ବାରାଣସୀ,୧୪।୧୧: ଉତ୍ତର ପ୍ରଦେଶ ବାରାଣସୀରେ ଥିବା ଦିନ ଦୟାଲ ଉପାଧ୍ୟାୟ ଜିଲା ହସ୍ପିଟାଲରେ ଡାକ୍ତର ଓ ନର୍ସମାନେ ଡ୍ୟାନ୍ସ କରୁଥିବା ଏକ ଭିଡିଓ ଭାଇରାଲ ହେବାରେ ଲାଗିଛି। ନର୍ସଙ୍କ ପଦୋନ୍ନତିକୁ ନେଇ ହସ୍ପିଟାଲ ଭିତରେ ଡାକ୍ତର ଓ ନର୍ସମାନେ ଡ୍ୟାନ୍ସ କରି ଉତ୍ସବ ପାଳୁଥିବା କୁହାଯାଉଛି।
ଏହାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। କିଛି ହିନ୍ଦି ଗୀତର ତାଳେ ତାଳେ ଏମାନେ ନାଚୁଥିବା ଦେଖିବାକୁ ମିଳିଛି। ଭିଡିଓରେ ଜଣେ ନର୍ସ ଡ୍ୟୁଟିରେ ଥାଇ ନାଚୁଥିବା ଓ ନିଜର ଆଇକାର୍ଡ ଦେଖାଉଥିବା ଦେଖାଯାଇଛି। ଏହି ଭିଡିଓ ଭାଇରାଲ ହେବା ପରେ ବାରାଣସୀର ମୁଖ୍ୟ ଚିକିତ୍ସା ଅଧିକାରୀ(ସିଏମଓ) ଘଟଣାର ଯାଞ୍ଚ ନିର୍ଦ୍ଦେଶ ଦେଇଛନ୍ତି।
କୁହାଯାଉଛି କି ଦିପାବଳୀରେ ନର୍ସଙ୍କୁ ପଦୋନ୍ନତି ମିଳିବା ଖୁସିରେ ଏହି ପାର୍ଟି ଆୟୋଜନ କରାଯାଇଥିଲା। ଯେଉଁ ପାର୍ଟିରେ ସିଏମଏସ ଓ ଏମଏସ ବି ଡ୍ୟାନ୍ସ କରିଥିଲେ। ଏହାପରେ ଏହାର ଏକ ଭିଡିଓ କରି କେହିଜଣେ ସୋସିଆଲ ମିଡିଆରେ ଏହାକୁ ପୋଷ୍ଟ କରି ଦେଇଥିଲେ। ପରେ ଏହା ଭାଇରାଲ ହୋଇଥିଲା। ହେଲେ ଏବେ ଏହି ଭିଡିଓକୁ ନେଇ କେହି କିଛି କହିବାକୁ ରାଜି ହେଉ ନାହାଁନ୍ତି।
