ଭୁବନେଶ୍ୱର, ୮।୯(ବ୍ୟୁରୋ): ଟ୍ରେନ୍ରେ ଜଣେ ମହିଳା ଯାତ୍ରୀ ପ୍ରସବ ଯନ୍ତ୍ରଣାରେ ଛଟପଟ ହେଉଥିବାବେଳେ ଦେବଦୂତ ସାଜିଥିଲେ ଓଡ଼ିଆ ଡାକ୍ତର। ବିନା ସରଞ୍ଜାମରେ ତାଙ୍କର ସଫଳ ତଥା ନିରାପଦ ପ୍ରସବ କରାଇ ଏବେ ସେ ଚର୍ଚ୍ଚାରେ। ମହିଳାଙ୍କର ଏକ କନ୍ୟା ସନ୍ତାନ ହୋଇଥିବାବେଳେ ଏହି ଘଟଣାକୁ ନେଇ ଏବେ ସୋସିଆଲ ମିଡିଆରେ ସମ୍ପୃକ୍ତ ଓଡ଼ିଆ ଡାକ୍ତରଙ୍କୁ ପ୍ରଶଂସାର ସୁଅ ଛୁଟୁଛି। ଡାକ୍ତର ଜଣକ ହେଲେ ଭୁବନେଶ୍ୱରସ୍ଥିତ ୧୨୦ ବାଟାଲିୟନ୍ରେ କାର୍ଯ୍ୟରତ ମେଡିସିନ ବିଭାଗ ଡାକ୍ତର ମେଜର ବିପ୍ଳବୀ ବିଶ୍ୱକେଶରୀ ମହାନ୍ତି। ତାଙ୍କ ଘର ଜଗତ୍ସିଂହପୁର ଜିଲା ନାଉଗାଁ ବ୍ଲକ୍ ଅରଖପାରି ଗାଁରେ। ବାପା ଲିଙ୍ଗରାଜ ମହାନ୍ତି ଓ ମା’ବିଜୟଲକ୍ଷ୍ମୀଙ୍କର ସେ ହେଉଛନ୍ତି ଏକମାତ୍ର ସନ୍ତାନ। ସେ ହୀରାଖଣ୍ଡ ଏକ୍ସପ୍ରେସ୍ରେ ମଧ୍ୟପ୍ରଦେଶରୁ ଘରକୁ ଫେରୁଥିଲେ। ଉକ୍ତ ଟ୍ରେନ୍ରେ ଛତିଶଗଡ ଚମ୍ପାର ତାରାବାଈ ପଟେଲ ସ୍ବାମୀ ବିଜୟଙ୍କ ସହ ଯାତ୍ରା କରୁଥିଲେ। ଏମାନେ ମଧ୍ୟପ୍ରଦେଶର ସାଗର ଷ୍ଟେଶନରୁ ଟ୍ରେନର ଏସ୍-୧ ବଗିରେ ବସିଥିଲେ। ଯାତ୍ରାର କିଛି ସମୟ ପରେ ତାରାବାଈଙ୍କର ଗର୍ଭ ଯନ୍ତ୍ରଣା ଆରମ୍ଭ ହୋଇଥିଲା। ସେ ଯନ୍ତ୍ରଣାରେ ଛଟପଟ ହେଉଥିବାବେଳେ ଜଣେ ଟିଟି ଏହା ଦେଖି ବଡ଼ପାଟିରେ ସହଯୋଗ ପାଇଁ ଡାକ ପକାଇଥିଲେ। ଯଦି ଟ୍ରେନ୍ରେ କେହି ଡାକ୍ତର ଯାତ୍ରା କରୁଥାନ୍ତି, ତେବେ ତୁରନ୍ତ ମହିଳାଙ୍କ ପ୍ରସବରେ ସହଯୋଗ କରିବାକୁ ଅନୁରୋଧ କରୁଥିଲେ। ଏହି ସମୟରେ ଡାକ୍ତର ବିପ୍ଳବୀ ସେଠାକୁ ଧାଇଁ ଆସିଥିଲେ। ସେତେବେଳକୁ ରାତି ପ୍ରାୟ ୧୨ଟା। ପାଖରେ କଇଁଚି, ଗ୍ଲୋବସ୍, ସୂତା କିମ୍ବା ଔଷଧ କିଛି ବି ନ ଥିଲା। ତଥାପି ଠାକୁରଙ୍କୁ ଡାକି ଜଣେ ମହିଳା ଯାତ୍ରୀଙ୍କ ସହଯୋଗରେ ଚିକିତ୍ସାରେ ଲାଗି ପଡ଼ିଥିଲେ। ୪୫ ମିନିଟ୍ର ଅକ୍ଳାନ୍ତ ପରିଶ୍ରମ ପରେ ବିନା ସରଞ୍ଜାମରେ ତାରାବାଈଙ୍କର ସଫଳ ପ୍ରସବ କରାଇଥିଲେ। ଏବେ ମା’ ଓ ଶିଶୁକନ୍ୟା ସୁସ୍ଥ ଥିବା ଜଣାପଡିଛି।
