ନୂଆଦିଲ୍ଲୀ,୭।୮: ବିଜୟ ମାଲ୍ୟା ମାମଲାରେ ପୁଣି ଥରେ ନୂଆ ଘଟଣା ସାମ୍ନାକୁ ଆସିଛି। ଏହି ମାମଲା ସହ ଜଡ଼ିତ ଏକ ନିର୍ଦ୍ଦିଷ୍ଟ ଦସ୍ତାବିଜ ସୁପ୍ରିମକୋର୍ଟଙ୍କ ଫାଇଲରୁ ହଜିଥିବା ଘଟଣା ନଜରକୁ ଆସିଛି। ଜଷ୍ଟିସ ୟୁ.ୟୁ. ଲଳିତ ଏବଂ ଜଷ୍ଟିସ ଅଶୋକ ଭୂଷଣ ଏହି ମାମଲାର ଶୁଣାଣି କରୁଥିବା ଅଗଷ୍ଟ ୨୦ ପର୍ଯ୍ୟନ୍ତ ଏହି ମାମଲାର ଶୁଣାଣିକୁ ମୁଲତବୀ ରଖିଛନ୍ତି। ୯ ହଜାର କୋଟି ଟଙ୍କାର ବ୍ୟାଙ୍କ ଋଣ ଫେରସ୍ତ ମାମଲାରେ ସୁପ୍ରିମକୋର୍ଟ ବିଜୟ ମାଲ୍ୟାଙ୍କୁ ଦୋଷୀ ସାବ୍ୟସ୍ତ କରିଥିଲେ। ବ୍ୟାଙ୍କଗୁଡିକ ବାରମ୍ବାର କହିବା ପରେ ସେ ଋଣ ଫେରସ୍ତ କରି ନ ଥିଲେ। ସେ ପଳାତକ ଘୋଷିତ ହୋଇ ବର୍ତ୍ତମାନ ଲଣ୍ଡନରେ ରହୁଥିବା ବେଳେ ଏହି ମାମଲାରେ ସେ ରିଭ୍ୟୁ ପିଟିଶନ ଦାୟର କରିଛନ୍ତି। ଉକ୍ତ ପିଟିଶନର ଶୁଣାଣି ହେଉଥିବା ବେଳେ ଗୁରୁବାର ନିର୍ଦ୍ଦିଷ୍ଟ ଦସ୍ତାବିଜ ହଜିଥିବା ନଜରକୁ ଆସିଥିଲା। ମାମଲାର ପରବର୍ତ୍ତୀ ଶୁଣାଣି ଚଳିତ ମାସ ୨୦ରେ ହେବ ବୋଲି ଜଣାପଡିଛି।
