ବଲାଙ୍ଗୀର ଅଫିସ, ୧୧ା୪: ଯେତେବେଳେ ଶରୀର କଥା ଉଠେ ସେତେବେଳେ ଡାକ୍ତର ଜଣେ ସୈନିକ। ଯେତେବେଳେ ମନ କଥା ଉଠେ ସେତେବେଳେ ଡାକ୍ତର ଜଣେ ମନୋବିଜ୍ଞାନୀ। ଆଉ ଯେତେବେଳେ ଆମତ୍ା କଥା ଉଠେ ଡାକ୍ତର ସେତେବେଳେ ଜଣେ ପୂଜକ ବୋଲି ଓଡ଼ିିଶା ରାଜ୍ୟପାଳ ପ୍ରଫେସର ଗଣେଣୀ ଲାଲ ସୋମବାର ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ବାର୍ଷିକ ଉତ୍ସବରେ ମୁଖ୍ୟଅତିଥିଭାବେ ଯୋଗଦେଇ କହିଛନ୍ତି। ରାଜ୍ୟପାଳ ଲାଲ ତାଙ୍କ ଦୀକ୍ଷାନ୍ତ ଅଭିଭାଷଣରେ ସନ୍ଥକବି ଭୀମ ଭୋଇଙ୍କ ବାଣୀ ଉଦ୍ଧାର କରି କହିଥିଲେ ଯେ, ଜାତି ଖୋଜିଲେ ମୁକ୍ତି ନାହିଁ, ମୁକ୍ତି ଖୋଜିଲେ ଜାତି ନାହିଁ। ଏହି ବାଣୀର ମର୍ମ ବୁଝିବାକୁ ହେବ। ଏହାହିଁ ତ ଅତିମାନସ ସଚେତନତା। ଭୀମ ଭୋଇ ଓ ଓଡ଼ିଶାର ଜଗନ୍ନାଥ ସଂସ୍କୃତିର ଅଜାତିବାଦ୍ ତତ୍ତ୍ୱକୁ ବୁଝିବାକୁ ହେବ। ଶ୍ରୀଅରବିନ୍ଦଙ୍କ ଅତିମାନସ ଚିନ୍ତନକୁ ହୃଦୟଙ୍ଗମ କରିବାକୁ ହେବ। ରାଜ୍ୟପାଳ ପ୍ରଫେସର ଲାଲ ଡାକ୍ତରୀ ଛାତ୍ରୀଛାତ୍ରଙ୍କୁ ପ୍ରଶ୍ନ କରିଥିଲେ କେବେ ଶୁଣିଛ କି, ମନ୍ୱାଲେ ଦୁଲ୍ହନିଆ ଲେ ଜାଏଙ୍ଗେ। ଆମେ ଶୁଣିଛୁ, ମନ୍ଦିର, ମସଜିଦ୍ ସବୁ ଭାଙ୍ଗିଦିଅ ହେଲେ କାହାର ହୃଦୟ ଭାଙ୍ଗନାହିଁ। ଏଣୁ ସବୁବେଳେ, ସବୁଠି ହୃଦୟର କଥା ଶୁଣ ବୋଲି ରାଜ୍ୟପାଳ ଡାକ୍ତରୀ ଛାତ୍ରୀଛାତ୍ରଙ୍କୁ ଉଦ୍ବୋଧନ ଦେଇଥିଲେ।
ସମ୍ମାନୀତ ଅତିଥିଭାବେ ବଲାଙ୍ଗୀର ବିଧାୟକ ନରସିଂହ ମିଶ୍ର, ଓଡିଶା ସ୍ବାସ୍ଥ୍ୟ ଓ ବିଜ୍ଞନ ବିଶ୍ୱବିଦ୍ୟାଳୟ କୁଳପତି ଡ. ଦତ୍ତେଶ୍ୱର ହୋତା, ଜିଲାପାଳ ଚଞ୍ଚଳ ରାଣା, ଭୀମ ଭୋଇ ମେଡିକାଲ କଲେଜ ଡିନ୍ ଡା. ସବିତା ମହାପାତ୍ର, କଲେଜ ଛାତ୍ର ସଂସଦ ସଭାପତି ବିଶାଳ ପଣ୍ଡା ଓ ଅଭିଷେକ ପାଣି ମଞ୍ଚାସୀନ ହୋଇଥିଲେ। ସମ୍ମାନିତ ଅତିଥି ବିଧାୟକ ମିଶ୍ର ତାଙ୍କ ବକ୍ତବ୍ୟରେ କହିଥିଲେ ଯେ, ୧୯୯୯ ମସିହାରେ ପଶ୍ଚିମ ଓଡ଼ିିଶା ବିକାଶ ପରିଷଦ ଗଠନ ହେବା ପରେ ବଲାଙ୍ଗୀରରେ ମେଡିକାଲ କଲେଜ ପ୍ରତିଷ୍ଠା ପାଇଁ ଶିଳାନ୍ୟାସ କରାଯାଇଥିଲା। ନାନା ପ୍ରତିବନ୍ଧକ ସତ୍ତ୍ୱେ ଆଜି ଏହି କଲେଜରୁ ପ୍ରଥମ ବ୍ୟାଚ୍ ଡାକ୍ତରୀ ଛାତ୍ର ପାସ୍ କରିଛନ୍ତି। ଆଜି ସ୍ବପ୍ନ ପୂରଣ ହୋଇଛି। ଏଠାରେ ଶୀଘ୍ର ପିଜି ଶ୍ରେଣୀ ଏବଂ ସୁପରସ୍ପେଶାଲିଟି ବିଭାଗ ଖୋଲାଯାଉ ଏହା ହିଁ ତାଙ୍କର ସ୍ବପ୍ନ ବୋଲି ବିଧାୟକ ମିଶ୍ର କହିଥିଲେ। ସମ୍ମାନିତ ଅତିଥି କୁଳପତି ଡ. ହୋତା ତାଙ୍କ ବକ୍ତବ୍ୟରେ ଆଗାମୀ ଦିନରେ ଓଡିଶାରେ ସ୍ବାସ୍ଥ୍ୟ କ୍ଷେତ୍ରରେ ଶିକ୍ଷା, ତାଲିମ ଓ ଗବେଷଣା ଉପରେ ଗୁରୁତ୍ୱ ଦିଆଯିବ ବୋଲି କହିଥିଲେ। ଏହି ଅବସରରେ ଭୀମ ଭୋଇ ମେଡିକାଲ କଲେଜର ମୁଖପତ୍ର ଜେନିସିସ୍କୁ ରାଜ୍ୟପାଳ ଲାଲ ଓ ଅନ୍ୟ ଅତିଥିମାନେ ଉନ୍ମୋଚିତ କରିଥିଲେ। କାର୍ଯ୍ୟକ୍ରମରେ ବଲାଙ୍ଗୀର ଏସ୍ପି ନୀତିନ କୁଶଲକର, ପ୍ରଫେସର ମଧୁସୂଦନ ପତି, ଅଧ୍ୟାପକ, ଷ୍ଟାଫ୍, ଛାତ୍ରୀଛାତ୍ର ଉପସ୍ଥିତ ଥିଲେ।
ଦିନିକିଆ ବଲାଙ୍ଗୀର ଗସ୍ତରେ ଆସିଥିବା ରାଜ୍ୟପାଳ ଲାଲ ଏହାପରେ ଯୁଧିଷ୍ଠିର ମିଶ୍ର ଆଇନ ମହାବିଦ୍ୟାଳୟ ପରିସରରେ ସ୍ଥାପିତ ସ୍ବାଧୀନତା ସଂଗ୍ରାମୀ, ସମ୍ବିଧାନ ପ୍ରଣୟନ ସଭା ସଦସ୍ୟ ତଥା ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି ସ୍ବର୍ଗତ ଯୁଧିଷ୍ଠିର ମିଶ୍ରଙ୍କ ପ୍ରତିମୂର୍ତ୍ତି ଉନ୍ମୋଚନ କରିଥିଲେ। ସେଠାରୁ ଯାଇ ରାଜ୍ୟପାଳ ଲୋଇସିଂହା ବ୍ଲକ ଅନ୍ତର୍ଗତ ଯୋଗୀସର୍ଡା ହରିହର ନୋଡାଲ ହାଇସ୍କୁଲର ୫୬ତମ ବାର୍ଷିକ ଉସତ୍ବରେ ଯୋଗଦେଇଥିଲେ।