ ଘରୋଇ କମ୍ପାନୀରେ କାମ କରନ୍ତି। ନିକଟରେ ତାଙ୍କ ଦେହ ଅସୁସ୍ଥ ହେବାରୁ ସ୍ବାବ୍ ଟେଷ୍ଟରୁ ସେ କରୋନା ଆକ୍ରାନ୍ତ ହୋଇଥିବା ଜଣାପଡ଼ିଥିଲା। ଏହାପରେ ପରିବାର ଲୋକେ ଯୁବତୀଙ୍କୁ ଚିକିତ୍ସା ପାଇଁ ଆଲିଗଡ଼ ଡିଡିୟୁ ହସ୍ପିଟାଲରେ ଭର୍ତ୍ତି କରିଥିଲେ। ସେଠାରେ ହସ୍ପିଟାଲ କର୍ତ୍ତୃପକ୍ଷ ତାଙ୍କୁ ଆଇସୋଲେଶନ ଓ୍ବାର୍ଡରେ ଭର୍ତ୍ତି କରିବା ବଦଳରେ କ୍ୱାରାଣ୍ଟାଇନରେ ରଖି ତାଙ୍କ ସ୍ବାବ୍ ଟେଷ୍ଟ ପାଇଁ ନେଇଥିଲେ। ଯୁବତୀଙ୍କ କହିବା ମୁତାବକ, କରୋନା ଓ୍ବାର୍ଡ ଏଲ୍-୨ ପାଇଁ ନିୟୋଜିତ ଡାକ୍ତର ତୁଫେଲ ଅହମ୍ମଦ ମଙ୍ଗଳବାର ରାତିରେ ତାଙ୍କ ବେଡ୍ ନିକଟକୁ ଆସି ଚେକ୍ ଅପ୍ ବାହାନାରେ ବଳାତ୍କାର ଉଦ୍ୟମ ପାଇଁ ପ୍ରୟାସ କରିଥିଲେ। ଯୁବତୀ ଜଣଙ୍କ ସେହି ରାତିରେ ପରିବାର ଲୋକଙ୍କୁ ଏନେଇ ଅବଗତ କରାଇଥିଲେ। ଏହା ପରଦିନ ଭୋର ସମୟରେ ମଧ୍ୟ ସେହି ଡାକ୍ତର ଜଣଙ୍କ ପୁନର୍ବାର ଆଉଥରେ ଯୁବତୀଙ୍କ ବେଡ୍ ନିକଟକୁ ଆସି ପୁଣିଥରେ ବଳାତ୍କାର ପାଇଁ ଉଦ୍ୟମ କରିଥିଲେ। ପରିବାର ଲୋକ ଥାନାରେ ଏନେଇ ଅଭିଯୋଗ କରିବା ପରେ ପୋଲିସ ହସ୍ପିଟାଲରେ ପହଞ୍ଚତ୍ ସିସିଟିଭି ଫୁଟେଜକୁ ଯାଞ୍ଚ କରିଥିଲା। ଏହାପରେ ଖବରରେ ସତ୍ୟାସତ୍ୟ ଥିବା ଜାଣି ଡାକ୍ତରଙ୍କୁ ଗିରଫ କରାଯାଇଛି। ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଥିବା ଜଣାପଡ଼ିଛି।