ହିପ ହାଡ ଭାଙ୍ଗିଥିବା ବ୍ୟକ୍ତିଙ୍କ ହାର୍ଟ ଅପରେଶନ କଲେ ଡାକ୍ତର: ମୃତଦେହ ନେବାକୁ ମନା କଲେ ସମ୍ପର୍କୀୟ…

ନୋଏଡା,୬।୪ : ନୋଏଡାର ଫୋର୍ଟିସ ହସ୍ପିଟାଲର ଡାକ୍ତରମାନେ ଚିକିତ୍ସାରେ ଅବହେଳା କରିଥିବା ଅଭିଯୋଗ ହୋଇଛି। ଚିକିତ୍ସିତ ହେଉଥିବା ଜଣେ ବ୍ୟକ୍ତିଙ୍କ ସମ୍ପର୍କୀୟମାନେ ଅଭିଯୋଗ କରିଛନ୍ତି, ରୋଗୀଙ୍କୁ ହିପ ହାଡ ଭାଙ୍ଗିଯିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ଡାକ୍ତରମାନେ ତାଙ୍କର ହାର୍ଟ ଅପରେଶନ କରିଥିଲେ। ଅପରେଶନ ସମୟରେ ତାଙ୍କର ମୃତ୍ୟୁ ଘଟିଥିଲା। ମୃତଦେହ ନେବାକୁ ମନା କରି ସମ୍ପର୍କୀୟମାନେ ସେକ୍ଟର-୫୮ ଥାନାରେ ଅଭିଯୋଗ କରିଛନ୍ତି।

ଏଥି ସହିତ ଡାକ୍ତରଖାନା ପରିଚାଳନା ବୋର୍ଡ କହିଛି ଯେ ସମ୍ପୃକ୍ତ ବ୍ୟକ୍ତିଙ୍କର ହୃଦ ସମସ୍ୟା ଥିଲା। ଏନେଇ ସୂଚନା ତାଙ୍କ ସମ୍ପର୍କୀୟମାନଙ୍କୁ ଦିଆଯାଇଥିଲା। ଜୟପୁରର ବାସିନ୍ଦା ଦୀନେଶ କୁମାର ସାକ୍ସେନା (୬୬) ତଳେ ପଡ଼ିଯିବା କାରଣରୂ ତାଙ୍କର ହିପ ହାଡ ଭାଙ୍ଗି ଯାଇଥିଲା। ରାଜସ୍ଥାନରେ ଡାକ୍ତରଙ୍କ ଧର୍ମଘଟ ଯୋଗୁଁ ସେଠାରେ କୌଣସି ଚିକିତ୍ସା ହେବା ସମ୍ଭବ ନ ହେବାରୁ ତାଙ୍କୁ ନୋଏଡାର ଫୋର୍ଟିସ ହସ୍ପିଟାଲରେ ଭର୍ତ୍ତି କରାଯାଇଥିଲା।

ତାଙ୍କୁ ଗତ ଶନିବାର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ମଙ୍ଗଳବାର ରୋଗୀର ଆଞ୍ଜିଓଗ୍ରାଫି କରାଯାଇଥିଲା। ମୃତକଙ୍କ ପୁଅ ଶୁଭମ ସାକ୍ସେନା କହିଛନ୍ତି ଯେ ତାଙ୍କ ପିତା ପୂର୍ବରୁ ଦୁଇଥର ଆଞ୍ଜିଓପ୍ଲାଷ୍ଟି କରିଥିଲେ। ବୁଧବାର ସକାଳ ପର୍ଯ୍ୟନ୍ତ ତାଙ୍କ ଅବସ୍ଥା ଭଲ ଥିଲା। ତାଙ୍କର ଆଞ୍ଜିଓଗ୍ରାଫି ସକାଳେ କରାଯାଇଥିଲା ।
ଡାକ୍ତରମାନେ କୌଣସି ସୂଚନା ଦେଇନାହାଁନ୍ତି ବୋଲି ଶୁଭମ ଅଭିଯୋଗ କରିଛନ୍ତି। ସେ ଅପରାହ୍ନ ପ୍ରାୟ ସାଢ଼େ ୪ଟା ସମୟରେ ଆଇସିୟୁରେ ପହଞ୍ଚି ତାଙ୍କ ପିତା ଚେତାଶୂନ୍ୟ ହୋଇ ପଡ଼ିଥିବା ଦେଖିଥିଲେ। ସନ୍ଦେହରେ ଯେତେବେଳେ ସେ ଏନେଇ ଡାକ୍ତରମାନଙ୍କୁ ପଚାରିଲେ ତାଙ୍କୁ ସନ୍ଧ୍ୟା ପ୍ରାୟ ୫ଟାରେ ପିତାଙ୍କ ମୃତ୍ୟୁ ବିଷୟରେ ସୂଚନା ଦିଆଯାଇଥିଲା। ସମ୍ପର୍କୀୟମାନେ ୧୧୨ କୁ ଫୋନ କରି ପୋଲିସକୁ ସୂଚନା ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମାମଲାକୁ ଶାନ୍ତ କରିଥିଲା। ସମ୍ପର୍କୀୟମାନେ ମୃତଦେହ ନେବାକୁ ମନା କରି ଡାକ୍ତରଖାନା ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ।

ଏଥି ସହିତ ଡାକ୍ତରଖାନା ପ୍ରଶାସନ କହିଛି ଯେ ରୋଗୀର ହୃଦ ଏବଂ ଶ୍ୱାସକ୍ରିୟା ସମସ୍ୟା ପୂର୍ବରୁ ଥିଲା। ତାଙ୍କର ଡାଇବେଟିସ ମଧ୍ୟ ଅଧିକ ଥିଲା। ହିପ ସର୍ଜରୀ ପୂର୍ବରୁ ତାଙ୍କର ଅବସ୍ଥା ସ୍ଥିର କରିବା ଆବଶ୍ୟକ ଥିଲା। ରୋଗୀଙ୍କ ସହିତ ଜଡିତ ପ୍ରତ୍ୟେକ ଅପଡେଟ ସମ୍ପର୍କୀୟମାନଙ୍କୁ ଦିଆଯାଉଥିଲା। ଚିକିତ୍ସାରେ କୌଣସି ଅବହେଳା ହୋଇ ନାହିଁ। ପରିବାରର ଅଭିଯୋଗ ଭିତ୍ତିହୀନ।