ଲକ୍ଷ୍ନୌ,୨ା୯: ମାନବିକତା ହଜିଯାଇଥିବା ପରି ଏକ ଘଟଣା ସାମ୍ନାକୁ ଆସିଛି। ଯେଉଁଠି ଜଣେ ଗିରବ ରିକ୍ସାଚାଳକ ଡେଲିଭରୀ ଚାର୍ଜ ଦେଇପାରିଲେନି ବୋଲି ଭଗବାନ ବୋଲି ମନାଯାଉଥିବା ଡାକ୍ତର ନବଜାତକଙ୍କୁ ୧ ଲକ୍ଷ ଟଙ୍କାରେ ବିକି ଦେବା ଘଟଣା ଲୋକଲୋଚନକୁ ଆସିଛି। ଏହି ଡାକ୍ତରଖାନାରେ ଡେଲିଭରୀ ବିଲ୍ ୩୦ ହଜାର ଟଙ୍କା ହୋଇଥିଲା। ଯାହାକୁ ଦେବା ପାଇଁ ଏକ ଦମ୍ପତି ଅସମର୍ଥଥିଲେ। ତେଣୁ ଡାକ୍ତର ପିଲାକୁ ବିକିଦେବାକୁ କହିଲେ। ଏହି ଖବର ଭାଇରାଲ ହେବା ପରେ ଅଭିଯୁକ୍ତ ଦିଲ୍ଲୀପ ମଙ୍ଗଳ ନବଜାତକକୁ ଗରିବ ଦମ୍ପତିଙ୍କୁ ଫେରାଇ ଦେଇଛନ୍ତି। ନିଜ ପିଲାକୁ ପାଖରେ ପାଇ ଦମ୍ପତି ଖୁସିରେ ଆତ୍ମହରା ହୋଇ ଉଠିଛନ୍ତି। ପ୍ରଶାସନ ଏହି ମାମଲାରେ କାର୍ଯ୍ୟାନୁଷ୍ଠାନ ନେବା ସହ ଉକ୍ତ ଡାକ୍ତରଖାନାକୁ ସିଲ୍ କରିଦେଇଛି।
ଶମ୍ଭୁନଗରରେ ରହୁଥିବା ଶିବନାରାୟଣ ରିକ୍ସା ଚଳାଇ ପେଟ ପୋଷନ୍ତି। ଲକ୍ଡାଉନ୍ରେ ତାଙ୍କ ବେପାର ସମ୍ପୂର୍ଣ୍ଣ ବନ୍ଦ ରହିଥିଲା। ଋଣ ଶୁଝିବାକୁ ନିଜ ଘରର ସମସ୍ତ ଜିନିଷ ବିକି ଦେଇଥିଲେ। ୨୪ ଅଗଷ୍ଟରେ ଶମ୍ଭୁଙ୍କ ସ୍ତ୍ରୀ ବବିତାଙ୍କ ପ୍ରସବ ଯନ୍ତ୍ରଣା ହେବାରୁ ତାଙ୍କୁ ଜେପି ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ବବିତା ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ। ମାତ୍ର ହସ୍ପିଟାଲରେ ବିଲ୍ ୩୦ ହଜାର ହୋଇଥିଲା। ଏହି ଗରିବ ଦମ୍ପତି ଏତେ ଟଙ୍କା ଦେବାକୁ ଅସମର୍ଥ ଥିଲେ। ସେ ଡାକ୍ତରଙ୍କୁ ୫୦୦ ଟଙ୍କା ଦେବେ ବୋଲି ହାତଯୋଡ଼ି ଅନୁରୋଧ କରିଥିଲେ। ମାତ୍ର କେହି ତାଙ୍କ କଥା ଶୁଣି ନ ଥିଲେ। ଡାକ୍ତର ଏହି ଦମ୍ପତିଙ୍କୁ ଧମକାଇଥିଲେ। ଏକ କାଗଜରେ ଦସ୍ତଖତ ନେଇଯାଇଥିଲେ। ଯାହା ପରେ ଡାକ୍ତର ଶିଶୁପୁତ୍ରକୁ ୧ ଲକ୍ଷ ଟଙ୍କାରେ କିଣିନେଲେ ଏବଂ ଏହି ଦମ୍ପତିଙ୍କୁ କିଛି ଟଙ୍କା ଦେଇ ବିଦା କରିଦେଇଥିଲେ।
ଯେତେବେଳେ ଏହି ଘଟଣା ସ୍ଥାନୀୟ ସ୍ବାସ୍ଥ୍ୟ ବିଭାଗ ଜାଣିପାରିଲା ସେତେବେଳେ ହସ୍ପିଟାଲରେ ପହଞ୍ଚି ସିଲ୍ କରିଦେଲା। ସିଏମ୍ଓ ଡାକ୍ତର ଆର୍ସୀ ପାଣ୍ଡେ କହିଛନ୍ତି, ନବଜାତକ ବିକ୍ରି ସମ୍ପର୍କରେ ସୂଚନା ମିଳିଥିଲା। ଏହା ପରେ ପୋଲିସ ଯାଞ୍ଚ ଆରମ୍ଭ କରିଥିଲା।