ରାୟଗଡ଼ା, ୧୦।୧୦(ଆଶିଷ ରଞ୍ଜନ ପଣ୍ଡା): ଗ୍ରାମାଞ୍ଚଳରେ ଲୋକଙ୍କୁ ଉନ୍ନତମାନର ସ୍ବାସ୍ଥ୍ୟସେବା ଯୋଗାଇବା ପାଇଁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି । ହେଲେ ଅଧିକାଂଶ ପିଏଚ୍ସିରେ ଡାକ୍ତର ନ ଥିବା ଯୋଗୁ ଗ୍ରାମାଞ୍ଚଳ ଲୋକେ ଉଚିତ ସ୍ବାସ୍ଥ୍ୟସେବା ପାଇପାରୁ ନ ଥିବା ଅଭିଯୋଗ ହେଉଛି। ଏପରିକି କିଛି ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଡାକ୍ତରଙ୍କୁ ନିଯୁକ୍ତି ଦିଆଯାଇଥିଲେ ମଧ୍ୟ ଅପହଞ୍ଚ ଅଞ୍ଚଳ ଯୋଗୁ ଡାକ୍ତରମାନେ ନିଯୁକ୍ତି ପାଇଥିବା ସ୍ବାସ୍ଥ୍ୟକେନ୍ଦ୍ରକୁ ଯାଉନାହାନ୍ତି। ଫଳରେ ବର୍ଷ ବର୍ଷ ଧରି ବିନା ଡାକ୍ତରରେ ଚାଲିଛି ସ୍ବାସ୍ଥ୍ୟସେବା।
ଜିଲାର ୧୧ଟି ବ୍ଲକରେ ୧୧ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ୩୬ଟି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି। ସେଥିମଧ୍ୟରୁ କାଶୀପୁର ସିଏଚ୍ସି ଅଧୀନରେ ୬ଟି, ପଦ୍ମପୁର ଅଧୀନରେ ୪ଟି, ବିଷମକଟକ ଅଧୀନରେ ୪ଟି, ମୁନିଗୁଡ଼ା ଅଧୀନରେ ୩ଟି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି। ସେହିଭଳି ରାୟଗଡ଼ା ବ୍ଲକ ଜେମାଦେଇପେଣ୍ଠ ସିଏଚ୍ସି ଅଧୀନରେ ୫ଟି, ରାମନାଗୁଡ଼ା ଅଧୀନରେ ୨ଟି, କୋଲନରା ଅଧୀନରେ ୨ଟି, କଲ୍ୟାଣସିଂହପୁର ଅଧୀନରେ ୩ଟି, ଗୁଣପୁର ବ୍ଲକର ଜଗନ୍ନାଥପୁର ସିଏଚ୍ସି ଅଧୀନରେ ୨ଟି, ଗୁଡ଼ାରୀ ଅଧୀନରେ ୨ଟି ଏବଂ ଚନ୍ଦ୍ରପୁର ଅଧୀନରେ ୨ଟି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି । ଅଧିକାଂଶ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ଅଭାବ ଯୋଗୁ ଲୋକେ ସାମାନ୍ୟ ଚିକିତ୍ସା ସୁବିଧା ପାଇପାରୁ ନ ଥିବା ଅଭିଯୋଗ ହେଉଛି। ଫଳରେ ଖର୍ଚ୍ଚାନ୍ତ ହୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ଅନ୍ୟ ସ୍ଥାନକୁ ଯାଇ ଚିକିତ୍ସା କରିବାକୁ ପଡ଼ୁଥିବା ଲୋକେ କହିଛନ୍ତି। କାଶୀପୁର ବ୍ଲକର ସୁଙ୍ଗେର, ଡଙ୍ଗାସିଲ, କୁଚେଇପଦର ଓ ଗୋରଖପୁର ପିଏଚ୍ସିରେ ଡାକ୍ତର ଥିଲେ ମଧ୍ୟ ପ୍ରାୟସମୟ ଡାକ୍ତର ସେଠାରେ ରହୁ ନ ଥିବାରୁ ଲୋକେ କାଶୀପୁର ଏବଂ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟ ଉପରେ ନିର୍ଭର କରୁଛନ୍ତି । ସେହିପରି ମାଣ୍ଡିବିସିଠାରେ ଜଣେ ଡାକ୍ତରଙ୍କୁ ନିଯୁକ୍ତି ମିଳିଥିଲେ ମଧ୍ୟ ତାଙ୍କୁ କାଶୀପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଡେପୁଟେଶନରେ ପଠାଇ ଦିଆଯାଇଛି । ଫଳରେ ମାଣ୍ଡିବିସି ପିଏଚ୍ସିରେ କୌଣସି ଡାକ୍ତର ନ ଥିବାରୁ ରୋଗୀ ସ୍ବାସ୍ଥ୍ୟସେବା ପାଇପାରୁନାହାନ୍ତି। ସେହିଭଳି ଟିକିରି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଦାୟିତ୍ୱରେ ଥିବା ଡାକ୍ତର ଛୁଟିରେ ରହିଥିବା ଜଣାପଡ଼ିଛି। ମୁନିଗୁଡ଼ା ବ୍ଲକର କୁମୁଡ଼ାବାଲି ପିଏଚ୍ସିରେ ଜଣେ ଡାକ୍ତର ନିଯୁକ୍ତି ହୋଇଥିବା ନେଇ ସୂଚନା ଥିବା ବେଳେ ୨୦୨୧ ସେପ୍ଟେମ୍ବର ୧୭ ତାରିଖରୁ ଉକ୍ତ କେନ୍ଦ୍ରରେ କୌଣସି ଡାକ୍ତର ନ ଥିବା ବିଭାଗୀୟ ସୂଚନାରୁ ଜଣାପଡ଼ିଛି। ସେହିପରି ବିଭାଗୀୟ ତଥ୍ୟ ଅନୁସାରେ ଜେମାଦେଇପେଣ୍ଠ ସିଏଚ୍ସି ଅଧୀନରେ ଥିବା କେରେଡ଼ା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଜଣେ ଡାକ୍ତର ନିଯୁକ୍ତି ପାଇଥିବା ବେଳେ ସେଠାରେ କୌଣସି ଡାକ୍ତରଙ୍କୁ ଦେଖିବାକୁ ମିଳୁନି ା ଏଭଳିକି ସେଠାରେ କୌଣସି ଡାକ୍ତର ନିଯୁକ୍ତି ହୋଇଥିବା ଅଞ୍ଚଳବାସୀ ଜାଣିନାହାନ୍ତି । ଜେମାଦେଇପେଣ୍ଠ ସିଏଚସି ଅଧୀନରେ ଖିଲମିସଗୁଡ଼ା ଗ୍ରାମ ନାଗାବଳୀ ନଦୀ ଆରପାରିରେ ରହିଥିବା ଯୋଗୁ ଏବଂ ଏହି ଗ୍ରାମକୁ ଯିବା ପାଇଁ ପୋଲ ନ ଥିବାରୁ ଉକ୍ତ ଗ୍ରାମରେ ଆରମ୍ଭ କରାଯାଇଥିବା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ମାତ୍ର ଗୋଟିଏ ଦିନ ଖୋଲିବା ପରେ ବନ୍ଦ ହୋଇଯାଇଥିଲା । ତେଣୁ ଖିଲମିସଗୁଡ଼ା ଓ ଏହାର ଆଖପାଖ ଗାଁକୁ ସ୍ବାସ୍ଥ୍ୟସେବା ପାଇଁ ଜେମାଦେଇପେଣ୍ଠ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସହିତ ସଂଲଗ୍ନ କରିଦିଆଯାଇଛି । ସେହିଭଳି ଗୁଣପୁର ବ୍ଲକ ଜଗନ୍ନାଥପୁର ସିଏଚ୍ସି ଅଧୀନରେ ଥିବା ଡମ୍ବସରା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ନିଯୁକ୍ତି ପାଇଥିବା ଡାକ୍ତର ପିଜି କରୁଥିବାରୁ ସେ ଅଧିକାଂଶ ସମୟ ସେଠାରେ ରହୁନାହାନ୍ତି। ଗୁଡ଼ାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଥିବା ଢେପାଗୁଡ଼ା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ନିଯୁକ୍ତି ପାଇଥିବା ଡାକ୍ତରଙ୍କୁ ଗୁଡ଼ାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଡେପୁଟେଶନରେ ପଠାଇ ଦିଆଯାଇଥିବାରୁ ଅଞ୍ଚଳବାସୀ ସ୍ବାସ୍ଥ୍ୟସେବାରୁ ବଞ୍ଚତ୍ତ ରହୁଛନ୍ତି । ସେହିଭଳି ସର୍ଗିଗୁଡ଼ାରେ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ କୌଣସି ଡାକ୍ତର ନ ଥିବା ବିଭାଗୀୟ ସୂଚନାରୁ ଜଣାପଡ଼ିଛି । ତେଣୁ ଜିଲା ପ୍ରଶାସନ ଓ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେଇ ଏହାର ସ୍ଥାୟୀ ସମାଧାନ କଲେ ଗ୍ରାମାଞ୍ଚଳରେ ସ୍ବାସ୍ଥ୍ୟସେବାରେ ସୁଧାର ଆସିପାରିବ ବୋଲି ଦାବି ହୋଇଛି । ଏ ନେଇ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଲାଲମୋହନ ରାଉତରାୟଙ୍କୁ ଫୋନ କରାଯାଇଥିଲେ ହେଁ ସେ ଫୋନ୍ ଉଠାଇ ନ ଥିବାରୁ ଯୋଗଯୋଗ ସମ୍ଭବପର ହୋଇପାରି ନାହିଁ।